Read tiv 2 Utor 19 Bible Online

2 Utor 19 - tiv bible

2 Utor 19

¹Tsô zum u tor Hesekia ungwa kwagh ne yô, a ande akondo a na, a haa iba iyol, a za nyôr ken iyou i TER.

²A tindi Eliakim u a nengen sha ya u tor man Shebena orngeren kua upristi mba tamen, ve haa aba iyol ve za hen profeti Yesaia wan u Amoshi.

³Ve za kaa un er: Hesekia ngu kaan nahan er: Iyange ne ka iyange i ican je, man i mtsaha kua ilyahan kpaa; gadia ônov kuma u á mar ve yô, kpa agee a maren ve nga je ga.

⁴Alaghga TER, Aôndo wou, Una ungwa akaaôron a Rabeshake cii, u ter na, tor u Ashiria tindi un er a̱ va tuhwa Aôndo u uma yô, man Una tsaha un sha akaaôron a TER, Aôndo wou, A ongo la; nahan yô, ma u shi kende imo, man u er msen sha ci u asande a a shi ker yô.

⁵Tsô mbayev mba tor Hesekia mba ve hen Yesaia yô,

⁶Yesaia gema kaa a ve er: Za kaa nen ter wen nahan ner: TER ngu kaan nahan er: De cie akaaôron a u ongo, a mbayev mba tor u Ashiria ve tohom sha a la ga.

⁷Nenge, Me na jijingi ugen ken a na, una ungwa agwa, tsô una hide una yem ken tar na la; Me na una kpe ku u sha sanker ken tar na la.

⁸Tsô Rabeshake hir yô, za kohol tor u Ashiria lu nôngon ityav a Libena, gadia vande ungwan er a mough hen Lakishi kera yô.

⁹Tsô er a ungwa er i lu ôron kwagh u Tirhaka tor u Etiopia er: Nenge, a due sha u nôngon ityav a we; nahan a shi a tindi mbatyomov hen Hesekia, a kaa er:

¹⁰Za kaa nen Hesekia tor u Yuda nahan ner: Aôndo wou u u suur sha a Na la, A̱ de tsughun we kaan er, á na Yerusalem sha ikev i tor u Ashiria ga, ze.

¹¹Nenge, u ungwa kwagh u utor mba Shiria lu er a ityar cii, er ve tim i purututu la; nahan we yô, ú wara?

¹²Mbaaôndo mba akuraior, a uter av tim a la, ve yima a kpa? Ka Gosan man Haran man Resev kua ior mba Eden mba ve lu ken Telasar la.

¹³Tor u Hamati man tor u Arpadi man tor u gar u Sefarvaim man u Hena kua u Iva la, mba hana?

¹⁴Er Hesekia ngohol washika sha ikev i mbatyomov mbala, ôr yô, Hesekia kôndo, za sha iyou i TER, A samber un sha ishigh ki TER.

¹⁵Tsô Hesekia sôn TER, kaa er: TER, Aôndo u Iserael, We u U tem sha ucerubi, ka We tseegh U lu Aôndo u ityartor i sha won cii ye; ka We je, U gbe Sha man tar ye.

¹⁶TERE, ver ato, ungwa TERE, bugh ashe nenge; ungwa akaaôron a Senakeribi, a a tindi sha u lahan Aôndo u uma ne.

¹⁷Mimi je, TERE, utor mba Ashiria vihi akuraior kua ityar ve kpaa,

¹⁸ve gbihi mbaaôndo vev ken usu, gadia ve ka mbaaôndo mimi ga, kpa ka tom u sha ave a ior tsô, ikon kua awen; ka nahan man ve tim ve kera ye.

¹⁹Yô, TERE, Aôndo wase, shi yima se sha ikev na, sha er ityartor i sha won cii i̱ fa er We TER U lu Aôndo, We tseegh yô.

²⁰Tsô Yesaia wan u Amoshi tindi loho hen Hesekia kaa er: TER, Aôndo u Iserael ngu kaa nahan er: Msen u u senem sha kwagh u Senakeribi tor u Ashiria la yô, M ungwa imo you.

²¹Ka kwaghôron u TER A kaa sha a na ne er: Iniunkwase wankwase u Shion ngu lahan we, ngu sen we sha ilyahan; wankwase u Yerusalem ngu jingir ityough ken ijime you.

²²Ka an je u laha nan man u toho nan kpaa? Man ka an je u hagher sha nan sha kwaghôrono, u kenden ashe sha sha ihagher kpaa? Ka sha Icighan u Iserael je.

²³Ka sha mbatyomov ou mbala, u laha TER ye, u kaa wer: Sha ikpila-akeke yam m unde sha ityouv mbi iwoogh zan zan ken atô u Lebanon, m gber ugôgômbausedar nav kua uicighanmbaikonov mba fer nav; m nyôr zan zan m za ar hen zuer na henpe ikô i hembe wan la.

²⁴M time azôr, m ma mngerem ma ken ityar igen, sha akevangahar am ne me uma asalegh a ifi u Igipiti cii.

²⁵U ungwa er M vande eren akaa la tsuaa, M ver a ngise je kpaa gaa? Hegen yô, M kure a sha mi vough, ka nahan man u tim agar a lun a ugir, u gema a, a hingir atihi a alôgh ye.

²⁶Ka nahan man ior mba ve lu ken a la, ve kera lu a agee iyol ga ye, asema yina ve, kondo ve iyol; ve hingir er toho u ken akôngo man er gwergwe nahan, man shi er toho u u mende sha uha, man shi er alakema u ka a use er a lu amar ga la nahan.

²⁷Kpa M fa mtem wou man mdugh wou man mnyer wou man ihundugh ki u hundu sha a Mo kpaa.

²⁸Er u hundu sha a Mo, man imanger you i u manger la i va nyerem ker ato yô, Me wa tsue Wam ken ihinga you kua lijam Wam kpaa ken zwa wou, Me hide a we sha gbenda u u ve mi la.

²⁹Kwagh ne una hingir we ikav: inyom ne, né ya kwagh u a gbe menden iyol na tsô yô, inyom i sha kpaa né ya kwagh u una shi á mende la, kpa ken inyom i sha utar la yô, lôô nen, sunda nen, môôr nen ikon i wain, ya nen atam a i.

³⁰Asande a a wer ken ya u Yuda a a shi her la, shi aa wa amise shin inya man á ume atam sha.

³¹Gadia ka ken Yerusalem asande a a shi her yô, aa due man sha uwo u Shion kpaa mbawaren vea due. Gbashima u TER una er kwagh ne.

³²Ka nahan man TER A kaa sha kwagh u tor u Ashiria la er: Una nyôr ken gar ne ga, man una ta tihinya sha u nôngon a na kpaa ga.

³³Gbenda u a ve mi la, ka sha u je una hide ye, una nyôr ken gar ne ga, kape TER A kaa la.

³⁴Me kumba gar ne, Me yima un, sha ci Wam iyol Yam, man sha ci u wanakiriki Wam Davidi kpaa.

³⁵Tsô ken tugh mbula je, ortyom u TER due wua ior dubu deri man dubu akunduanyiin kar utaan ken afo a Mbaashiria. Zum u ior nder pepe yô, nenge, ve lu akom gbulugh gbulugh.

³⁶Nahan Senakeribi tor u Ashiria mough hide, yem, a za tema ken Nineve.

³⁷Tsô er a gure ken iyou i Niseroki, aôndo na la yô, ônov nav Adrameleki man Shareser ve wua un sha sanker, maa ve yevese ve yem ken tar u Ararati; wan na Esar-hadon gema tema tor sha ityough nagh.