Read tiv 2 Samuel 19 Bible Online

2 Samuel 19 - tiv bible

2 Samuel 19

¹Tsô i za kaa a Yoabi er: Nenge, tor ngu vaan, ngu zungwen ku u Abesalom.

²Nahan mhembe u sha iyange la gema hingir ior cii ku u zungwen; gadia ior ungwa gwa sha iyange la er: Ishima ngi vihin tor sha ci u ku u wan na.

³Nahan ior nyôr ken gar ving sha iyange la, bee er ior mba kunya u ker ve, ve lu kususu er ve yevese ityav yô.

⁴Tor yisa ishigh nagh, tor yila genger genger er: Ahii, wan wam Abesalom! Ahii! Abesalom wan wam, wan wam!

⁵Tsô Yoabi nyôr ken ya, za hen tor, a kaa er: Nyian u na mbayev ou cii kunya, mba ve yem uma wou nyian ne, kua uma u ônov ou mba nomso man mba kasev, man uma u kasev ou, man uma u kasev ou mba sha uika kpaa;

⁶gadia mba ve ker u ihom doo u ishima, u gem u vende mba u doo ve ishima la. Gadia nyian u pase je er, atiator kua mbayev ve lu ugbilinmbaiorov sha ishigh you yô; gadia nyian m kav, aluer Abesalom una lu uma nyian man se cii sea kpe nyian yô, ma i doo u mimi.

⁷Yô, mough hegen, due za ôr kwagh u dedoo a mbayev ou; gayô m bum TER mer, aluer u due ga yô, ma or nana kera lu a we hen tugh mbun ga; nahan kwaghbo u una tser u yô, una hemba akaabo a a vande tseren we cii er u lu iyev je zan zan nyian.

⁸Nahan tor mough za tema hen hunda. Nahan i kaa ior cii er: Nenge, tor tema hen hunda; tsô ior va kohol hen ishigh ki tor cii. Kpa Iserael yô, yevese kera, hanma or yem ken tenti u nan.

⁹Ior cii lu zôhôn zwa ayol a ve ken ikwe i Iserael cii, ve lu kaan er: Tor yima se sha ikev i mbaihomov asev, shi a yima se sha ikev i Mbafiliti kpaa, man ahegen yô, a yevese ken tar ne kera, sha ci u Abesalom.

¹⁰Man Abesalom u se ver un tor sha a vese la, a gema a kpe ken utya. Man ka nyi ne kera er kwagh ahegen ner, i̱ hide a tor ga?

¹¹Tsô tor Davidi tindi loho hen upristi Sadoki kua Abiatar, a kaa er: Ôr nen kwagh a mbatamen mba Yuda, kaa nen ner: Ka nyi ne né va hingir mbamasetyô sha u hiden a tor hen ya na? (Gadia kwaghôron u Iserael la cii va ar hen tor hen ya na.)

¹²Ne mba anngôôv av, akuhe am man nyian yam kpaa; man ka nyi né va hingir mbamasetyô sha u hiden a toro?

¹³Shi kaa nen Amasa ner, u ngu akuhe am man inyam yam je gaa? Aôndo A̱ er a mo nahan shi i̱ seer nahan kpaa, aluer we wea hingir tor u akumautya sha ishigh yagh gbem sha ityough ki Yoabi ga yô.

¹⁴Nahan a gema asema a ior i Yuda cii, hingir er ka or môm yô; nahan ve tindi tor loho, er: Hide a mbayev ou cii.

¹⁵Tsô tor gba hiden, va ar hen Yordan. Nahan Yuda va hen Gilgal sha u va keghen tor gbenda, er vea per a tor hen Yordan.

¹⁶Shimei wan u Gera, Orbenyamin, u a lu ken Bahurim la, a mough fefa, a va a ior mba Yuda imôngo, sha u va keghen tor Davidi gbenda,

¹⁷ior i Benyamin dubu lu a na imôngo, man Shiba u hen ya u Saulu a ônov nav pue kar utaan kua mbatomov nav ikundu a na imôngo kpaa; ve per hen Yordan sha ashe a tor je.

¹⁸Tso u hen ihongo lu zan sha u peren a ior i tor, man sha u eren kwagh u a doo un yô. Nahan Shimei wan u Gera, va gure sha ishigh ki tor, zum u a lu veren iyol u peren Yordan la.

¹⁹A kaa a tor er: Tor a̱ de nem ibo ga, man shi de kera umbur kwagh u wanakiriki wou a er dang sha iyange i terem tor due ken Yerusalem la, je er tor una koso kwagh la ken ishima na ga.

²⁰Gadia mo wanakiriki wou, m fa er m er kwaghbo yô; nahan nenge, ken ya u Yosev cii, ka mo m vande van nyian sha u me va kegh terem tor gbenda ye.

²¹Kpa Abishai wan u Seruya gema kaa er: Er Shimei a toho or u TER, u i shigh un mkurem, nahan kpaa á wua un sha ci u kwagh ne gaa?

²²Kpa Davidi kaa er: Ka nyi i joughom a vene, ne ônov mba Seruya, ne mba ne hingir mba hendan kwagh a mo nyian nee? Á wua or u ken Iserael nyianaa? M fa er nyian m lu tor u Iserael gaa?

²³Tsô tor kaa a Shimei er: Ú kpe ga; shi tor bum a na kpaa.

²⁴Mefibosheti wan u Saulu kpaa va sha u va keghen tor gbenda; angahar a na tsô kpa, a ôô ga, indyer na kpaa a sôr ga, akondo na kpaa a ôô ga, hii sha iyange i tor mough je zan zan iyange i a kar hiden doo doo la.

²⁵Tsô zum u a va ken Yerusalem sha ci u keghen tor gbenda yô, tor pine un er: Ka nyi iyange u za a mo imôngo ga, Mefibosheti?

²⁶A gema a kaa er: Terem tor, wanakiriki wam iyange tsughum; gadia wanakiriki wou kaa er: Me kange jaki wam shidi me unde sha mi, me za a tor ityô; gadia wanakiriki wou ka ishombonor.

²⁷A za vihi iti i wanakiriki wou hen terem tor; nahan kpaa terem tor ngu er ortyom u Aôndo yô; nahan gba eren kwagh u a doo u tsô.

²⁸Gadia ior mba hen ya u terem cii, ve lu er ior mba ve kom ku sha ishigh ki terem tor, nahan kpaa, u ver wanakiriki wou ken mbayan sha tebul wou. Nahan m shi ngu a ian i me vaa a toro?

²⁹Tor kaa a na er: Ka nyi u ngee kwaghôron yum nahana? Imo yam yô, we vea Shiba gba karen tar la tsô.

³⁰Tsô Mefibosheti kaa a tor er: A̱ gba ngohol cii tsô, sha er terem tor a hir hen ya na doo doo yô.

³¹Barshilai Orgileadi kpaa za mough hen Rogelim, va per Yordan a tor imôngo, sha u una za ver un gbenda zan zan yande Yordan yô.

³²Barshilai bee iyol kpishi, anyom a na lu akunduanyiin; a koson tor er a lu ken Mahanaim la, gadia un lu shagbaor kpekpe.

³³Tsô tor kaa a Barshilai er: Yô, per a mo imôngo, me za koson we ken Yerusalem, lu a mo imôngo.

³⁴Barshilai gema kaa a tor er: Anyom a uma wam shi shi ayange a me je, ve me kôndo a tor imôngo sha Yerusaleme?

³⁵Nyian anyom a am kuma anyom akunduanyiin je; me fatyô u fan mkposo u kwagh u a doo shin u a vihi kpa? Wanakiriki wou fa u benden kaven mnyohom ma kwagh u me ya shin u me ma? M shi m fatyô u ungwan imo i nomso kua kasev mba wan atsam kpaa? Ka nyi man wanakiriki wou una gema á seer a seer terem tor icanaa?

³⁶Sar wanakiriki wou ka peren Yordan zan a tor cihôôn tsô; man er nan tor una er a mo doo doo yum nahana?

³⁷Yô, shi de wanakiriki wou a̱ hide, sha er me kpe hen gar wam yô, hen uwar u terem man ngôm. Kpa wanakiriki wou Kimham ngun, a̱ per a terem tor imôngo, yô, za er a na er i doo u la.

³⁸Nahan tor gema kaa er: Kimham una per a mo imôngo, yô, me za er a na er i doo u yô; man hanma kwagh u a sar u her a mo kpaa, me er u un.

³⁹Tsô ior cii per Yordan, tor kpaa per; tor suse Barshilai zwa, ver un doo doo; tsô a hide hen ya na.

⁴⁰Nahan tor per va hen Gilgal, Kimham kpaa per a tor imôngo; ior i Yuda cii kua vegher u Iserael ugen, ve za hide a tor.

⁴¹Tsô ior i Iserael cii va hen tor, ve va kaa a tor er: Inja na nan anmgbianev asev, ior i Yuda, ve koo a we, ve per a tor myer a ior nav cii hen Yordan kua ior i Davidi cii a na imôngo nahana?

⁴²Tsô ior i Yuda cii gema kaa a ior i Iserael er: Ka sha ci u tor a lu anmgbian wase yô; man inja na nan kwagh ne a vihi ne? Se ya ma kwagh u dedoo hen toro? Shin a na se iwua sha ma kwagha?

⁴³Tsô ior mba Iserael gema kaa a ior mba Yuda er: Se mba a aci pue ken tor, se hemba mban a ian sha Davidi a ven; man inja na nan ne lahan se? Kera ka se man iyange se hii u henen u hiden a tor gaa? Kpa kwaghôron u ior mba Yuda, hemba taver a ior mba Iserael.