Read tiv Genese 34 Bible Online

Genese 34 - tiv bible

Genese 34

¹Dina, wan u Lea u a mar a Yakob la, due sha u za nengen ônkasev mba hen tar la.

²Tsô Shekem wan u Hamor, Orhivi, tor u hen tar la, nengen a na yô, a kua a na, a yav a na, a vihi un.

³Ishima na cii, lu sha Dina wan u Yakob; wankwase la doo un ishima, a ôr kwagh a wankwase la legh legh.

⁴Shekem shi ôr kwagh a ter na Hamor kpaa, kaa er: Erem iniunkwase ne.

⁵Yakob ungwa aun er a vihi wan na Dina; kpa er ônov nav lu a ilev nav ken toho yô, Yakob wa ishima zan zan ve hide.

⁶Tsô Hamor ter u Shekem due va hen Yakob sha u una va ôr kwagh a na.

⁷Ônov mba Yakob kpaa, zum u ve za ungwa kwagh la yô, ve hide ken toho; ve mba nomso mbala, asema vihi ve, kwagh vihi ve tsung, sha u a er kwagh u ibume ken Iserael, er a yav a wan u Yakob yô, kwagh la doo u ma i er nahan ga.

⁸Nahan Hamor ôr kwagh a ve kaa er: Ishima i wan wam Shekem ngi sha wan wen; yô, shi gema nen un, na nen un, a̱ hingir kwase na.

⁹Ne kpaa eren nen kasev a vese; naan nen se ônov enev mba kasev, ne di kpaa gema eren nen ônov asev mba kasev.

¹⁰Gba lun nen a vese tsô, tar ngun gbanger gbanger ne, tema nen ker, zenden nen kasua, zuan nen a inyaregh keregh.

¹¹Shekem kaa a ter u wankwase man anmgbianev mba wankwase la er: De nen i̱ doo ne a mo, kwagh u né wam kpaa, me na.

¹²Wam nen kem man inyaregh ki iwuagh; nea wam nan nan kpaa, me na er ne wem la; kpa nam nen iniunkwase ne, m̱ er i.

¹³Tsô ônov mba Yakob gema ôr kwagh a Shekem man ter na Hamor sha ayom, sha ci u a vihi Dina anngô ve u kwase yô.

¹⁴Ve kaa a ve er: Se fatyô u geman anngô wase nan oripusu nahan ga, gadia nahan ka se kwagh u aheenegh yum.

¹⁵Kwagh u né er keng man sé rumun ne yô, saa né hingir er se nahan; inja na yô, hanma nomsoor ken a ven nana̱ tsôngo;

¹⁶nahan sé naan ne ônov asev mba kasev, se kpaa sé eren ônov enev mba kasev, sé tema a ven imôngo, sé hingir nongo môm.

¹⁷Kpa aluer nea ungwa imo yase ner, i̱ tsôngo ne ga yô, sé kua a wan wase, sé yem a yasegh.

¹⁸Kwaghôron ve la doo Hamor vea Shekem wan u Hamor la.

¹⁹Wanyekwaor la kera ngôôr sha kwagh la je ga, gadia wan u Yakob doo un yum yô, man un kpaa, lu a icivir hemba mba hen ya u ter na cii.

²⁰Tsô Hamor vea wan na Shekem ve za hen hundagar ve, ve za ôr kwagh a ior mba ken gar ve, ve kaa er:

²¹Ior mban tema a vese doo doo; nahan yô, sé de nen ve, ve̱ tema ken tar ne, ve̱ zenden kasua ker, gadia nenge, tar ne gbanger kuma ve; nahan sé eren ônov vev mba kasev, se di kpaa sé naan ve ônov asev mba kasev, ve̱ eren.

²²Kwagh u á er man ior mban vea rumun u teman a vese, sé hingir nongo môm a ve yô, ka u hanma nomsoor ken a vese nana̱ tsôngo, di er ve kpaa ve lu mbaicôngov nahan.

²³Ilev vev man inyarev vev man uzendenya vev cii, á kera va hingir akaa ase gaa? Sé gba rumun nen kwagh ve la tsô, ve̱ tema a vese imôngo.

²⁴Mba ve duen hen hundagar na cii, ve ungwa kwaghôron u Hamor man wan na Shekem la; nahan i tsôngo hanma nomsoor, mba ve duen hen hundagar na cii.

²⁵Tsô sha iyange i sha utar la, er lu nyoon ve yum yô, ônov mba Yakob uhar Shimeon man Levi, anngôôv mba Dina, hanmô ve tôô sanker na, ve za bur a bur gar la, ve wua nomsombaiorov cii.

²⁶Ve wua Hamor man wan na Shekem sha zwa u sanker; tsô ve kua a Dina ken ya u Shekem ve due ve yem.

²⁷Ônov mba Yakob va due sha mba i woo la, ve sar gar la gbulugh gbulugh, sha ci u ve vihi anngô ve u kwase yô.

²⁸Ve kura ve iyôngo man ivo man abua man ujaki, hanma kwagh ua lu ken gar kua ken ikôngo kpaa.

²⁹Inyarev vev cii, man mbayev vev cii kua kasev vev, ve kôr, ve ya ishar sha min kua akaa a ken ayou cii.

³⁰Tsô Yakob kaa a Shimeon man Levi er: Ne nzughul a mo je, ne gemam, m due ior mba ken tar ne ishima, ka Mbakanaan man Mbaperishi je la; man mo, m ngu annongo kpeghee tsô. Aluer vea kohol vea va ta num sha a mo yô, me tim a ya wam.

³¹Ve gema ve kaa a na er: Ka nyi man a er a anngô wase u kwase er ka idyakwase nahana?