Read tiv 1 Kroniku 28 Bible Online

1 Kroniku 28 - tiv bible

1 Kroniku 28

¹Tsô Davidi kohol mbahemenev mba Iserael cii, ka mbahemenev mba sha ikwe, man mbahemenev mba iniongo i eren tor tom, man mbahemenev mba lun a ior dubu dubu sha ikev, man mbahemenev mba lun a ior deri deri sha ikev, man mbahemenev mba nengen sha ikav mbi tor man inyaregh nagh kua mbi ônov nav, man mbaerentom ken ya u tor, kua nomsombaiorov mba vian asema, ka anomaior a ageegh la cii, a kohol ve ken Yerusalem.

²Nahan tor Davidi mough tile sha, kaa er: Ungwa nen ase imo yam anmgbianev av, man ior av; mo yô, lum ken ishima u maan iyou i memen sha ci u areki u ikuryan u TER man sha ci u kwaghpendanangahar min, u Aôndo wase, man m kohol iyol je sha u maan iyou la.

³Kpa Aôndo kaa a mo er: We ú maa iyou sha ci u iti Yam ga, sha ci u u lu orutya, man shi u hee awambe inya kpaa yô.

⁴Nahan kpaa, TER, Aôndo u Iserael, tsuwam ken ya u terem, mo tswen, er m̱ tema tor sha Iserael gbem; gadia A tsuwa Yuda er a̱ lu ityoor, man ken ya u Yuda yô, A verem tor sha Iserael cii;

⁵man ken ônov av cii yô (gadia TER nam ônov kpishi) A tsuwa wan wam Solomon er a̱ tema sha ikônough ki torough ki tartor u TER, sha Iserael.

⁶Nahan A kaa a mo er: Wan wou Solomon ka un una maa iyou Yam kua ityembeya Yam ye; gadia M tsuwa un Mer, a̱ lu wan Wam, Me lu ter na.

⁷Man Me taver tor na gbem, aluer una taver ishima u wan atindi a Am kua akaawan a Am iko er i eren nyian nahan yô.

⁸Hegen yô, sha ishigh ki Iserael, mkohol u TER ne cii, man sha ato a Aôndo wase kpaa, waan nen atindi a TER, Aôndo wen, iko cii, timen nen sha a, sha u tar u dedoo ne u̱ lu u wen, man né undu ônov enev dyako u u ken ijime yen gbem yô.

⁹Nahan yô, we wan wam Solomon, fa Aôndo u teru, civir Un a ishima i môm man ishima i gbar gbar kpaa; gadia TER tev asema cii, man A kar hanma mhen cii. Aluer ú ker Un yô, ú zua a Na; man aluer ú undu Un yô, Una ta u kera, Una hunde ishima a we gbem je.

¹⁰Nenge, TER tsuwa u er u̱ maa iyou, i̱ lu icighanjiir; yô, lu taveraa, er ase nahan.

¹¹Tsô Davidi tese wan na Solomon mlu u puadwer u tempel, man u ayou a na, man u ayou a na a koson akaa ker, man mlu u ukpo nav mba shaav, man u ukpar nav mba kimi, man u kpar na u ijiir i nan iwom ker la,

¹²man mlu u akaa a a lu a mi ken ishima cii sha kwagh u ityembe i iyou i TER, man ayou a a kase i cii, man ayou a koson akaa a iyou i Aôndo ker, kua ayou a koson uicighanmbaakaav;

¹³man sha kwagh u iniongo i upristi kua Mbalevi kpaa, man sha kwagh u ityom i eren ken iyou i TER cii, man ikav mbi tomov mbi ken iyou i TER cii.

¹⁴(A na) zenaria u i kar myohom nam, sha ci u ikav mbi zenaria, sha ci u ikav mbi sha hanma injatom cii; shi a na azurfa i kar myohom nam, sha ci u ikav mbi sha hanma injatom cii;

¹⁵i kar myohom ma udaarmbaamengerev mba zenaria kua amenger a ve a zenaria, i kar myohom ma zenaria sha ci u hanma daarimenger kua amenger a na; man shi i kar myohom ma azurfa sha ci u daarimenger u azurfa sha mkar u myohom u daarimenger kua amenger a na, sha injatom i hanma daarimenger cii;

¹⁶man i kar myohom ma zenaria sha ci u utebul mba ubredi mba sha ishi, sha ci u hanma tebul; man azurfa kpaa sha ci u utebul mba azurfa;

¹⁷man zenaria u wang sha ci u iyôv mbi dughun inyam a mi man utasa man ayongo, man sha ci u ugbande mba zenaria, sha myohom ma hanma gbande; man sha ci u ugbande mba azurfa kpaa, sha myohom ma hanma gbande;

¹⁸man sha ci u atse a nanden kwagh u humandoon sha mi kpaa, a na zenaria u i ser sha usu i kar un myohom yô; man zenaria sha ci u ikav i ikyekye, ka ucerubi mba ve naregh akper a ve, ve cir areki u ikuryan u TER je la.

¹⁹Akaa angan, ityom ne cii, akav a i la, A tesem sha mnger u i nger sha uwegh ku TER ku ku lu sha a mo yô.

²⁰Davidi kaa a wan na Solomon er: Lu taveraa, taver ishima, er ase nahan; de cie kwagh ga, de yen ishima ga, gadia TER, Aôndo, Aôndo wam, ngu a we je, Una gbihi u ga, Una undu u ga, zan zan ú kure tom u iyou i TER ne cii.

²¹Nenge, iniongo i upristi man i Mbalevi ngi sha ci u tom u ken iyou i Aôndo cii; sha hanma injatom cii, u ngu a ior mba fan eev, mba vea er hanma injatom; mbahemenev kua ior cii kpaa vea wase u sha hanma kwagh cii.