Read tiv 2 Samuel 10 Bible Online

2 Samuel 10 - tiv bible

2 Samuel 10

¹Tsô ken masejime la, tor u Mbaamon kpe, nahan Hanun wan na gema tema tor sha ityough nagh.

²Nahan Davidi kaa er: Me er a Hanun wan u Nahashi dedoo, er ter na kpaa lu eren a mo dedoo nahan. Tsô Davidi tindi mbayev nav er ve̱ za yar un ku u ter na la. Nahan mbayev mba Davidi za nyôr hen tar u Mbaamon.

³Kpa atiator a Mbaamon gema kaa a ter ve Hanun er: U ngu fan wer, Davidi ngu civir teru, sha er a tindi mbayaren we ku yôô? Davidi kera tindi mbayev nav hen a we ka sha u ve̱ va nenge aker, ve̱ fa akaa a ken gar, man ve̱ va hembe un kpaa gaa?

⁴Nahan Hanun kôr mbayev mba Davidi hondo ve indyer vegher môm môm shi tôndo ve uriga hen atô sha asenatôôgh je, tsô a na ve gbenda.

⁵Zum u i va kaa Davidi nahan yô, a tindi i za kegh ve gbenda; gadia kunya kôr ior mbala mimi. Tor kaa er: Hila lu nen ken Yeriko zan zan indyer yen i̱ kar menden man né hide ye.

⁶Zum u Mbaamon nenge er ve hingir kwagh u duen Davidi ishima yô, ve Mbaamon, ve tindi i goho Mbashiria mba hen Bete-rehobi kua Mbashiria mba hen Soba, ior dubu ikundu mba zan angahar, man tor u Maaka a ior dubu, kua ior i Tobi, ior dubu pue kar uhar.

⁷Zum u Davidi ungwa kwagh la yô, a tindi Yoabi a ikumutya cii, lu anomaior cii.

⁸Tsô Mbaamon due, tange ityav hen hundagar; Mbashiria mba hen Soba man mba hen Rehobi man ior mba Tobi kua Maaka, ve lu ijiir ve kposo ken ikôngo.

⁹Zum u Yoabi nenge er i himbir un sha utya ken hemen kua ken ijime kpaa yô, a tsuwa ior ken uicuwanmbaiorov mba ken Iserael cii, a samber ve sha u ve̱ nôngo ityav a Mbashiria;

¹⁰ior mba ve shi la a gema a wa ve sha ikev i anngô na, Abishai, ve di kpaa a samber ve sha u ve̱ nôngo ityav a Mbaamon.

¹¹Nahan a kaa er: Aluer Mbashiria vea hemban mo yô, we ú va wasem; kpa aluer Mbaamon vea hemban we yô, mo di me va wase u.

¹²Yô, taver nen ishima sé lu nen nomso, sha ci u ior asev man sha ci u agar a Aôndo wase; TER A̱ er kwagh u A doo Un yô.

¹³Tsô Yoabi kua ior mba ve lu a na, ve kporom sha u nôngon ityav a Mbashiria, maa ve yevese un.

¹⁴Zum u Mbaamon nenge Mbashiria mba ngur yevese yô, ve di kpaa ve yevese Abishai, ve za nyôr ken gar. Tsô Yoabi de Mbaamon, a hide ken Yerusalem.

¹⁵Zum u Mbashiria nenge er ve yina sha Iserael yô, ve kohol.

¹⁶Hada-deser tindi i za kua a Mbashiria mba ve lu Ifi yande la yô; tsô ve va ar hen Helam; Shobaki kurutya u akumautya a Hada-deser hemen ve.

¹⁷I va ôr Davidi kwagh la, nahan a kohol Iserael cii, a per Yordan, a za hen Helam. Nahan Mbashiria tange ityav a Davidi, ve nôngo ityav a na.

¹⁸Mbashiria gema yevese Iserael, Davidi wua Mbashiria mba sha akeke ior deri utaankaruhar man mbaanyinyav ior dubu akunduahar; a gber Shobaki kurutya ve la avav je maa a kpe her.

¹⁹Zum u utor mba ve lu sha ikev i Hada-deser la, ve nenge er ve yina sha Iserael nahan yô, ve hime iyongo a Iserael, ve hingir sha ikev na. Nahan Mbashiria cia u shi wasen Mbaamon.