Read tiv 2 Kroniku 5 Bible Online

2 Kroniku 5 - tiv bible

2 Kroniku 5

¹Kape tom u Solomon er sha ci u iyou i TER u kure cii la. Tsô Solomon nyôr a ikav mbi ter na Davidi tsegha la; ka azurfa man zenaria kua ikav cii, a ver ken ayou a koson akaa ker a ken iyou i Aôndo.

²Tsô Solomon lôhô mbatamen mba Iserael man mbavesen mba sha ikwe cii, kua mbahemenev mba sha uipaven mba Mbaiserael; ve va zua hen Yerusalem, sha u za tôôn areki u ikuryan u TER ken gar u Davidi, ka Shion je la.

³Nahan ior mba Iserael cii va kohol hen tor hen iniongo, sha uwer u sha utaankaruhar la.

⁴Mbatamen mba Iserael cii va, nahan Mbalevi za tôô areki la.

⁵Ve va a areki kua tenti u kohol ker la a uicighanmbaakaav cii mba ve lu ken tenti la; ka upristi mba ken Mbalevi ve va a mi ye.

⁶Tsô tor Solomon a ior mba Iserael cii mba ve kohol her a na la, ve lu sha ishigh ki areki, ve lu nan nagh ku sôngon sha iyôngo man abua, iyenge i i gande u ôron fan.

⁷Nahan upristi va nyôr a areki u ikuryan u TER la, ve va ver un hen ijiir na, ken kpar u iyou u kimi la, hen icighankpar u hemban cii la, shin atô u akper a ucerubi.

⁸Gadia ucerubi naregh akper a ve sha ijiir i areki la; ucerubi cir areki kua igbough nav.

⁹Igbough mbila lihe je, i nengen a ityouv mbi igbough mbila ken icighankpar la sha ishigh ki kpar u kimi la; kpa i nengen a mi ken won ga; mbi her zan zan nyian ne.

¹⁰Ma kwagh ugen lu ken areki la ga, saa ikpande ihiar i Mose wa ker hen Horebi, zum u TER ya ikur a Mbaiserael shighe u ve due ken tar u Igipiti la.

¹¹Tsô zum u upristi due ken icighankpar kera yô (gadia upristi mba ve lu her la cii, ve wanger ayol a ve, ve kera wa iko sha iniongo ve ga),

¹²Mbalevi mbawan atsam, ve cii, ka Asav man Heman man Yedutun a ônov vev man anmgbianev vev imôngo, ve haa akondo a pupuu, ve lu a ukwen man mbaadiguve kua umolo, ve tile he kpeatsegh vegher u sha ityoughkitaregh la, upristi deri man ikundu lu a ve imôngo, lu tôngon ikor.

¹³Tsô zum u mba tôngonikor man mbawanatsam lu imôngo cii, lu wan icam imo i môm, sha u wuese TER sughum Un yô, zum u ve ger imo a ikor man ukwen kua ityougholov, ve lu wuese TER kaan er: Gadia A doo, gadia erdoo Na ngu gbem sha won. Nahan maa iyou iv a ibeenegh, ka iyou i TER je la,

¹⁴nahan upristi kera fatyô u tilen eren tom ga, sha ci u ibeenegh kila, gadia iengem i TER iv iyou i Aôndo la.