Read tiv 1 Utor 2 Bible Online

1 Utor 2 - tiv bible

1 Utor 2

¹Tsô ayange nga sôôn a Davidi una kpe yô, a ôr kwagh a wan na Solomon, a kaa er:

²M ngu zan sha gbenda u ior mba sha won cii; yô, taver ishima, tese iyol you er u lu nomsoor yô;

³ver ishima sha imo i TER, Aôndo wou, zaan sha igbenda Na, ver ishima sha akaawan a Na man atindi a Na man akaaôron a Na sha u ú lu a iveren ken akaa a ú er cii, man sha hanma ian i wea geman cii;

⁴sha u TER A̱ kure kwaghôron Na, u A ôr sha a mo la er: Aluer ônov ou vea ver ishima sha igbenda ve, sha u vea zenden sha ishigh Yagh sha mimi a asema ve cii kua uuma vev cii kpaa yô, ú ban a or u teman sha ikônough ki torough ki Iserael ga.

⁵Man shi u fa kwagh u Yoabi wan u Seruya lu erem yô; ka kwagh u lu er a mbahemenev uhar mba akumautya a Iserael la, ka Abiner wan u Ner man Amasa wan u Yeter, mba a wua ve a haa awambe a utya sha ayange a bem, nahan awambe a utya haa un sha kwange na u shin iwenge na, man shi sha akôv a shin angahar a na la.

⁶Yô, er a na sha kwaghfan wou, de rumun ityough nagh ki ivuugh ki̱ senen shin Sheol bem bem ga.

⁷Kpa er a ônov mba Barshilai, Orgileadi la, dedoo; ve̱ lu ken mbayan kwagh a we imôngo je; gadia kape iyange ve va her a mo, zum u m lu yevese anngôu Abesalom la.

⁸Nenge, Shimei, wan u Gera, Orbenyamin u ken Bahurim ngu a we, un u lu tuhwam boutyuhwan sha iyange i m lu zan sha Mahanaim la; kpa a va keghem gbenda hen Yordan, nahan m bum a na sha ishigh ki TER m kaa mer, me wua u sha sanker ga.

⁹Kpa hegen yô, de kera gbe den un nahan ga, gadia we u ngu or u fan kwagh je; nahan yô, gba fan kwagh u a doo u ú er un tsô, hungwa a ityough nagh ki ivuugh shin Sheol a awambe sha mi.

¹⁰Tsô Davidi yav a uter nav imôngo, i ii un ken gar u Davidi.

¹¹Ayange a Davidi lu tor sha Iserael yô, kuma anyom akunduahar; a tema tor ken Heberon anyom ataankarahar, lu tor ken Yerusalem anyom ikundugber kar atar.

¹²Nahan Solomon tema sha ikônough ki torough ki ter na Davidi; tor na taver tsung.

¹³Tsô Adoniya wan u Hagiti va hen Batesheba ngô u Solomon. A pine un er: U va ka bem kpa? A kaa er: Ka bem.

¹⁴A gema a kaa er: Kwagh gbam u ôron a we. A kaa er: Ôr ase.

¹⁵A kaa er: U fa tor lu u wam, Iserael cii kpaa lu veren ashe sha a mo er m̱ ya tor; kpa kwagh va gema, tor hingir u anngôm; gadia ka TER A ne un ye.

¹⁶Man hegen yô, senegh agh a we yô, ka di kwagh môm tsô, de nyumum ga. A kaa a na er: Ôr ase.

¹⁷A kaa er: Shi ôrom kwagh a tor Solomon (gadia una nyiman imo you ga), a̱ nam Abishagi u Shunam a̱ lu kwase wam.

¹⁸Batesheba kaa er: Ka sha mi; me ôr tor kwagh wou ne.

¹⁹Tsô Batesheba za hen tor Solomon, sha u za ôron un kwagh u Adoniya la. Nahan tor mough sha, za kohol un, sugh un, a ngurum inya, tsô a hide a tema sha ikônough nagh ki torough, shi a kaa, i̱ ver ikônough sha ci u ngô u tor; tsô a tema un ken uwegh ku yanegh.

²⁰Nahan a kaa a tor er: M ngu sônon we ankwagh u kiriki tsô, de nyumum ga. Tor kaa er: Gba sônon tsô ngôm; gadia me nyume u ga.

²¹A kaa er: Rumun, i̱ na anngô u Adoniya Abishagi u Shunam a̱ lu kwase na.

²²Tsô tor Solomon gema kaa a ngô na er: Ka nyi u keren Abishagi u Shunam sha ci u Adoniya? Yô, ker un ase tor kpaa; gadia ka anngôm u vesen; ker sha ci na man pristi Abiatar kua Yoabi wan u Seruya kpaa.

²³Tsô tor Solomon bum sha ishigh ki TER kaa er: Aôndo A̱ er a mo nahan shi i̱ hemba nahan kpaa, aluer Adoniya una zua a ku sha kwaghôron ne ga yô.

²⁴Hegen yô, er TER A lu u uma ne, u A verem, A pendem sha ikônough ki torough ki terem Davidi, man A nem ya sha ityendezwa Na la, mimi je, á wua Adoniya nyian ne.

²⁵Tsô tor Solomon tindi Benaia wan u Yehoyada; a za ta num sha a na, wua un.

²⁶Shi tor kaa a pristi Abiatar er: Yem ken Anatoti, ken tar wou, gayô, u kuma ku, kpa me wua u hen shighe ne ga, gadia u tôô areki u Ter AÔNDO sha ishigh ki terem Davidi je, man shi u ya ican a terem ityô kpaa.

²⁷Kape Solomon zenda Abiatar dugh un ken tom u pristi u TER la; sha er kwaghôron u TER lu kaa sha ya u Eli ken Shilo la, a̱ kure sha mi vough.

²⁸Tsô Yoabi ungwa agwa (gadia Yoabi ta ken Adoniya, kpa iyange ta ken Abesalom ga), nahan Yoabi yevese za hen tenti u TER, za kôr ave sha akoratseegh.

²⁹Tsô i va kaa tor Solomon er: Yoabi yevese za hen tenti u TER; nenge, ngu hen atse a nanden nagh sha mi. Nahan Solomon tindi Benaia wan u Yehoyada, kaa er: Za, za wua un.

³⁰Tsô Benaia va hen tenti u TER, va kaa a na er: Tor kaa er, u̱ due. Kpa a kaa er: Ei, me kpe heen. Nahan Benaia hide va ôr tor er: Kape Yoabi a gem a kaam ne.

³¹Tor kaa a na er: Er, er a kaa nahan, wua un, za ii, sha er ú kar a ike i awambe a Yoabi lu haa a ityôikaa ga la, sha a mo kua ya u terem kera yô.

³²TER A̱ hide a awambe na sha ityough nagh, sha ci u a wua ior ihiar i i hemba un perapera kua inja i doon kpaa yô, a wua ve sha sanker, terem Davidi kpaa fa ga, lu Abiner wan u Ner, orhemen u ikumutya i Iserael man Amasa wan u Yeter orhemen u ikumutya i Yuda.

³³Nahan awambe ve a̱ hide sha ityough ki Yoabi man sha tsombor na gbem; kpa Davidi man tsombor na man ya na kua ikônough nagh ki torough yô, vea lu a bem u TER gbem sha won.

³⁴Tsô Benaia wan u Yehoyada kôndo za ta num sha a na, a wua un, i ii un hen ya na iyol na, ken desereti.

³⁵Tsô tor ver Benaia wan u Yehoyada orhemen u ikumutya sha ityough nagh; man pristi Sadoki yô, tor ver un sha ityough ki Abiatar.

³⁶Shi tor tindi er i̱ yila Shimei; a kaa a na er: Maa ya wou ken Yerusalem, tema ker, de kera duen ker zaan mape ga.

³⁷Gadia iyange i ú due, ú per uwagh u Kideron yô, fa dedoo, ú kpe keng, awambe a ou aa lu sha ityough you.

³⁸Shimei gema kaa a tor er: Mkaanem ou doo; er terem tor a kaa yô, kape wanakiriki na una er je la. Nahan Shimei tema ken Yerusalem ayange kpishi.

³⁹Tsô anyom nga kar atar yô, mbayev mba Shimei uhar yevese yem hen Akishi wan u Maaka, tor u Gati. Tsô i va kaa Shimei er: Nenge, mbayev ou mba ken Gati.

⁴⁰Nahan Shimei mough kange jaki na shidi, za ken Gati hen Akishi, sha u za keren mbayev nav; Shimei za za kua a mbayev nav ken Gati hide a ve.

⁴¹Nahan i va kaa Solomon er: Shimei due ken Yerusalem za ken Gati, a shi a hide.

⁴²Tsô tor tindi i za yila Shimei, a kaa a na er: Iyange m kaa u, u bum sha ishigh ki TER, m kaa a we je mer: Fa doo doo, iyange i ú za zende mape yô, ú kpe kpee gaa? U kaa a mo je wer: Mkaanem ou mara doo; m ungwa.

⁴³Man er nan u we iko sha mbum u TER man sha kwagh u m kaa u la ga?

⁴⁴Tor shi kaa a Shimei er: U fa aferakaa cii a ishima you kpaa i fe yô, a u er a terem Davidi la, yô, TER Una hide a ifer you sha ityough you.

⁴⁵Kpa tor Solomon yô, una lu a iveren ikônough ki torough ki Davidi kpaa kia lu dông sha ishigh ki TER gbem.

⁴⁶Tsô tor kaa Benaia wan u Yehoyada; nahan a due a za ta num sha a na, a wua un. Nahan tor taver sha ikev i Solomon.