Read tiv Genese 48 Bible Online

Genese 48 - tiv bible

Genese 48

¹Tsô akaa ne nga kar yô, i va kaa a Yosev er: Nenge, teru ngu dedoo ga. Nahan a mough a ônov nav uhar, Manase man Eferaim.

²I kaa Yakob er: Nenge, wan wou Yosev ngu van her a we; tsô Iserael taver ishima, tema sha gambe.

³Yakob kaa a Yosev er: Aôndo Uhembanagee ande her a mo hen Lushi ken tar u Kanaan, verem doo doo,

⁴kaa a mo er: Me ngee u ônov, Me seer u a seer, Me gema u, ú hingir ikpila i akuraior, man Me gema tar ne Me na tsombor wou ken ijime you, á hingir kwagh u u gbem sha won.

⁵Yô, ônov ou mba uhar mban, mba u mar ken Igipiti er m lu a va kohol we ken tar u Igipiti ga ne, ka mba av; Eferaim man Manase vea hingir mba av er Ruben man Shimeon ve lu mba av nahan.

⁶Kpa ônov ou mba u mar ken ijime ve ne yô, ve̱ lu mba ou; ve yô, á yilan ve sha iti i anngôôv vev ken dyako ve la.

⁷Kpa zum u m mough ken Padan la, Rahel va kpem ken tar u Kanaan sha gbenda, kera shi ca her, u nyôron ken Eferata ga; maa m ii un heregh, sha gbenda u zan Eferata, ka Betelehem je la.

⁸Iserael nengen a ônov mba Yosev yô, a pine er: Ka unô ne?

⁹Yosev kaa a ter na er: Ka ônov av mba Aôndo A nem heen yô. A kaa er: Shi va a ve her a mo yôô, m ver ve doo doo.

¹⁰Kpa ashe a Iserael yuhwa sha ci u iyol i been je, kera fan ityô u nengen ga. Tsô a kporom a ve her a na, nahan a suse ve zwa a kuve ve.

¹¹Iserael kaa a Yosev er: Mayange m fa mer, me shi me nenge ishigh you ga; man nenge, Aôndo dem, m nenge tsombor wou je kpaa.

¹²Tsô Yosev ker ve hen anu na kera yô, a gure a kuma ityough inya.

¹³Yosev va a ve uhar cii, a kôr Eferaim ken uwegh ku yanegh nagh a za a na hen uwegh ku imesegh ku Iserael; Manase yô, gema lu un ken uwegh ku imesegh, a za a na hen uwegh ku yanegh ku Iserael a kporom a ve her a na.

¹⁴Iserael naregh uwegh nagh ku yanegh, penda sha ityough ki Eferaim u a lu u kiriki la, uwegh nagh ku imesegh gema penda sha ityough ki Manase, a peregh ave na; gadia ka Manase man a lu u iunda ye.

¹⁵Tsô a ver Yosev doo doo, a kaa er: Aôndo, u uter av Aberaham man Isaka ve zenden sha ishigh Nagh la, Aôndo, u A kuran mo sha ayange a uma wam cii zan zan nyian ne,

¹⁶ortyom u Sha u a yimam sha hanma kwagh u bo cii, a̱ ver mbayev mban doo doo, iti yam i̱ tsôr sha a ve, kua iti i uter av Aberaham man Isaka kpaa; ve̱ seer a seer ngeen ken tar.

¹⁷Kpa er Yosev nengen ter na penda uwegh nagh ku yanegh sha Eferaim yô, doo un ga; nahan a kôr uwegh ku ter na er una tôô sha, sha ityough ki Eferaim, una gema á penda sha ityough ki Manase.

¹⁸Yosev kaa a ter na er: Nahan ga terem; gadia ka ngun a lu waniunda ye, penda un uwegh ku yanegh sha ityou.

¹⁹Kpa ter na venda, kaa er: M fa wan wam, m fa, un kpaa una hingir ikurior, un kpaa, una due iti; kpa anngô na u kiriki una hemba un; tsombor na ua hingir ikpila i akuraior.

²⁰Kape a ver ve doo doo sha iyange la, a kaa er: Ka sha a we man Iserael una naan iveren ye, una kaan er: Aôndo A̱ ver u, hingir er Eferaim man er Manase nahan. Kape a ver Eferaim sha hemen u Manase la.

²¹Tsô Iserael kaa a Yosev er: Nenge, m ngu kpen, kpa Aôndo Una lu a ven, shi Una hide a ven ken tar u uter enev kpaa.

²²Man shi mo m seer we kwar môm hemba u anngôôv ou la, ka kwar u m ngohol sha ikev i Mbaamor sha sanker wam kua ada wam yô.