Read tiv 1 Utor 1 Bible Online

1 Utor 1 - tiv bible

1 Utor 1

¹Davidi bee iyol, a tsa kpishi; vea cir un akondo kpaa, i tsee un iyol ga.

²Tsô mbashiren un kaa a na er: I̱ ker terem tor iniunkwase a̱ wasen tor, a̱ koson un, shi a̱ yaven we sha ikum kpaa, sha u i̱ tsee terem tor iyol.

³Tsô i ker iniunkwase i doon ashe ken tar u Iserael cii, nahan i zua a Abishagi u Shunam, i va na tor.

⁴Lu wankwase u doon ashe tsung; a koson tor, a wasen un dedoo; kpa tor yav a na ga.

⁵Tsô Adoniya wan u Hagiti gba gengese iyol, a kaa er: Mo me ya tor; tsô a ver akeke man mbaanyinyav kua ior akunduahargber mba zan un sha hemen ayem.

⁶Mayange je, ter na vande vihin un ishima ga, sha u pinen un er: Ka nyi u er nahana? A lu or u doon ashe kpekpe kpaa, i vande maren Abesalom a na.

⁷A tume idyu vea Yoabi wan u Seruya kua pristi Abiatar; nahan ve dondo Adoniya, ve wase un.

⁸Kpa pristi Sadoki man Benaia wan u Yehoyada man profeti Natan man Shimei man Rei kua anomaior a a lu a Davidi la, ve yô, ve dondo Adoniya ga.

⁹Tsô Adoniya sôngo iyôngo man ilev mbi kehen hen iwen i Soheleti, i i lu hen En-rogel la, a lôhô anmgbianev nav, ônov mba tor cii, kua Mbayuda cii, mbashiren tor;

¹⁰kpa a lôhô profeti Natan, man Benaia man anomaior kua anngô na Solomon ga.

¹¹Nahan Natan ôr kwagh a Batesheba, ngô u Solomon, a kaa er: Shin u ungwa er Adoniya wan u Hagiti a ye tor man ter wase Davidi a fe ga kpa?

¹²Yô, shi va, m̱ wa u kwagh sha er ú war uma wou kua uma u wan wou Solomon kpaa yô.

¹³Za, za nyôr hen tor Davidi, kaa a na wer: Terem tor, iyange u bum a kpan wou u kwase wer, mimi je, wan wou Solomon una ya tor ken ijime yam, una tema sha ikônough yagh ki torough gaa? Man er nan Adoniya a ye toro?

¹⁴Nenge, shighe u ú lu ôron kwagh a tor ave la je, mo kpaa me va nyôr ken ijime you me taver kwaghôron wou la.

¹⁵Tsô Batesheba nyôr hen tor hen iyou na i tsan, tor bee iyol kumbur kumbur; yô, Abishagi u Shunam lu wasen tor.

¹⁶Nahan Batesheba ngurum sugh tor. Tor kaa er: Ka nyi i sar uwe?

¹⁷A kaa a na er: Terem, iyange u bum a kpan wou u kwase sha ishigh ki TER, Aôndo wou, wer: Mimi je, wan wou Solomon una ya tor ken ijime yam, man una tema sha ikônough yagh ki torough je.

¹⁸Man nenge Adoniya ngu tor; we kpaa, terem tor, u fa ga.

¹⁹A sôngo ibua man ilev mbi kehen kua iyôngo kpishi, a lôhô ônov mba tor cii, man pristi Abiatar kua kurutya Yoabi kpaa; kpa wanakiriki wou Solomon yô, a lôhô un ga.

²⁰We terem tor, ashe a Iserael cii nga sha a we, sha u u̱ kaa ve or u nana tema sha ikônough ki torough ki terem tor ken ijime na yô.

²¹Á lu nahan ga yô, zum u terem tor una yav a uter nav imôngo yô, mo vea wan wam Solomon á gema se sé hingir mbalun a ibo.

²²Tsô er lu ôron kwagh a tor ave la yô, nenge, profeti Natan va nyôr.

²³I kaa a tor er: Profeti Natan ngula. Va ar hen tor yô, a ngurum sha ishigh ki tor, a wa ityough inya.

²⁴Tsô Natan kaa er: Terem tor, u shi kaa wer: Adoniya una lu tor ken ijime yam, man una tema sha ikônough yagh ki torough je kpa?

²⁵Gadia nyian a sen, a sôngo ibua man ilev mbi kehen kua iyôngo kpishi, a lôhô ônov mba tor cii, man mbahemenev mba utyav kua pristi Abiatar; nenge, mba yan akaa, man akaa, sha ishigh nagh, mba kaan er: Tor Adoniya a̱ tsa sha won!

²⁶Kpa mo, wanakiriki wou, man pristi Sadoki, man Benaia wan u Yehoyada kua wanakiriki wou Solomon yô, a lôhô se ga.

²⁷Aluer ka terem tor je, a er kwagh ne yô, nahan u vande pasen mbayev ou or u nana tema sha ikônough ki torough ki terem tor ken ijime na ga.

²⁸Tsô tor Davidi gema kaa er: Yilam Batesheba. Tsô a va hen tor, a va tile sha ishigh ki tor.

²⁹Nahan tor bum, kaa er: Er TER u A yem uma wam ken atsan am cii A lu u uma ne,

³⁰mimi je, er lu m bum a we sha ishigh ki TER, Aôndo u Iserael, mer, wan wou Solomon una ya tor ken ijime yam, man una tema sha ikônough yagh ki torough sha ityough yagh yô, kape me er nyian je la.

³¹Nahan Batesheba ngurum wa ityough inya, a sugh tor, a kaa er: Terem tor Davidi a̱ tsa sha won gbem.

³²Shi Davidi kaa er: Yilam nen pristi Sadoki, man profeti Natan, kua Benaia wan u Yehoyada. Tsô ve za va sha ishigh ki tor.

³³Tor kaa a ve er: Kua nen a mbayev mba ter wen, penda nen wan wam Solomon sha alfadari wam iyol yam, za nen a na shin Gihon;

³⁴pristi Sadoki man profeti Natan ve̱ za shighe un mkurem keregh a̱ hingir tor u Iserael; tôngo nen ikor kpaa, kaa nen ner: Tor Solomon a̱ tsa sha won!

³⁵Nahan yô, dondo nen sha a na, kôndo nen, a̱ za tema sha ikônough yagh ki torough; gadia una hingir tor sha ityough yagh; man m ver un mer, a̱ tema orhemen u Iserael kua Yuda cii.

³⁶Tsô Benaia wan u Yehoyada, gema kaa a tor er: Amen, Ter, Aôndo u terem tor, A̱ rumun nahan.

³⁷Er TER lu a terem tor nahan, kape shi A̱ lu a Solomon la, A̱ maa ikônough nagh ki torough ki̱ hemba ikônough ki torough ki terem tor Davidi icivir.

³⁸Nahan pristi Sadoki man profeti Natan man Benaia wan u Yehoyada kua Mbakereti man Mbapeleti ve sen ve za penda Solomon sha alfadari u tor Davidi, ve za a na shin Gihon.

³⁹Tsô pristi Sadoki tôô korough ku mkuregh ken tenti, shighe Solomon. Ve tôngo korough; ior cii kaa er: Tor Solomon a̱ tsa sha won!

⁴⁰Ior dondo sha a na, kôndo, ior gba tôngon amar ember, saan ve iyol kpishi je, inya tenger sha acin a ve.

⁴¹Tsô Adoniya kua ior mba i lehe la cii, ve ungwa zum u ve bee kwaghyan la. Man zum u Yoabi ungwa korough yô, a kaa er: I er nan man ayôôso a lu ken gar yum nahana?

⁴²Ngur ôron kwagh nahan yô, nenge, Yonatan wan u pristi Abiatar za va; tsô Adoniya kaa er: Nyôr je, gadia we u ngu ormimi je, u ngu van a loho u dedoo kpaa.

⁴³Kpa Yonatan gema kaa a Adoniya er: Mimi je, ter wase, tor Davidi ver Solomon tor;

⁴⁴shi tor tindi pristi Sadoki man profeti Natan man Benaia wan u Yehoyada kua Mbakereti man Mbapeleti a na imôngo, ve na un alfadari u tor je a henda.

⁴⁵Pristi Sadoki kua profeti Natan ve shighe un mkurem shin Gihon er a̱ tema tor; ve mough keela, ve kôndo a iember je, gar cii hingir yagh yagh. Ka ayôôso a ne ongo je la.

⁴⁶Solomon kpaa za tema sha ikônough ki torough.

⁴⁷Shi mbayev mba tor va sha u va veren ter wase tor Davidi doo doo kpaa, ve kaa er; Aôndo wou A̱ civir iti i tor Solomon i̱ hemba iti you, A̱ er ikônough nagh ki torough ki̱ hemba ki you; tsô tor kpaa suwa ityough inya er msen sha gambe na.

⁴⁸Shi tor kaa nahan er: I̱ wuese TER, Aôndo u Iserael, u A ne or u teman sha ikônough yagh ki torough nyian ne, m nenge sha ashe am je.

⁴⁹Tsô ior mba Adoniya lôhô ve la cii, cier ve iyol, ve hembe, hanma or kôr gbenda u nan.

⁵⁰Adoniya kpaa cia Solomon; tsô a mough a za kôr ave sha akoratseegh.

⁵¹Nahan i za kaa Solomon er: Nenge, Adoniya ngu cian tor Solomon; gadia nenge a kôr ave sha akoratseegh, ngu kaan er: Tor Solomon a̱ vande bumun a mo er una wua wanakiriki na sha sanker ga.

⁵²Tsô Solomon kaa er: Aluer una lu ormimi yô, ma gwarce na una gba inya ga; kpa aluer á zua un a ifer yô, una kpe.

⁵³Tsô tor Solomon tindi, i za hungwa a na sha atse a nanden nagh sha mi. Nahan a va a va gure a sugh tor Solomon. Tsô Solomon kaa a na er: Gba yemen hen ya wou tsô.