Read tiv Genese 7 Bible Online

Genese 7 - tiv bible

Genese 7

¹Shi TER kaa a Noa er: We a ya wou cii, nyôr nen ken tso; gadia ka we, M nenge u lu orperapera sha ishigh Yagh ken kov ne ye.

²Hanma inyam i wang yô, tsuwa itiankarihiar itiankarihiar, nom man mgbian, nom man mgbian. Inyam i wang ga yô, i̱ lu ihiar ihiar, nom man mgbian, nom man mgbian;

³man inyon i sha kpaa itiankarihiar itiankarihiar, nom man ngô, nom man ngô; sha u ivor i̱ war sha won yô.

⁴Gadia shi ayange ataankarahar, tsô Me nôô ura sha tar ayange akunduahar, atetan kua tugh kpaa; hanma kwagh u uma u M er cii, Me tim un sha won kera.

⁵Noa er kwagh u Aôndo kaa un la vough.

⁶Noa lu anyom deri ataratar zum u mngerem va sha tar deemee la.

⁷Tsô Noa nyôr a ônov nav man kwase na kua kasev mba ônov nav a na imôngo ken tso, sha ci u mngerem ma deemee mara.

⁸Inyam i wang ga, man inyam i wang, man shi inyon man hanma kwagh u a kper a kpela inya,

⁹ve va hen Noa uhar uhar ken tso, nom man mgbian, er Aôndo kaa Noa yô.

¹⁰Tsô ayange ataankarahar la, nga kar kera yô, mngerem lu sha won deemee.

¹¹Sha inyom, i anyom a Noa kuma deri ataratar la, sha uwer u sha uhar, ayange a u pue kar ataankarahar la, sha iyange la yô, ambor a aiv a mnger ande sha, ahura a Sha kpaa bugh.

¹²Zegeura lu nôôn sha tar, ayange akunduahar, atetan kua tugh kpaa.

¹³Sha iyange shon la je, Noa nyôr, wen vea Shem man Ham kua Yafeti, ka ônov mba Noa je la, man kwase u Noa, man kasev utar mba ônov nav mbala, a ve imôngo,

¹⁴ve man hanma inyamtoho sha inja na, man uzendenya cii, sha anza a ve, man hanma kwagh u a kper a kpela inya, sha inja na, man hanma inyon sha inja i i, inyon i lun a ingur kposo kposo.

¹⁵Ve nyôr ken tso hen Noa, uhar uhar; hanma injakwaghuma i iôôn i uma i lu ken i tsô yô.

¹⁶Mba ve nyôr yô, ve nyôr nom man mgbian u akaauma cii, er Aôndo kaa un yô. TER maa wuhe un kimi.

¹⁷Ayange akunduahar mngerem lu sha tar deemee, mngerem seer a seer kenden a tso sha, undu tar shin je.

¹⁸Mngerem hemba seer a seer sha tar kpishi; tso la yô, gba zenden sha kwavmnger.

¹⁹Mngerem hemba tar elegh elegh, je ugôgômbaiwoov sha won uve.

²⁰Mngerem kar ve sha, aseva pue kar ataan, iwo kpaa uve.

²¹Akaauma cii, a a zenden sha tar, kpe kera: inyon man uzendenya man inyamtoho man hanma kwagh u a kper a kpela inya, man hanma or kpaa;

²²akaa cii a iôôn i jijingi u uma a lu ken ahenga a a, a a lu sha tar kpe.

²³I tim hanma kwaghuma u a lu sha tar ci ca, or man zendenya man kwagh u a kper a kpela inya kua inyon i sha, i tim ve sha won kera. Noa mase waren tswen a mba ve lu vea na imôngo ken tso la.

²⁴Mngerem hemba tar ayange deri man akunduahargber.