Read tiv Genese 6 Bible Online

Genese 6 - tiv bible

Genese 6

¹Tsô zum u ior hii ngeen sha won la, man er ve mar ônov mba kasev kpaa yô,

²ônov mba Aôndo nenge ônkasev mba iorov doo ashe; tsô ve er kasev mba sha asema a ve cii.

³TER kaa er: Jijingi Wam Una kera tema ken or gbem ga, gadia nan kpaa nan ngu inyam tsô, nahan kpaa ayange a uma u nan yô, aa lu anyom deri man ikundu.

⁴Akôraior lu sha won sha ayange la, kua ken masejime kpaa, zum u ônov mba Aôndo tsa a ônkasev mba iorov, mar a ve la; mbala lu ior mba ageev, mba sha ayange a ngise la, mbaduenati je.

⁵Er TER nenge isholibo i or kehe sha won, man hanma mhen u ishima i nan kpaa lu u bo tseegh gbem yô,

⁶TER vaa afanyô er Un er or sha won yô, vihi Un ken ishima.

⁷TER shi kaa er: Or u M gbe nan ne, Me tim nan sha tar kera, or kua uzendenya man akaa a a kper a kpela inya man inyon i sha; gadia M vaa afanyô er M er ve yô.

⁸Kpa gema doo TER a Noa.

⁹Ingin ka icombor i Noa ne: Noa yô, lu orperapera, lu a acôghol iyol ga, ken ikov na cii; Noa zenden vea Aôndo imôngo je;

¹⁰Noa mar ônov utar Shem man Ham kua Yafeti.

¹¹Kpa tar vihi sha ishigh ki Aôndo, man tar mgbough a apera kpaa.

¹²Aôndo nenge, tar vihi; gadia uumace cii vihi gbenda ve sha won kera.

¹³Aôndo kaa a Noa er: Mkur u uumace cii va sha ishigh Yagh ve; gadia ve iv a apera sha tar; nenge, timin Yam ve a tar imôngo ne.

¹⁴Yô, er tso sha kon u gofer; tôndo ayou ker, ukpo ukpo, man shighe un mningem kimi kua ken won kpaa.

¹⁵Er un nahan: iniembe i tso, aseva deri utar, igbanger na, aseva akunduahargber, ityaven na yô, aseva ikundugber.

¹⁶Yô, gber ian sha tso la, tôndo undu tiôn u sha ishiva i môm hunda u tsoogh la kpaa, gber u hen imbusu; pav un ukpo utar, kpo u shin man u her atô man u sha.

¹⁷Gadia Mo Me va a mngerem sha tar deemee, sha u timin hanma kwagh u uma cii, u a lu a iôôn i uma ken a na, sha won, kera; hanma kwagh u sha tar cii una kpe.

¹⁸Kpa, Me ya ikur a we; ú nyôr ken tso la, we a ônov ou, man kwase wou man kasev mba ônov ou a we imôngo.

¹⁹Hanma kwagh u uma u a lu di uma tsô yô, ú nyôr a mi uhar uhar ken tso, sha u ve̱ lu uma a we imôngo yô; á lu nom man mgbian.

²⁰Inyon i sha, sha anza a i, man uzendenya sha anza a ve, man hanma kwagh u a kper a kpela inya u shin tar sha inja na; hanma nongokwagh, vea va her a we uhar uhar, sha u ve̱ war yô.

²¹Man we yô, gema tôô hanma injakwaghyan i i ye, kohol hen a we, i̱ lu kwaghyan sha ci wou kua ve kpaa.

²²Noa er nahan; kwagh u Aôndo kaa un la cii, a er sha mi je.