Read tiv 2 Utor 11 Bible Online

2 Utor 11 - tiv bible

2 Utor 11

¹Zum u Atalia ngô u Ahashia nenge er wan na kpe yô, a mough a wua ônov mba tor cii.

²Kpa Yehosheba, wan u tor Yoram, anngô u Ahashia u kwase za tôô Yoashi wan u Ahashia myer ken ônov mba tor mba i lu wuan ve la, un vea yese na, a wa ve ken iyou i yaven ker; i yer Atalia un, nahan i wua un ga.

³A lu vea na myer ken iyou i TER, anyom ataratar; nahan Atalia tema tor sha tar la.

⁴Sha inyom i sha utaankaruhar la, Yehoyada tindi i yila mbahemenev mba Mbakariti kua mba mbakuran, mba lun a ior sha ikev deri deri, i va a ve her a na ken iyou i TER, a ya ikur a ve, a er ve ve bum ken iyou i TER, nahan a tese ve wan u tor.

⁵A kaa a ve er: Kwagh u né er yô, ka un ne: pav nen nongo wen u u hii yaren tom sha iyange i memen la, akum atar ikum i môm i̱ kuran ya u tor,

⁶ikum igen, i̱ tilen hen hunda u Sur, shi igen hen hunda u u lu ken ijime i mbakuran la; kape né kura ya la.

⁷Iniongo yen ihiar, mba ve mem tom sha iyange i memen la cii, ve̱ kura iyou i TER, ve̱ kase tor.

⁸Kase nen tor, hanma or nana̱ lu a ikav mbi utyav mbi nan sha ikev; hanma or u nana nyôr ken nongo wen yô, i̱ wua nan je; lu nen a tor imôngo zum u una duen man shi una nyôron, kpaa.

⁹Tsô mbahemenev mba ve lu a ior deri deri sha ikev la ve er sha imo i pristi Yehoyada vough, hanmô tôô ior mba nan, mba ve hii yaren tom sha iyange i memen la, kua mba ve mem tom sha iyange i memen la kpaa, tsô ve va hen pristi Yehoyada.

¹⁰Pristi tôô awange kua iperutya i yan lu i tor Davidi la, i i lu ken iyou i TER la, na mbahemenev mba ve lu a ior deri deri sha ikev la.

¹¹Tsô mbakuran mbala tile, hanma or a ikav mbi nan mbi utyav sha uwe, hii iyou vegher u ken iyan zan zan ar iyou vegher u ken imese, sha ishigh ki atse a nanden nagh sha mi kua sha ishigh ki iyou, ve kase tor.

¹²Nahan a due a wan u tor, a cir un idyer i tor, shi a na un Shiada; ve kôr un tor, ve shighe un mkurem sha ityou; ve kure ave, ve kaa er: Tor a̱ tsa sha won!

¹³Zum u Atalia ungwa ayôôso a mbakuran kua a ior yô, a va hen ior ken iyou i TER;

¹⁴jingi yô, a nenge tor tile hen ityô sha ieren ve, man mbahemenev kua mbaikorov tile a tor; ior mba tar la cii, lu ember tôngon ikor. Tsô Atalia ande akondo a na genger imo kaa er: I dughum myer! I dughum myer!

¹⁵Kpa pristi Yehoyada kaa mbahemenev mba ve lu a ior deri deri sha ikev mba ve lu sha akumautya la, er: Wa nen un ken atô u iniongo, due nen a na; or u nana za a na ityô yô, i̱ wua nan sha sanker; gadia pristi kaa er: De woo nen un ken iyou i TER ga.

¹⁶Tsô ve za ave ve kôr un; a kar hen gbenda u i nyer a anyinya mi ken ya u tor la, ka her je i wua un ye.

¹⁷Tsô Yehoyada er tor kua ior ve̱ ya ikur a TER er vea lu ior mba Aôndo; shi tor kpaa ya ikur a ior nav.

¹⁸Nahan ior mba tar la cii za hen iyou i Baal, ve za yôhôl i; ve hembe atse na a nanden nagh sha mi kua ieev nav; ve wua Matan pristi u baal, sha ishigh ki atse. Pristi gema ver mbakuran iyou i TER.

¹⁹Shi a tôô mbahemenev mba ve lu a ior deri deri sha ikev la man Mbakariti man mbakuran kua ior mba tar la cii, ve due a tor, ve sen ve kar sha hunda u mbakuran ve za ar hen iyou i tor. Tsô a za tema sha ikônough ki torough.

²⁰Nahan ior mba tar la cii, ember, bem gba ken gar, Atalia yô, ve wua un sha sanker hen ya u tor.

²¹Zum u Yoashi ya tor la, a lu anyom ataankarahar.