Read tiv 2 Kroniku 25 Bible Online

2 Kroniku 25 - tiv bible

2 Kroniku 25

¹Amashia lu anyom ikundu kar ataan zum u a ya tor la; a tema tor anyom ikundu kar ataankaranyiin ken Yerusalem; iti i ngô na er Yehoadan, lu u ken Yerusalem.

²A eren kwagh u dedoo sha ishigh ki TER, kpa lu sha ishima i môm ga.

³Tsô zum u tor taver sha uwegh nagh yô, a wua mbatomov nav mba iyange ve wua tor, ter na la.

⁴Kpa a wua ônov vev ga, a er sha kwagh u i nger ken atindi a ken ruamabera u Mose yô, ape TER kaa er: Uter ve̱ de kpeen sha ci u ônov ga, ônov kpaa ve̱ de kpeen sha ci u uter ga, kpa hanma or nana̱ kpe sha ci u isholibo i nan iyol i nan.

⁵Tsô Amashia kohol Yuda, ver ve sha uya mba uter vev, sha ikev i mbahemenev mba lun a ior dubu dubu sha ikev man mbahemenev mba ve lu a ior deri deri sha ikev, ka Yuda cii kua Benyamin je la; a ôr iyenge ve hii sha mba ve kom anyom ikundu man mba ve hembe nahan, a zua a ior dubu deri utar, lu uicuwanmbaiorov, mba ve kuma u zan ityav, mbafan awange man iperutya.

⁶Man shi a lôhô anomaior a ageegh ken Iserael, ior dubu deri, a na ve tôndo sha azurfa kuma utalenti deri.

⁷Kpa or u Aôndo va her a na, kaa er: Tor, de kera rumun ikumutya i Iserael i̱ za a we imôngo ga, gadia TER ngu a Iserael ga, ka Mbaeferaim cii je la.

⁸Kpa gba zan tsô, taver ishima sha ityav mbi nôngon, Aôndo, Una zôhô u sha ishigh ki mbaihomov; gadia Aôndo ngu a tahav mbu wasen man mbu gbihin inya kpaa.

⁹Tsô Amashia pine or u Aôndo la er: Tsô me er nan sha kwagh u utalenti deri mba m ne ikumutya i Iserael laa? Or u Aôndo la gema kaa er: TER ngu a agee u nan we kwagh u a hembe ngun kpishi je.

¹⁰Tsô Amashia dugh ikumutya i i due ken Eferaim la kera er ve̱ hide ken ya; nahan ishima vihi ve kpishi a Yuda, ve hide hen ya a ishima i vihin tsung.

¹¹Kpa Amashia taver ishima kar hemen ior nav, ve za shin Pev u Bar, ve za wua Mbaseir, ior dubu pue.

¹²Dubu pue ugen yô, Mbayuda yem a ve uma, ve unde a ve sha iwen i taven, ve mgbegha ve, ve gba shin inya, nahan ve cii ve sombo avur avur.

¹³Kpa mbanôngontyav mba Amashia na ve gbenda er ve̱ de ze ityav a na imôngo ga la, ve gema ve ta num sha agar a Yuda, hii hen Samaria zan zan ar hen Bete-horon, ve wua ior dubu utar, ve kura ishar kpishi.

¹⁴Tsô er Amashia za hemba Mbaedom hide yô, a va a mbaaôndo mba Mbaseir, a va ver ve er ve̱ hingir mbaaôndo nav, a gure a civir ve, a nande kwaghhumandoon sha ci ve kpaa.

¹⁵Nahan iyugh i TER mough sha Amashia, tsô A tindi profeti her a na, va kaa a na er: Ka nyi u keren mbaaôndo mba iorov mba ve yem ior vev sha ikev you ga laa?

¹⁶Tsô, ngur ôron kwagh a na yô, tor kaa a na er: Se ver u or u henen kwagh a toro? Kighir je; i̱ wua u keng, ka nyi? Tsô profeti la kighir je, kaa er: M fa Aôndo vande veren ishima sha u timin we, sha ci u u er kwagh ne, man shi sha ci u u kera ver ato sha kwaghôron wam kpaa ga yô.

¹⁷Tsô Amashia tor u Yuda hen kwagh a ior, tindi loho hen Yoashi wan u Yehoahashi, wan u Yehu, tor u Iserael, a kaa er: Va, sé zua ishigh ayol ase.

¹⁸Tsô Yoashi tor u Iserael tindi loho hen Amashia tor u Yuda, a kaa er: Saa u sha Lebanon tindi loho hen sedar u sha Lebanon, a kaa er: Na wan wam, wan wou u kwase, a̱ er; kpa ishôso i sha Lebanon va kar, ndyar saa la.

¹⁹U fa wer, u hemba Edom; nahan ishima i gengese we wer, ú ker icivir yô. Gba teman hen ya wou gir gir tsô, inja na nan man ú kumbur ú ve a kwaghbo sha iyol you, ú va gba, kua Yuda imôngo?

²⁰Kpa Amashia wa iko ga; gadia lu ishima i Aôndo u nan ve sha ikev i mbaihomov vev, gadia ve ker mbaaôndo mba Edom.

²¹Nahan Yoashi tor u Iserael kôndo; un vea Amashia tor u Yuda ve za zua ishigh hen Bete-shemeshi u Yuda.

²²Tsô Iserael hemba Yuda; hanma or yevese hide hen tenti u nan.

²³Yoashi tor u Iserael kôr Amashia tor u Yuda wan u Yoashi wan u Yehoahashi hen Bete-shemeshi, va a na ken Yerusalem, va hembe gilgar u Yerusalem, hii hen Hundagar u Eferaim je zan zan ar hen Hundagar u Zongo, ka aseva deri unyiin je la.

²⁴A kura zenaria man azurfa cii, man ikav mbi i zua a mi ken iyou i Aôndo cii, mbi mbi lu sha ikev i Obedi-edom la, kua inyaregh ki ken iyou i tor, man mbakwarev kpaa; tsô a hide hen Samaria.

²⁵Amashia wan u Yoashi tor u Yuda lu uma, ken ijime i Yoashi wan u Yehoahashi tor u Iserael kpe kera la, anyom pue kar ataan je.

²⁶Aerenakaa a Amashia a hiihii man a masetyô cii, i nger a ken ruamabera u utor mba Yuda man mba Iserael la gaa?

²⁷Hii sha shighe u Amashia gema sha u den u dondon TER la je tsô, ve zua zwa sha a na ken Yerusalem; nahan a yevese a za hen Lakishi; ve tindi i tôv un angahar zan zan hen Lakishi, ve za wua un ker.

²⁸Tsô ve va a na sha anyinya, ve va ii un a uter nav imôngo ken gar u Yuda.