Read tiv 2 Kroniku 14 Bible Online

2 Kroniku 14 - tiv bible

2 Kroniku 14

¹Tsô Abiya yav a uter nav imôngo, i ii un ken gar u Davidi; wan na Asa tema tor sha ityough nagh; sha ayange la bem gba hen tar la anyom pue.

²Asa er kwagh u doon u jighilii sha ashe a TER, Aôndo na;

³gadia a vihi atse a nanden nagh sha mi agen, a a lu a ve ga la, kera, kua ajiir a taven sha la kpaa, a hembe mtôm ma awenem shi a gber Asherim kera;

⁴a kaa a Yuda er, ve̱ ker TER, Aôndo u uter vev, ve̱ wa atindiakaa iko kua uiniezwa kpaa.

⁵Man shi a vihi ajiir a taven sha man atse a nanden kwaghhumandoon sha mi, ken agar a Yuda cii kera; tar na lu bem sha ikev na.

⁶Shi a maa agar a lun a gir ken Yuda; gadia tar lu a bem, i nôngo ityav a na sha anyom la ga; gadia TER na un mmem.

⁷Ka nahan man a kaa a Yuda er: Sé maa nen agar ne, sé kase a ugir man ayou a taven gôgônan man ihinda i iyôô i lun a uishindan; tar ngu sha ikev yase her, gadia se ker TER Aôndo wase; se ker Un, nahan A na se mmem sha hanma ian. Nahan ve za hemen u maan doo doo.

⁸Asa lu a ikumutya ken Yuda, ior dubu deri utar, mbatôôn iperutya kua awange; ken Benyamin yô, mba ve tôôn iperutya man mbahendan ada ve lu ior dubu deri uhar man akunduanyiin; mban cii lu anomaior a ageegh je.

⁹Tsô Sera Orkushi va ityav her a ve a ikumutya, ior dubu kwa dubu, man akekeautya deri utar; a va hen Maresha.

¹⁰Nahan Asa due u za zuan ityav a na, maa ve samber ityav shin pev u Sefata hen Maresha.

¹¹Tsô Asa genger imo yila TER, Aôndo na, a kaa er: TERE, ma orwasen u nana nyôr hen atô u or u ageegh vea isheeror nan ngu ga, saa We; wase se TERE, Aôndo wase, gadia se mba suur sha a We, man ka ken iti You kpaa se ve ityav hen ikpelaior ne ye. TERE, ka We U lu Aôndo wase ye; or a̱ de hembe ga, saa We tseegh.

¹²Tsô TER na Asa man Yuda ve hemba Mbakushi, nahan Mbakushi yevese.

¹³Asa man ior mba ve lu a na, ve zenda ve ityô zan zan ve za ar hen Gerar; i wua Mbakushi ngee je ve kera fatyô u shi nôngon ga, gadia ve tim sha ishigh ki TER, kua sha ishigh ki akumautya Na; ve ya ishar kpishi.

¹⁴Ve hemba agar a a kase Gerar la cii, gadia mcieryol u TER ta sha a ve; ve kura akaa ken agar la cii, gadia ishar lu ken a kpishi.

¹⁵Ve vihi utenti mba mbakuranibua kpaa, ve kura iyôngo kpishi kua urakumi, tsô ve hide ken Yerusalem.