Read tiv 1 Utor 15 Bible Online

1 Utor 15 - tiv bible

1 Utor 15

¹Ka sha inyom i sha pue kar anigheni i tor Yerobiam wan u Nebati la, Abiyam ya tor sha Yuda ye.

²A tema tor ken Yerusalem anyom atar, iti i ngô na er, Maaka, wan u Abishalom.

³A zenden sha igbenda i asorabo a ter na lu vande eren a na cii; ishima na lu jighilii sha ishigh ki TER, Aôndo na, er ishima i Davidi ter na nahan ga.

⁴Nahan kpaa, sha ci u Davidi yô, TER, Aôndo na, na un imenger ken Yerusalem, sha u veren wan na ken ijime na, man u taver Yerusalem kpaa;

⁵gadia Davidi er kwagh u jighilii sha ishigh ki TER, a undu ma kwagh u A kaa un ga, sha ayange a uma na cii, saa di sha kwagh u Uria Orhiti la tsô.

⁶Ityav lu hen atô u Rehobiam vea Yerobiam sha ayange a uma na la cii.

⁷Aerenakaa a Abiyam agen, man akaa a a er cii yô, i nger a ken ruamabera u abaver a utor mba Yuda la gaa? Ityav lu hen atô u Abiyam vea Yerobiam.

⁸Tsô Abiyam yav a uter nav imôngo, i ii un ken gar u Davidi; wan na Asa gema tema tor sha ityough nagh.

⁹Ka sha inyom i sha ikundu i Yerobiam tor u Iserael la, Asa ya tor sha Yuda ye.

¹⁰A tema tor ken Yerusalem anyom akunduahar kar môm; iti i ngô na er Maaka, wan u Abishalom.

¹¹Asa eren kwagh jighilii sha ashe a TER, er Davidi ter na lu er nahan.

¹²A dugh mba lun inja er Mbasodom nahan, ken tar la kera, shi a dugh akombo a uter nav lu er la kera cii.

¹³A dugh ngô na Maaka ken nagbaa kera, gadia a er eev mbu ndôhôr ishima sha ci u Ashera; Asa vihi eev nav mbula kera, nande mbu shin uwagh u Kideron.

¹⁴Kpa i vihi ajiir a taven sha la ga; nahan kpaa ishima i Asa lu vough sha ishigh ki TER sha ayange a uma na cii.

¹⁵Akaa a ter na lu tsegha, kua a un iyol na kpaa tsegha la: azurfa man zenaria kua ikav kposo kposo, a va ver a ken iyou i TER.

¹⁶Ityav lu hen atô u Asa vea Baasha tor u Iserael sha ayange a uma ve cii.

¹⁷Baasha tor u Iserael mough ityav a Yuda, a maa Rama, sha u una yange hanma or nana̱ de dugh, shin nana̱ nyôron hen Asa tor u Yuda ga.

¹⁸Tsô Asa tôô azurfa kua zenaria u a shi ken ayou a koson akaa ker, a iyou i TER la cii, kua a ken ayou a koson akaa ker, a iyou i tor la kpaa, a na sha ikev i mbayev nav; tor Asa tindi mbi hen Benhada, wan u Taberimon, wan u Heshion, tor u Shiria, u a lu ken Damaseku la, a kaa er:

¹⁹Ikuryan ngi hen atô wam a we, er i lu hen atô u terem a teru nahan; nenge, m tindi u a iwua sha azurfa kua zenaria; yô, za bunde ikuryan you a Baasha tor u Iserael la, sha u a̱ mough hen mo kera a̱ dem yô.

²⁰Nahan Benhada ungwa imo i tor Asa, tsô a tindi mbahemenev mba akumautya na er ve̱ za nôngo ityav a agar a Iserael; a hembe Iyon man Dan man Abel-bete-maaka man Kinereti cii kua tar u Nafetali cii.

²¹Tsô er Baasha ungwa nahan yô, a de u maan Rama, a za tema ken Tirsa.

²²Tsô tor Asa lôhô Yuda cii, i tsegha ma or môm ga, ve kura awen a Rama man ikpande i Baasha maa a mi la, nahan tor Asa za maa Geba u Benyamin man Misepa a min.

²³Aerenakaa a Asa agen, man tahav nav cii kua akaa a a er cii man agar a a maa cii yô, i nger a ken ruamabera u abaver a utor mba Yuda la gaa? Kpa er a va bee iyol yô, angev kôr un shin angahar.

²⁴Tsô Asa yav a uter nav imôngo, i ii un ken gar u ter na Davidi a uter nav imôngo; wan na Yehoshafati gema tema tor sha ityough nagh.

²⁵Nadabi, wan u Yerobiam, ya tor sha Iserael sha inyom i sha uhar i Asa tor u Yuda la, a tsa tor anyom ahar sha Iserael.

²⁶A er iferkwagh sha ishigh ki TER, a zenden sha gbenda u ter na, a eren kwaghbo na la, u a ne Iserael kpaa a er un la.

²⁷Kpa Baasha wan u Ahiya u hen ya u Isakar, lu keren un a ku; Baasha wua un hen Gibeton u a lu sha ikev i Mbafiliti la; gadia Nadabi man Iserael cii haa afo kase Gibeton, nôngo ityav a na.

²⁸Sha inyom i sha utar i Asa tor u Yuda la, Baasha wua un, gema tema tor sha ityough nagh.

²⁹Tsô er a ya tor yô, a tim ya u Yerobiam cii; a de Yerobiam ma or u ôôn môm ga, zan zan a tim un cii, sha imo i TER, i wanakiriki Na Ahiya Orshilo kaa la;

³⁰sha ci u asorabo a Yerobiam a er a la, man a ne Iserael u eren a kpaa la; man sha ci u mbam u a bam TER, Aôndo u Iserael, la.

³¹Aerenakaa a Nadabi agen, man akaa a a er cii yô, i nger a ken ruamabera u abaver a utor mba Iserael la gaa?

³²Ityav lu hen atô u Asa vea Baasha tor u Iserael sha ayange ve la cii.

³³Sha inyom i sha utar i Asa tor u Yuda la, Baasha wan u Ahiya ya tor sha Iserael cii, ken Tirsa; a tema tor anyom ikundu kar anyiin.

³⁴A er iferkwagh sha ishigh ki TER, a zenden sha gbenda u Yerobiam, a eren isholibo na la, i a ne Iserael kpaa a eren i la.