Read tiv 1 Utor 22 Bible Online

1 Utor 22 - tiv bible

1 Utor 22

¹Anyom atar je, ityav kera lu hen atô u Shiria a Iserael ga.

²Tsô ken inyom i sha utar la, Yehoshafati tor u Yuda va hen tor u Iserael.

³Tsô tor u Iserael pine mbayev nav er: Ne fa er Ramoti-gileadi a lu u wase kpa? Nahan kpaa se mba ving se ngohol un sha ikev i tor u Shiria ga!

⁴Nahan a pine Yehoshafati er: Ú shi za a mo imôngo sha u za nôngon ityav a Ramoti-gileadi kpa? Yehoshafati kaa a tor u Iserael er: Mo m ngu er we nahan, ior av kpaa mba er ior ou yô, anyinya am kpaa nga er anyinya ou yô.

⁵Yehoshafati shi kaa a tor u Iserael er: Ma u shi vande pinen imo i TER.

⁶Tsô tor u Iserael kohol uprofeti, ve lu er deri unyiin nahan, a pine ve er: M̱ za, m̱ za nôngo ityav a Ramoti-gileadi, shin m̱ de ze ga? Ve kaa er: Gba zan tsô, gadia TER Una na un sha ikev i tor.

⁷Kpa Yehoshafati kaa er: Profeti u TER ugen ngu heen, er sé pine nan gaa?

⁸Tor u Iserael kaa a Yehoshafati er: Or shi môm u sé pine nan imo i TER, ka Mikaia wan u Imla; kpa m kôr un ihom, gadia er ma kwaghôron u profeti u dedoo sha a mo ga, saa kwaghbo tseegh. Kpa Yehoshafati kaa er: Tor a̱ de kaan nahan ga.

⁹Nahan tor u Iserael yila dugwer kaa er: Za, za va a Mikaia wan u Imla fefa.

¹⁰Tsô tor u Iserael vea Yehoshafati tor u Yuda ve tema, hanmô nan tema sha ikônough ki torough ki nan, a iwuhanev mbi torov iyol, hen vande u gbiren alakema hen hunda u nyôron ken Samaria la; uprofeti cii lu ôron kwaghôron u profeti sha ishiv vev.

¹¹Sedekia wan u Kenaana er akor a iyôô, a kaa er: TER ngu kaan nahan er: Ka sha a né mgbegha Mbashiria zan zan vea tim ye.

¹²Kape uprofeti cii ve ôr la, ve kaa er: Gba zan hen Ramoti-gileadi tsô, ú za hemba; gadia TER Una na un sha ikev i tor.

¹³Ortyom u a za u za yilan Mikaia la, kaa a na er: Nenge, uprofeti cii mba haan zwa môm, mba pasen kwagh u doon tor; yô, kwaghôron wou a̱ lu er kwaghôron u mô ve nahan, za ôr kwagh u dedoo.

¹⁴Kpa Mikaia kaa er: Er TER A lu u uma ne, kwagh u TER Una kaam yô, ka un me ôr ye.

¹⁵Ve hen tor yô, tor pine un er: Mikaia, se̱ za hen Ramoti-gileadi, se̱ za nôngo ityav shin se̱ de ze ga? A kaa a na er: Gba zan tsô, ú za hemba; TER Una na un sha ikev i tor.

¹⁶Tsô tor kaa a na er: Ka kwa me je man me na u ú bum wer u gba ôron mo kwagh ugen ga, saa u mimi tseegh ken iti i TERE?

¹⁷Nahan a kaa er: M nenge Iserael cii hingir kughukuku sha iwo er iyôngo i i lu a orkuran ga yô; TER kaa er: Mban mba a ter ga; nahan hanmô ve, nana̱ hide hen ya u nan bem bem.

¹⁸Tsô tor u Iserael kaa a Yehoshafati er: Ashen m kaa a we je mer, una ôrom kwagh u doon ga, saa u bo tsô gaa?

¹⁹Shi a kaa er: Nahan yô, ungwa ase imo i TER; m nenge TER tema sha ikônough Nagh ki torough, akum a Sha cii tile Un ken uwegh ku yanegh kua ku imesegh kpaa.

²⁰Tsô TER pine er: Ka an nana za mee Ahaba er a̱ za ken num a̱ za kpe hen Ramoti-gileadi ase? Tsô ugen ôr kwagh nahan, ugen ôr di kwagh ugen kposo.

²¹Nahan jijingi ugen due tile sha ishigh ki TER, kaa er: Mo me za mee un.

²²TER pine un er: Ka sha nyi? A kaa er: Me due, me hingir jijingi u aiegh ken zwa u uprofeti nav cii. Tsô A kaa er: We, ú mee un, ú hemba un kpaa; za ase, za er nahan.

²³Yô, nenge TER ver jijingi u aiegh ken zwa u uprofeti ou mban cii; man TER gema ôr kwagh u bo sha a we.

²⁴Tsô Sedekia wan u Kenaana kporom, ta Mikaia sambe sha henge, kaa er: Ka sha hanma gbenda man jijingi u TER A dugh her a mo kera, A za er kwagh a wee?

²⁵Mikaia kaa er: Yô, sha iyange la ú nenge, zum u ú nyôr ken iyou i ker atô sha u yeren la.

²⁶Tsô tor u Iserael kaa er: Kua nen a Mikaia hide nen a na hen orkurangar, Amon, man hen wan u Yoashi,

²⁷kaa nen ner, tor kaa nahan er: Wa nen or ne ken gaadi, koso nen un sha kwaghyan u ican kua mngerem ma icanem kpaa, zan zan me kar hiden bem bem.

²⁸Tsô Mikaia kaa er: Aluer wea hide bem bem yô, TER ôr kwagh a mo ga. Shi a kaa er: Ne ior cii ungwa nen.

²⁹Nahan tor u Iserael kua Yehoshafati tor u Yuda ve gba kôndon zan hen Ramoti-gileadi.

³⁰Tsô tor u Iserael kaa a Yehoshafati er: Me gema iyol, man me nyôr ken utya ye; kpa we yô, haa ikav mbi torov. Nahan tor u Iserael gema iyol, nyôr ken utya.

³¹Yô, tor u Shiria wa mbahemenev mba sha akeke a na ikundugber kar uhar tindi er: De nenge nen ityav a mbakiriki shin mbavesen kpaa ga, saa tor u Iserael tseegh.

³²Tsô er mbahemenev mba sha akeke nenge a Yehoshafati yô, ve kaa er: Ka tor u Iserael je ne; nahan ve gema er vea nôngo ityav a na; kpa Yehoshafati genger imo.

³³Er mbahemenev mba akeke mbala za kav er i lu tor u Iserael ga yô, ve hide, ve de u zendan un ijime.

³⁴Tsô orgen henda ada gba keren ivaan abu tsô, za ta tor u Iserael hen ijuwan i ikav mbi utyav mbi yisan iyol a mi la; nahan a kaa a or u kôôm ikyekye na la er: Gema, hide ijime, due a mo ken utya kera, gadia i vihim iyol.

³⁵Ityav seer taver sha iyange la; tor yier shin ikyekye, a ver ishigh ken Mbashiria; iyange i been yô, a maa a kpe; awambe a a due sha ivav la haa shin ikyekye.

³⁶Er iyange i been nahan yô, i gba yôôn hen akumautya cii, er: Hanma or nana̱ hide ken gar u nan, hanma or nana̱ hide ken tar u nan.

³⁷Kape tor kpe la, i va a na ken Samaria, maa i ii tor ken Samaria.

³⁸Er ve ôô ikyekye la hen ityungu i Samaria la, iwa gba ndiar awambe a na (mbaagbaga di lu ôôn iyol her) sha imo i TER i A kaa yô.

³⁹Aerenakaa a Ahaba agen man akaa a a er cii man iyou i a maa i sha anyinor la, kua agar a a maa yô, i nger a ken ruamabera u abaver a utor mba Iserael la gaa?

⁴⁰Nahan Ahaba yav a uter nav imôngo; wan na Ahashia gema tema tor sha ityough nagh.

⁴¹Yehoshafati wan u Asa ya tor sha Yuda sha inyom i sha unyiin i Ahaba tor u Iserael la.

⁴²Yehoshafati lu anyom ikundugber kar ataan zum u a ya tor la; a lu tor ken Yerusalem anyom ikundu kar ataan. Iti i ngô na er Asuba, wan u Shilhi.

⁴³A zende sha gbenda u ter na Asa cii jighilii; a kaha a undu u ga, lu eren kwagh u vough sha ishigh ki TER; nahan kpaa i vihi ajiir a taven sha la ga; ior lu nan nagh ku sôngon shi lu nanden kwaghhumandoon sha ajiir a taven sha la her.

⁴⁴Yehoshafati hime iyongo a tor u Iserael.

⁴⁵Aerenakaa a Yehoshafati agen, man tahav nav mbu a er, kua ityav mbi a nôngon yô, i nger a ken ruamabera u abaver a utor mba Yuda la gaa?

⁴⁶Mba inja ve i lu er i Mbasodom nahan la, mba ve lu sha ayange a ter na Asa, ve shi her la, a tim ve ken tar la kera.

⁴⁷Ken Edom yô, tor lu ga; or ugen hira lu ker er ka tor nahan.

⁴⁸Yehoshafati er utso mba Tarshishi sha u za tôôn zenaria hen Ofir, kpa ve za ga; gadia utso mbala hembe hen Eshion-geber.

⁴⁹Nahan Ahashia wan u Ahaba kaa a Yehoshafati er: De, mbayev av ve̱ za a mbayev ou imôngo shin utso. Kpa Yehoshafati kera rumun ga.

⁵⁰Tsô Yehoshafati yav a uter nav imôngo, i ii un a uter nav imôngo ken gar u ter na Davidi; wan na Yehoram gema tema tor sha ityough nagh.

⁵¹Ahashia wan u Ahaba ya tor u Iserael ken Samaria sha inyom i sha pue kar ataankarahar i Yehoshafati tor u Yuda la; a tema tor sha Iserael anyom ahar.

⁵²A er kwagh u bo sha ishigh ki TER, a zende sha gbenda u ter na man sha gbenda u ngô na man sha gbenda u Yerobiam wan u Nebati, u a ne Iserael a̱ er isholibo la.

⁵³A civir Baal, a gure un inya; a bam TER, Aôndo u Iserael, er ter na er nahan cii.