Read tiv Genese 35 Bible Online

Genese 35 - tiv bible

Genese 35

¹Tsô Aôndo kaa a Yakob er: Mough yem hen Betel, za tema her; ka heregh je ú ta atse a nanden Aôndo nagh sha mi, u A ande her a we, zum u u yevese anngôu Isou la, ye.

²Yakob kaa a mba hen ya na, man mba ve lu a na cii er: Haa nen mbaaôndo mbagenev mba ve lu her a ven la, kera; wanger nen ayol a en, haa nen akondo agen,

³mough sé yem nen hen Betel, me za ta atse a nanden Aôndo nagh sha mi heregh, u A ungwa imo yam sha iyange i ican yam, man A lu a mo sha gbenda u m lu zan sha mi la.

⁴Nahan ve va na Yakob mbaaôndo mbagenev mba ve lu a mi cii, kua ikunya ve i ken ato; Yakob ii ve hen itinekon i terebin i hen Shekem la.

⁵Tsô ve mough ve gba yemen; mcieryol u Aôndo haa sha agar a a kase ve cii, nahan ve kera zenda ônov mba Yakob ijime ga.

⁶Yakob va hen Lushi u a lu ken tar u Kanaan, ka Betel je la, un a ior mba ve lu a na imôngo cii.

⁷A ta atse a nanden nagh sha mi heregh, a ii ijiir la iti er El-betel (Aôndo u Betel) sha ci u ka heregh Aôndo ande her a na zum u a yevese anngô na la ye.

⁸Debora, yese u Rebeka la kpe, i ii un hen Betel vegher u shin, hen itine i kon u ouki; maa ve ii un iti er Alon-bakuti (ouki u mlia).

⁹Aôndo shi ande hen Yakob, zum u a hide ken Padan-aram la, A ver un doo doo.

¹⁰Aôndo kaa a na er: Iti you er Yakob; á kera yilan we er Yakob ga, kpa iti you á lu Iserael; A maa a ii un iti er Iserael.

¹¹Shi Aôndo kaa a na er: Ka Mo Aôndo Uhembanagee, maren, seer a seer; ikurior man ikpila i akuraior ia due ken a we, utor vea due ken a we.

¹²Tar u M ne Aberaham kua Isaka la, Me gema u, Me na u; man tsombor wou u ken ijime you kpaa, Me na u tar shon.

¹³Tsô Aôndo mough undu un hen ijiir i A lu ôron kwagh a na la, A yem.

¹⁴Tsô Yakob tim ikav i umbur hen ijiir i A er kwagh a na la; ikav la i lu iwen; a haa nagh ku man sha mi, shi a haa mkurem sha mi kpaa.

¹⁵Yakob ii ijiir i Aôndo ôr kwagh a na la iti er Betel.

¹⁶Tsô ve mough hen Betel ve gba yemen; ka kera shi ca u nyôron ken Eferata ga yô, Rahel maa gba toghol mar, ican er un sha mar kpishi.

¹⁷Er a lu toghol yum yô, kwase u kôron mar kaa a na er: De cie ga; gadia ngun kpaa ka wannomso u mar ye.

¹⁸Tsô er uma na lu duen kera yô, gadia a kpe, a ii un iti er Ben-oni (wan u ican yam); kpa ter na ii un iti er Benyamin (wan uwegh ku yanegh).

¹⁹Rahel maa kpe, i ii un hen gbenda u zan Eferata, ka Betelehem je la.

²⁰Yakob tim ikav i umbur sha uwar na la; ka ikav i umbur uwar u Rahel je ngu her zan zan nyian.

²¹Iserael gba yemen, a za tim tenti na ken hemen u Mikedal-eder.

²²Tsô zum u Iserael tema hen tar la yô, Ruben yav a Bila, kwase u ter na u sha uika; Iserael ungwa nahan. Ônov mba Yakob lu pue kar uhar.

²³Ônov mba Lea yô, lu: Ruben, waniunda u Yakob, man Shimeon man Levi man Yuda man Isakar kua Sebulon.

²⁴Ônov mba Rahel yô, lu: Yosev kua Benyamin.

²⁵Ônov mba Bila kpankwase u Rahel yô, lu: Dan man Nafetali.

²⁶Ônov mba Selpa, kpankwase u Lea yô, lu: Gadi kua Asher. Mban cii, ka ônov mba Yakob mba i mar ve ken Padan-aram je la.

²⁷Tsô Yakob za hen ter na Isaka hen Mamre, hen Kiriati-arba, ka Heberon je la, henpe Aberaham man Isaka ve lu shir la.

²⁸Ayange a Isaka lu anyom deri man akunduanyiin.

²⁹Tsô Isaka sule, kpe, a za kohol ior nav; hingir tamenor, bee iyol; ônov nav, Isou man Yakob ii un.