Read tiv Esera 1 Bible Online

Esera 1 - tiv bible

Esera 1

¹Tsô sha inyom i hiihii i Shirushi tor u Pershia la yô, sha er kwaghôron u TER u Yeremia lu ôr la a̱ kure sha mi vough yô, TER tor jijingi u Shirushi tor u Pershia ityô, nahan a yôô ken tar na cii, man shi a nger a nger kpaa er:

²Shirushi tor u Pershia ngu kaan nahan er: TER, Aôndo u Sha nam ityartor i sha won cii, man shi A kaa er, m̱ maa Un iyou ken Yerusalem, u a lu ken Yuda la.

³Yô, hanmô wen u nan lu u ken ior Nav cii yô, Aôndo u nan A̱ lu a nan; yô, nana̱ yem ken Yerusalem, u a lu ken Yuda la, nana̱ za maa iyou i TER, Aôndo u Iserael, ka Un A lu Aôndo u A lu ken Yerusalem la ye.

⁴Hanma or u nan shi ken hanma ijiir i nan lu shir her la, ior mba hen ijiir i nan la, ve̱ wase nan sha azurfa man zenaria man ikav man uzendenya kua nagh ku nan sha ishima i dedoo sha ci u iyou i Aôndo i i lu ken Yerusalem la.

⁵Tsô mbavesen mba sha uya mba uter mba Yuda man Benyamin, man upristi kua Mbalevi ve mough; ka mba Aôndo tor asema a ve ityô la cii, sha u ve̱ kôndo ve̱ za maa iyou i TER i i lu ken Yerusalem la.

⁶Mba ve wa ndor a ve, ve kase ve la cii, ve wase ve sha ikav mbi azurfa man sha zenaria man ikav man uzendenya man ikav mbi injaav kua akaa a i na a sha ishima i dedoo yô.

⁷Tor Shirushi kpaa due a ikav mbi ken iyou i TER, mbi Nebukadinesar lu kura ken Yerusalem va a mi va ver mbi ken iyou i mbaaôndo vev la;

⁸Shirushi tor u Pershia due a mbi, gema na sha ikev i Miteredati orkosoninyaregh, a ôr iyenge i mbi sha ishigh ki Sheshibasar ortaregh u Yuda.

⁹Iyenge i mbi yô, ka: Utasa mba zenaria mba vesen ikundugber, man utasa mba azurfa mba vesen dubu môm, man ahô ikundu kar ataankaranyiin,

¹⁰man ayongo a zenaria ikundugber, man ayongo agen a azurfa deri unyiin man pue, man ikav mbigenev dubu môm.

¹¹Ikav mbi zenaria man mbi azurfa cii lu dubu utaan man deri unyiin. Sheshibasar va a mbi cii, zum u ve due ken kwar ken Babilon ve hide ken Yerusalem la.