Read tiv 2 Samuel 8 Bible Online

2 Samuel 8 - tiv bible

2 Samuel 8

¹Tsô ken masejime la Davidi hemba Mbafiliti, ve hingir sha ikev na, man Davidi ngohol tahav mbu gar u tamen sha ikev i Mbafiliti kera.

²A hemba Mbamoabi kpaa, a er ve, ve yav inya, a kar ve sha ikaren; a kar uikaren uhar sha ci u wuan man ikaren môm sha ci u den ve uma. Nahan Mbamoabi hingir sha ikev i Davidi, ve taan un kpandegh.

³Davidi shi hemba Hada-deser wan u Rehobi, tor u Soba, zum u a lu zan sha u una za ngohol tar na u tsuaa hen ifi u Uferati la.

⁴Davidi ngohol un mbaanyinyav dubu man deri utaankaruhar, man mbazanangahar dubu ikundu; Davidi tôndo anyinya a kperan akeke cii igbela i akishiangahar, kpa a tsegha anyinya agen kuma sha akeke deri.

⁵Er Mbashiria mba sha Damaseku va u wasen Hada-deser tor u Soba la yô, Davidi wua Mbashiria ior dubu ikundu kar uhar.

⁶Tsô Davidi maa ver mbautyav mba kuran ken Shiria u Damaseku; Mbashiria hingir sha ikev i Davidi, ve taan un kpandegh. TER na Davidi mhembe hanma ijiir i una za cii.

⁷Davidi kura iperutya i zenaria i ior mba Hada-deser lu a mi la, a va a mi ken Yerusalem.

⁸Ken Beta kua Beroti, agar a Hada-deser la kpaa, tor Davidi kura utogula heregh kpishi.

⁹Zum u Toi, tor u Hamati ungwa er Davidi hemba akumautya a Hada-deser cii yô,

¹⁰nahan Toi tindi wan na Yoram, hen tor Davidi er a̱ za sugh un shi a̱ wuese un kpaa, er a nenge ityav a Hada-deser a hembe un yô; gadia Hada-deser lu or u nôngon ityav a Toi keke. Yoram va na un ikav mbi azurfa man mbi zenaria kua mbi togula kpaa;

¹¹mbila kpaa tor Davidi tsegha mbi sha ci u TER, seer sha azurfa kua zenaria mba a kura ken akuraior a a hemba a la cii,

¹²ka hen Shiria man Moabi man Mbaamon man Mbafiliti man Amaleki je la; kua ishar i Hada-deser, wan u Rehobi, tor u Soba kpaa.

¹³Davidi za iti; er a za hemba Mbashiria shin pev u Bar, a hile yô, a wua ior dubu pue kar anigheni.

¹⁴Shi a ver mbautyav mba kuran ken Edom; ken tar u Edom cii, a ver mbakuran; Mbaedom cii hingir sha ikev i Davidi. TER na Davidi mhembe hanma ijiir i una za cii.

¹⁵Davidi tema tor sha Iserael cii; Davidi ôron ior nav cii ijir sha mimi.

¹⁶Yoabi wan u Seruya lu a akumautya sha ikev; Yehoshafati wan u Ahiludi lu or u ngeren abaver ken takerada;

¹⁷Sadoki, wan u Ahitubi man Ahimeleki, wan u Abiatar, ve lu upristi, Seraia lu orngeren;

¹⁸Benaia wan u Yehoyada lu a Mbakereti man Mbapeleti sha ikev; ônov mba Davidi gema lu atiator.