Read tiv Genese 49 Bible Online

Genese 49 - tiv bible

Genese 49

¹Tsô Yakob yila ônov nav, kaa a ve er: Kohol nen imôngo, m̱ ôr ne kwagh u una va er ne sha ayange a masetyô yô:

²Kohol nen, ungwa nen, ne ônov mba Yakob; ver nen ato sha ter wen Iserael.

³Ruben, ka we u lu wan wam u iunda ye, tahav av, man mhii u agee am, u hemban icivir man u hemban tahav kpaa.

⁴Iubububu er mngerem nahan, ú kera hemba ga, gadia u unde sha gambe u teru, u gema u hôngor a mi; a unde sha ikagh yagh ki yaven mi.

⁵Shimeon vea Levi ka anngôôv je; usanker vev ka ikav mbi aperav tsô.

⁶Uma wam a̱ de nyer nongo a mhen ve ga; icivir yam i̱ de zough a ve ken mkohol ve ga, gadia ka sha ishimanyoon ve la, ve wua ior, sha apera ve la, ve gber abua igbela i akishiangahar.

⁷Ifan i̱ kôr ishimanyoon ve la, gadia i tiaver gande, man iyugh ve la kpaa, gadia i vihi yum; me pav ve, ve̱ lu wue wue ken Yakob, me sambe ve ken Iserael.

⁸Yuda, ka we anngôôv ou vea wuese we ye; uwegh ough kua kôr mbaihomov ou sha mon; ônov mba teru vea gure u inya.

⁹Yuda ka gumbegha; u mough hen kwagh u u ker yô, wan wam, u kôndo; a ngurum, a var inya er begha yô, man er ngôbegha nahan; ka an je nana cihi á num unuu?

¹⁰Tôgh kua kar hen Yuda kera ga, gbough ku ortaregh kpaa kua kar hen atô u angahar a na kera ga, zan zan Un u ku lu ku Nagh la, Una va; ka Un akuraior aa ungwan imo Na ye.

¹¹Una zer jaki na hen itinekon i wain, wanjaki na kpaa hen icuwankon u wain Una ôô ikondo na shin zar u wain, riga na kpaa shin awambe a atam a wain.

¹²Ashe na aa nyian á hemba zar u wain, anyi na aa kungu á hemba zaratumbagh.

¹³Sebulon una tema hen kpezegemnger, una lu hen ihongo i utso; ikighir na ia ar sha Shidon.

¹⁴Isakar ka jaki i taver iyol, a yav hen atô u atôrauile;

¹⁵a nenge, u shiligh inya doo, tar la kpaa u doo; nahan a shiligh vandegh nagh sha u una tôô ikav, a hingir u eren tom sha inja i kpan.

¹⁶Dan una sôr ior nav tar, er kwe u ken Iserael yô.

¹⁷Dan una hingir iyô i hen gbenda; ka igbinde i lun hen gbenda, i nyuman akishiangahar a nyinya, nahan or u hendan un la, nana gba tiôr.

¹⁸Ka myom Wou m veren ashe na ye, TERE.

¹⁹Gadi yô, mbanumungbenda vea ta num sha a na; un di una mough num a ve ijime.

²⁰Asher yô, kwaghyan na una luun ahôm, ka her a na á zuan a akaayan a nyohon a utor ye.

²¹Nafetali ngu er ashim u zenden enger enger yô, er akaaôron a dedoo.

²²Yosev ka semenkon u umen atam, semenkon u umen atam, u hen imbormnger; agbaa a na nga samber sha kurgar, haan ken won.

²³Mbaavaanev vembe un, ve ker un, avaan a ve er un ican;

²⁴kpa ada na yô, lu her taveraa, akaseaveegh a na kpaa, lu naregh her, sha ave a Uageegh u Yakob; ka heregh, her ape Orkuran, Iwen i Iserael A lu la.

²⁵Sha Aôndo u teru, u Una wase u, man sha Uageegh la u Una ver u, sha averen a Sha, averen a mngerem ma shin mze u inyaagh, averen a atumbagh kua a sagh kpaa.

²⁶Averen a teru a hemba averen a utsembaiwoov, man akaasaren a uicôronmbaagunguv je; aa lu sha ityough ki Yosev, man sha ihaghtyo i un u i tsegh un i ver un kposo a anngôôv nav la.

²⁷Benyamin ka gbaseela u vihin kwagh, pepe ka a ya kwagh u a woo yô, aikighe yô, a gema a kar kwar sha ishar la.

²⁸Ingin cii ka ikwe i Iserael i pue kar ihiar je ne; man ngun ka kwagh u ter ve ôr ve man a ver ve doo doo; hanmô ve, a ver nan sha iveren i nan je.

²⁹Nahan a kaa a ve er: Kuma pe me za kohol ior av ve; yô, iim nen a uter av ken bariwen u a lu ken tiôntar u Eferon Orhiti la,

³⁰ken bariwen u a lu ken tiôntar u Makpela, u a lu sha ishigh ki Mamre, ken tar u Kanaan, u Aberaham yam kua tiôntar la, a Eferon Orhiti, hingir ijiir na i iwaregh iyol na je;

³¹ka keregh i ii Aberaham kua kwase na Sara ye; ka keregh kpaa i ii Isaka kua kwase na Rebeka ye; shi ka keregh kpaa m ii Lea ye;

³²ka tiôntar man bariwen u a lu ker, u i yam a Mbahiti la.

³³Zum u Yakob we ônov nav kwagh, kur yô, a kohol angahar a na a haa sha gambe, maa a sule; a za kohol ior nav.