Read tiv 2 Kroniku 33 Bible Online

2 Kroniku 33 - tiv bible

2 Kroniku 33

¹Manase lu anyom pue kar ahar zum u a ya tor la; a tema tor ken Yerusalem anyom akunduahargber kar ataan.

²A er kwaghbo sha ishigh ki TER; a zaan sha akaahôngorough a atôatyev, a TER lu zenda a sha ishigh ki Mbaiserael kera la.

³Gadia a shi a hire a maa ajiir a taven sha a ter na Hesekia lu vihi kera la; a ta atse a nanden nagh sha mi, imôngo je, sha ci u Ubaal, a er Asherim, a gure a civir akum a Sha cii, a er ishima i a.

⁴A ta atse a nanden nagh sha mi ken iyou i TER kpaa, i TER lu kaa er: Ka ken Yerusalem iti Yam ia lu gbem la.

⁵Shi a ta atse a nanden nagh sha mi imôngo sha ci u akum a Sha cii, hen ityembe i iyou i TER ihiar la.

⁶Man shi a er ônov nav ve kar ken atô u usu shin pev u wan u Hinom; a eren ahir man lu veren ishima sha ishor i kpehen, man a lu a ukurayol; a ver mba ve lu a ujijingi mba mbakpenev, man mba tsengan pasen akaa; a er ifer kpishi sha ishigh ki TER, sha u bamen Un.

⁷A ver eev mbu gban a gba mbu akombo mbu a er la, ken iyou i Aôndo, i Aôndo ôr kwagh u i A kaa a Davidi man wan na Solomon er: Ken iyou ne kua ken Yerusalem u ken ikwe i Iserael cii, M tsough un ne, Me ver iti Yam i̱ lu her gbem;

⁸man shi Me kera kar a nguhar ku Iserael ken tar u M ver Mer u̱ lu u uter enev ne, kera ga, aluer vea waan iko sha imo Yam cii yô, ka atindiakaa cii man akaawan kua ajiraôron a Mose na la.

⁹Kpa Manase mee Yuda kua mba ve tem ken Yerusalem, ve er ifer, hemba akuraior a TER lu tim a sha ishigh ki Mbaiserael kera la.

¹⁰Tsô TER ôr kwagh a Manase kua a ior nav, kpa ve ver ato ga.

¹¹Ka nahan man TER va a mbahemenev mba akumautya a tor u Ashiria sha a ve ye; ve kôr Manase sha uiwever, ve kange un sha mshirim ma togula, ve yem a mi ken Babilon.

¹²Shighen u a lu ken ican la yô, a zamber a TER, Aôndo na, a hire a iyol na ijime tsung je, sha ishigh ki Aôndo u uter nav.

¹³A sôn Un, Un kpaa A ver ato sha zamber na, A rumun msen na, A hire a na hen Yerusalem ken tartor na. Tsô Manase fa er TER A lu Aôndo yô.

¹⁴Ken masetyô u kwagh ne yô, a maa gir ugen ken wongar u Davidi, vegher u Gihon u shin ityôtar, shin pev zan zan ar hen Hundagar u Ishu; a kase Ofel, a wa un atô, a maa un tav kpishi; a ver mbahemenev mba utya ken agar a Yuda a lun a ugir cii.

¹⁵Man shi a due a mbaaôndo mbagenev kera, man eev mbu mbu lu ken iyou i TER kpaa, kua atse a nanden nagh sha mi a un ta sha igungu u iyou i TER kua ken Yerusalem la cii, a haa a ken akôngo a gar.

¹⁶Man shi a ta atse a nanden nagh sha mi a TER, a na iniav mbi bem man mbi ishughun sha a, shi a kaa Yuda er ve̱ civir TER, Aôndo u Iserael.

¹⁷Nahan kpaa ior de u nan nagh sha ajiir a taven sha la ga, kpa lu sha ci u TER, Aôndo ve, tseegh.

¹⁸Aerenakaa agen a Manase man msen na u a sôn Aôndo na la, man kwaghôron u mbanengenakaa, mba ve ôr kwagh a na ken iti i TER, Aôndo u Iserael la, nenge, i nger a ken aerenakaa a utor mba Iserael.

¹⁹Msen na u a sôn kpaa man er TER ungwa, rumun un, man asorabo na cii man M-undu u a undu mimi na la, man ajiir a taven sha a a maa a la, man Asherim kua ieev mbi a er, er a lu a hire a iyol na ijime ga la, nenge i nger a ken abaver a Hosai.

²⁰Tsô Manase yav a uter nav imôngo, i ii un ken ya na iyol na; nahan wan na Amon gema tema tor sha ityough nagh.

²¹Amon lu anyom ikundu kar ahar zum u a ya tor la, man a tema tor ken Yerusalem anyom ahar.

²²A er kwagh u bo sha ishigh ki TER, er ter na Manase lu er nahan; Amon na ieev mbi gban a gba mbi ter na Manase er la cii nagh, a ishima i môm, a civir mbi kpaa.

²³Kpa a kera hire a iyol na ijime sha ishigh ki TER, er ter na Manase lu hide a iyol na ijime nahan ga; kpa Amon ne yô, lu seer a seer ifer.

²⁴Tsô mbatomov nav zua zwa sha a na, ve za wua un ken ya na.

²⁵Kpa ior mba hen tar la gema wua ior mba ve zua zwa sha tor Amon la cii; tsô ior mba hen tar la gema kôr wan na Yoshia tor sha ityough nagh.