Read tiv 1 Utor 3 Bible Online

1 Utor 3 - tiv bible

1 Utor 3

¹Tsô Solomon kôr hur a Farao tor u Igipiti, a er wan u Farao a va lu a na ken gar u Davidi zan zan a maa ya na bee, man iyou i TER, kua gilgar u kasen Yerusalem la kpaa.

²Ior gema lu sôngon iniav sha ajiir a taven sha tsô, gadia zan zan ar hen shighe la, i lu a maa iyou sha ci u iti i TER ga.

³TER doo Solomon ishima, a lu zan sha akaawan a ter na Davidi; ka di tsô er a lu sôngon iniav, nanden mbi sha ajiir a taven sha la yô.

⁴Tsô tor za ken Gibeon sha u za nan nagh ker, gadia ijiir i taven sha la lu i hemban vesen; Solomon nande iniav kuma dubu sha atse a nanden nagh sha mi la.

⁵Ken Gibeon la, TER ande hen Solomon ken mnyam ma cien tugh. Aôndo kaa er: Sônom kwagh u a sar u u M̱ na u yô.

⁶Tsô Solomon kaa er: U tese wanakiriki wou terem Davidi erdoo u vesen, er a lu zenden sha ishigh You sha mimi man sha perapera man sha ishima i wang a We imôngo yô, man U ver un erdoo u vesen ne, er U na un wan Wer a̱ tema sha ikônough nagh ki torough er i lu nyian nahan ne.

⁷Hegen yô, TERE, Aôndo wam, U ver wanakiriki Wou tor sha ityough ki terem Davidi; man m ngu wanakiriki u kpeghee tsô, m fa u duen man u nyôron kpaa ga.

⁸Wanakiriki Wou ngu hen atô u ior ou mba U tsough, ikpelaior mba i fetyô u ôron ve ga, shin u fan iyenge ve kpaa ga, sha ci u mngee ve.

⁹Na wanakiriki Wou ishima i fan kwagh er una ôron ior Ou ijir, er una paven perapera a ifer yô; gadia ka anti je, nana fatyô u ôron imbaikpelaior You ne ijiri?

¹⁰Er Solomon sôn kwagh ne nahan yô, doo TER.

¹¹Tsô Aôndo kaa a na er: Er u sen kwagh ne, u sen u tsan sha won ga, man u sen inyaregh ga, shi u sen u wuan mbaihomov ou kpaa ga, u gem u sen kwaghfan er ú fatyô u ôron ijir yô,

¹²nahan M er sha imo you; nenge, M na u ishima i fan kwagh man i kaven kwagh je, ma or vande ngun er we nahan ga, man ma or nana mough ken ijime you nana kuma sha a we kpaa ga.

¹³M shi M na u kwagh u u sen ga kpaa, ka inyaregh man icivir, zan zan je yô, sha ayange a ou cii, á zua a ma tor ugen u kuman sha a we ga.

¹⁴Aluer ú zenden sha igbenda Yam, ú veren ishima sha akaawan a Am man sha atindi a Am, er teru Davidi lu zenden nahan yô, Me seer we ayange kpaa.

¹⁵Tsô Solomon maa nder; yô, lu mnyam ma cien tsô; nahan a va ken Yerusalem a va tile sha ishigh ki areki u ikuryan u TER, a na iniav mbi nanden, shi a na iniav mbi bem kpaa, a er mbashiren un cii iniongo.

¹⁶Tsô uidyambakasev uhar, va hen tor, ve va tile sha ishigh nagh.

¹⁷Kwase u môm la kaa er: Terem, mo vea kwase ne, se mba iyou i môm, mo m mar wan er un lu ken iyou.

¹⁸Tsô er m mar ayange kar atar yô, kwase ne kpaa mar; se lu imôngo; ma orgen lu a vese ken iyou la ga, saa se uhar tsô, se lu ken iyou la ye.

¹⁹Wan u kwase ne kpe tugh, gadia a yav a kighir un.

²⁰Tsô a mough ateghôtôutu, a tôô wan wam hen ikum yam, zum u kpan wou u kwase lu mnya la, a gbir hen ikum na, a gema a gbir wan na u kpen la hen ikum yam.

²¹Er m mough pepe mer, me na wan atumba yô, nenge, m kav un kpenegh; kpa zum u m kenger un doo doo pepe yô, m nenge lu wan wam u m mar la ga.

²²Kwase ugen la gema kaa er: Ei, u uma la, ka un a lu wan wam ye, u kpen la ka wan wou. Ngun gema kaa er: Ei, ka u kpen la a lu wan wou ye, u uma ne ka wan wam je. Kape ve lu kpelan kwagh sha ishigh ki tor la.

²³Tsô tor kaa er: U môm la kaa er: Ngun u a lu uma ne ka wan wam, ka u a kpe la man a lu u wou ye; man ugen gema kaa er: Ei, ka wan wou a lu u kpen ye, wan wam ka u uma je.

²⁴Nahan tor kaa er: I̱ va nam sanker. Nahan i va a sanker hen tor.

²⁵Tor kaa er: Pav nen wan u uma la avegher ahar; yô, na u môm la vegher, na di ugen la kpaa vegher.

²⁶Tsô kwase u wan u uma lu u na la, ôr kwagh a tor, gadia mhôônom kôr un a wan na, a kaa er: Terem, gba nan un wan u uma la tsô, de woo un je ga; kpa ugen la kaa er: I̱ de lu u wam shin u wou kpaa ga, i̱ gba paven tsô.

²⁷Nahan tor gema kaa er: Na un wan u uma, de woo un je ga; ka un a lu ngô u wan ne ye.

²⁸Tsô Iserael cii ungwa agwa, er tor a kur ijir la yô; nahan ve cia tor, gadia ve kav er kwaghfan u Aôndo a lu ken a na sha u ôron ijir yô.