Read tiv 1 Utor 18 Bible Online

1 Utor 18 - tiv bible

1 Utor 18

¹Tsô ayange nga kar kpishi yô, imo i TER va hen Eliya sha inyom i sha utar la, kaa er: Za, za ande hen Ahaba; yô Mo kpaa Me nôô ura shin tar.

²Nahan Eliya za er una za ande hen Ahaba. Yô, ijen taver ken Samaria.

³Tsô Ahaba yila Obadia or u nengen sha ya na. Obadia yô, lu or u cian TER tsung je;

⁴gadia zum u Yesebel lu timin uprofeti mba TER la yô, un Obadia tôô uprofeti deri, yer ve akunduahargber, akunduahargber, ken bar, a koson ve sha kwaghyan kua mngerem.

⁵Yô Ahaba kaa a Obadia er: Zende ken tar, za hen ihwembe cii kua hen iwagh cii kpaa, alaghga sé zua a toho, sé koso anyinya kua mbaalfadari ve̱ war, sha er uzendenya asev ve̱ de saan cii ga yô.

⁶Nahan ve pav tar, ve zenden ker; Ahaba kôr gbenda ugen un mtswen, Obadia kpaa kôr di gbenda ugen un mtswen.

⁷Er Obadia lu sha gbenda la yô, nenge, Eliya va kohol un; kav un yô, a gure a kuma ishigh inya, a kaa er: Ka we, terem Eliya?

⁸A kaa a na er: Ka mo; yô, hide za kaa teru wer, Eliya ngu heen.

⁹Kpa a pine er: Ka nyi kwaghbo m er, man u ne wanakiriki wou sha ikev i Ahaba wer, a̱ wuama?

¹⁰Mimi je, er TER, Aôndo wou, A lu u uma ne, ma ikurior shin ma tartor henpe terem a de tindin u keren we yô, ngu ga; zum u ka vea kaa un er: Ngu heen ga yô, a kaa a tartor kua ikurior la, ve̱ bum er ve zough a we ga yô.

¹¹Man hegen, u ngu kaan wer za, za kaa teru wer: Nenge, Eliya ngu heen.

¹²Tsô aluer me karen hen we kera yô, Jijingi u TER Una tôô u, Una yem a we henpe m fe ga yô, nahan zum u me za kaa Ahaba man una fan ityô u zuan a we ga yô, una wuam je. Kpa mo wanakiriki wou m cia TER, er m lu iyev je.

¹³Shin i kaa terem kwagh u m er zum u Yesebel wua uprofeti mba TER la, m yer uprofeti mba TER ior deri ken bar, akunduahargber, akunduahargber, m koson ve sha kwaghyan kua mngerem ga ase?

¹⁴Man hegen yô, u kaa wer, za, za kaa teru wer: Nenge, Eliya ngu heen; yô, una wuam.

¹⁵Kpa Eliya kaa er: Er TER u akum a Sha u m til sha ishigh Nagh A lu u uma ne, mimi je, me ande her a na nyian.

¹⁶Tsô Obadia mough za kohol Ahaba, a ôr un nahan. Ahaba kpaa za, er una za kohol Eliya.

¹⁷Tsô Ahaba za nenge a Eliya yô, Ahaba kaa a na er: Ka we, or u u nzughul a Iserael yum ne ga?

¹⁸A gema a kaa er: Ka mo m nzughul a Iserael ga, kpa ka we kua ya u teru, sha er u undu atindi a TER, u gem u dondo sha Ubaal yô.

¹⁹Hegen yô, tindi i̱ za kohol mo Iserael cii sha uwo u Karmel man uprofeti mba Baal deri unyiin man akunduahargber la, kua uprofeti mba Ashera deri unyiin mba ve ye kwagh sha tebul u Yesebel la.

²⁰Tsô Ahaba tindi i za yila Mbaiserael cii, shi a kohol uprofeti sha uwo u Karmel.

²¹Tsô Eliya kporom hen ior cii, a kaa er: Shi nan je, man né de u lun asema ahara? Aluer TER A lu Aôndo yô, dondo nen Un; a lu Baal yô, dondo nen un. Kpa ior bugh zwa a na ga.

²²Tsô Eliya kaa a ior er: Ka mo tswen m shi profeti u TER ye; kpa uprofeti mba Baal yô, mba deri unyiin man akunduahargber.

²³Yô, ve̱ na se anomabua ahar; ve̱ tsuwa nombua môm sha ci ve, ve̱ sôngo, ve̱ bur, ve̱ penda sha ikon, kpa ve̱ de we usu ga; mo me sôngo bua ugen me penda di sha ikon, kpa me wa usu ga.

²⁴Yila nen iti i aôndo wen, mo me yila iti i TER; yô, Aôndo u Una rumun sha usu la, ka Un A lu Aôndo ye. Tsô ior cii gema kaa er: I ôr kwagh ne doo tsô.

²⁵Nahan Eliya kaa a uprofeti mba Baal er: Tsuwa nen ase bua môm sha ci wen, vande sôngon nen un; gadia ne, ne mba kpishi; yô, yila nen iti i aôndo wen, kpa de we nen usu ga.

²⁶Tsô ve kôr bua u i na ve la, ve sôngo, ve gba yilan iti i Baal; hii pepe je zan zan iyange sha tembe, ve lu kaan er: Baal shi rumun se ga! Kpa imo lu ga, mô bugh zwa ga. Tsô ve gba tsuwen hen atse a ve ta la.

²⁷Tsô ka kom er iyange sha tembe nahan yô, Eliya gba nahan ve tar, kaan er: Genger nen imo, gadia un ka aôndo ga; alaghga ngu henen kwagh, shin a ta ibalegh, shin a yem zende, shin alaghga ngu yaven; saa á nder un.

²⁸Nahan ve genger imo ve tôndo ayol a ve avav sha ahô kua awange, sha aeren a ve la, zan zan awambe gba duen ve iyol.

²⁹Tsô, er iyange kpeese yô, ve gba ôron kwaghôron u profeti zan zan shighe u nan nagh ku aikighe la; kpa imo lu ga, mô kpaa bugh zwa ga, mô wa iko kpaa ga.

³⁰Tsô Eliya kaa a ior cii er: Kporom nen her a mo; tsô ior cii kporom her a na. Tsô a sôr atse a TER a nanden nagh sha mi a i yôhôl a la.

³¹Eliya tôô awen pue kar ahar sha iyenge i ikwe i ônov mba Yakob, u imo i TER lu va her a na la kaa er, á yila iti you er Iserael.

³²A ta atse a nanden nagh sha mi ken iti i TER sha awen la; a time ihungwa wa atse la atô, gbangese kuma uikaren mba samegh uhar.

³³A tar ikon, a bur nombua, a penda sha ikon la. A kaa er: Iv nen uzwar mba mngerev unyiin; yô, haa nen sha nagh ku nanden kun kua sha ikon ne.

³⁴A kaa er: Er nahan i̱ kuma kwa har; tsô ve er nahan kuma kwa har. Shi a kaa er: Er, i̱ kuma kwa tar; ve er nahan kuma kwa tar je.

³⁵Nahan mngerem ningir atse la; a iv mngerem shin ihungwa la kpaa.

³⁶Tsô sha shighe u nan nagh ku aikighe la, profeti Eliya kporom, kaa er: TERE, Aôndo u Aberaham man u Isaka kua u Iserael, na i̱ fa nyian ken igbar je er We U lu Aôndo ken Iserael, man mo kpaa m lu wanakiriki Wou, m er akaa ne cii sha imo You yô.

³⁷Ungwam, TERE, ungwam, sha u ior mban ve̱ fa, er We TER, U lu Aôndo je, man U gema ve asema hen a We kpaa ye.

³⁸Tsô usu u TER sen, hia nagh ku nanden, man ikon man awen kua vuulevu, ndiar mngerem ma shin ihungwa kpaa.

³⁹Zum u ior cii ve nenge nahan yô, ve gure inya ve kuma ishiv inya, ve kaa er: Ka TER A lu Aôndo ye. Ka TER A lu Aôndo ye.

⁴⁰Nahan Eliya kaa a ve er: Kôr nen uprofeti mba Baal, mô ve môm a̱ de waren ga. Tsô ve kôr ve, Eliya sen a ve hen kpeuwagh u Kishon, za wua ve heregh.

⁴¹Tsô Eliya kaa a Ahaba er: Kôndo, za ya kwagh, ma kwagh, gadia ihuran i zegeura ngi.

⁴²Nahan Ahaba kôndo sha u za yan kwagh shi man kwagh kpaa. Kpa Eliya kar za unde sha ityough ki Karmel; a gure inya, a kuma ishigh hen anu na.

⁴³A kaa a wanakiriki na er: Kôndo za nenge vegher u shin zegemnger. Tsô a kôndo, a za jinge, a kaa er: Ma kwagh ngu ga. A kaa er: Za, zan zan kuma kwa taankaruhar.

⁴⁴Tsô sha shighe u kwa taankaruhar la, a kaa er: Nenge, anibeen ngu duen shin zegemnger kpuaa er ikevwe i or nahan. Nahan a kaa er: Mough, za kaa Ahaba wer, sôr ikyekye you, sen sha er ura ua yisa u ga yô.

⁴⁵Tsô tem dôghôô yô, kwavaôndo ile dimii sha abeen kua ahumbe, zegeura gba. Tsô Ahaba henda ikyekye, yem ken Yesereel.

⁴⁶Uwegh ku TER lu sha Eliya, a fiir ikondo shin iwenge, a yevese a kar Ahaba sha hemen zan zan hen hunda u Yesereel.