Read tiv 2 Kroniku 7 Bible Online

2 Kroniku 7 - tiv bible

2 Kroniku 7

¹Er Solomon kur msen u eren yô, usu sen Sha va hia nagh ku nanden kua iniav mbi sôngon; iengem i TER iv ken iyou la.

²Upristi kpaa kera fatyô u nyôron ken iyou i TER ga, sha ci u iengem i TER iv ken iyou i TER la.

³Mbaiserael cii gba kenger, zum u usu sen man iengem i TER kpaa lu sha iyou la yô; nahan ve gure ve wa ityough inya sha kungur, ve gba civir sughun TER, kaan er: Gadia A doo; gadia erdoo Na ngu gbem sha won.

⁴Tsô tor a ior cii, ve na nagh sha ishigh ki TER.

⁵Tor Solomon na nagh sha ibua dubu ikundu kar ihiar man iyôngo dubu deri kar dubu ikundu. Kape tor a ior cii ve tsegha iyou i Aôndo la.

⁶Upristi kpaa tile sha ityom ve; Mbalevi kpaa a ityogholov mbi TER, mbi tor Davidi er sha u wuese TER a mi — gadia erdoo Na ngu gbem sha won — sha icam i wuese i Davidi i ve lu wan la; upristi kpaa lu tôngon ikor sha ishiv vev; Iserael cii gema tile sha.

⁷Tsô Solomon tsegha ijiir i ken atô u tembe u u lu sha ishigh ki iyou i TER la; gadia ka heregh a na iniav mbi nanden man ahôm a iniav mbi bem ye, gadia atse a togula a Solomon er la, a yina u tôôn nagh ku nanden man nagh ku sha samuyia kua ahôm la.

⁸Nahan hen shighe la Solomon er iniongo la ayange ataankarahar a Iserael mba ve lu a na cii; lu zegemkohol, ior hii hen gbenda u karen zan Hamati je zan zan za ar hen uwagh u Igipiti.

⁹Sha iyange i sha anigheni la ve er icighaniniongo; gadia ayange ataankarahar la cii ve lu tseghan atse a nanden nagh sha mi la, man ayange ataankarahar la cii ve er iniongo.

¹⁰Sha iyange i sha ikundu kar atar sha uwer u sha utaankaruhar la, a na ior gbenda er ve̱ yem hen utenti vev; ve gba ember saan saan sha ci u aeren a dedoo a TER A er a Davidi man Solomon kua ior Nav Iserael, yô.

¹¹Kape Solomon kure iyou i TER man iyou i tor kpaa la; hanma kwagh u a va Solomon ken ishima u eren ken iyou i TER kua ken iyou na iyol na cii yô, a kure un doo doo je.

¹²Tsô TER ande hen Solomon tugh, kaa a na er: M ungwa msen wou, shi M tsuwa ijiir ne Mer i̱ lum iyou i nan nagh ker.

¹³Aluer Mea cir Sha, ura ua kera lu ga, shin Mea na zwa ikomon ia ya akaa a ken sule, shin Mea haa ior Av bouange,

¹⁴man aluer ior Av mba i yer ve sha iti Yam ne, vea hide a ayol a ve ijime, vea er msen vea ker ishigh Yagh, vea undu igbenda i ifer ve yô, Me ungwa Sha, Me de ve akaabo a ve, shi Me sôr tar ve kpaa.

¹⁵Hegen yô, ashe Am aa lu ivegher, ato Am kpaa a kegh sha msen u á sôn hen ijiir ne yô,

¹⁶gadia hegen yô, M tsuwa iyou ne M tsegha i Mer, iti Yam i̱ lu ker gbem; ashe Am kua ishima Yam kpaa vea luun sha i gbem.

¹⁷Man we yô, aluer wea zenden sha ishigh Yagh er teru Davidi lu zenden nahan, man wea eren akaa a M kaa u cii, wea ver ishima sha akaawan a Am, kua ajiraôron a Am yô,

¹⁸Mo kpaa Me taver ikônough you ki torough sha ityendezwa i M tôndo a teru Davidi Mer, ú ban a or u nan tema tor ken Iserael ga la.

¹⁹Kpa aluer nea gema nea undu akaawan a Am, man akaaôron a Am a M ver sha ishigh yenegh, nea gema nea za civir mbaaôndo mba genev, né gure né civir ve yô,

²⁰nahan Me wuhe ve shin amise je ken tar wam u M ne ve; man iyou i M tsegh i sha ci u iti Yam ne, Me kar a i sha ishigh Yagh kera, Me gema i, ia hingir kwagh u veren ishor man kwagh u wan ishenge a mi ken akuraior cii.

²¹Iyou ngin er i gbe ikôr nahan kpaa, hanma or u nana kar hen i cii, á kpiligh nan iyol, nana kaa er: Ka nyi TER A er a tar na kua iyou ne nahana?

²²Nahan vea gema á kaa er: Ka sha ci u ve undu TER, Aôndo u uter vev, u A due a ve ken tar u Igipiti, ve gem ve ker mbaaôndo mbagenev, ve gur ve civir ve, man ve er ve tom kpaa yô; ka nahan man A ve a kwaghbo ne cii sha a ve nahan ye.