Read tiv Esera 7 Bible Online

Esera 7 - tiv bible

Esera 7

¹Ken ijime i akaa ne yô, sha ayange a tor Artashaseta, tor u Pershia la, Esera wan u Seraia, wan u Asaria, wan u Hilkia,

²wan u Shalum, wan u Sadoki, wan u Ahitubi,

³wan u Amaria, wan u Asaria, wan u Merayoti,

⁴wan u Serahia, wan u Ushi, wan u Buki,

⁵wan u Abishua, wan u Pinehashi, wan u Eleasar, wan u Aron pristi u tamen la—

⁶Esera ne mough hen Babilon, lu orngeren, a fa atindi a Mose, a TER, Aôndo u Iserael na, la; tor rumun mbampin nav cii, gadia uwegh ku TER, Aôndo na, lu a na.

⁷Mbaiserael mbagenev mough kua upristi man Mbalevi man mbawanatsam man mbakuranihinda kua mbasôrontempel kpaa, ve yem ken Yerusalem sha inyom i sha utaankaruhar i tor Artashaseta la.

⁸A va hen Yerusalem sha uwer u sha utaan, lu sha inyom i sha utaankaruhar i tor la.

⁹Gadia sha uwer u hiihii sha iyange i hiihii la, a hii moughon ken Babilon, man sha uwer u sha utaan, sha iyange i hiihii la, a ar ken Yerusalem, gadia uwegh ku Aôndo na ku doon, lu a na.

¹⁰Gadia Esera ver ishima na u timen sha atindi a TER, man u eren sha a, man shi u tesen Iserael akaawan kua ajiraôron kpaa.

¹¹Ngun ka washika u i kura sha washika u tor Artashaseta na pristi Esera, orngeren, or u fan akaaôron a atindi a TER kua akaawan a Na, a A wa Iserael yô:

¹²Artashaseta tor u utor, u zan hen pristi Esera, orngeren, u fan atindi a Aôndo u Sha, or u jighilii.

¹³M na zwa mer, hanma or u Iserael cii, man upristi vev kua Mbalevi, mba ve lu ken tar wam, mba i sar ve u yemen ken Yerusalem yô, ve̱ za a we imôngo.

¹⁴Gadia er tor man atiator a na ataankarahar ve tindi u sha u u̱ za time sha kwagh u Yuda man Yerusalem, sha tindi u Aôndo wou, u u lu a mi sha uwe la;

¹⁵man shi sha u u̱ za a azurfa man zenaria mba tor kua atiator a na ve ne Aôndo u Iserael a ishima i dedoo, Un u ijiir Na i teman i lu ken Yerusalem la;

¹⁶man azurfa kua zenaria cii mba wea zua a mi ken tar u Babilon la cii, kua iwua i ior man upristi, i ve ne sha ishima i dedoo sha ci u iyou i Aôndo ve, i i lu ken Yerusalem la,

¹⁷nahan yô, yam anomabua sha inyaregh kin sha gbashima, kua anomaiyôngo man agumaiyôngo a iniav vev mbi sha samuyia man iniav vev mbi man, za na mbi sha atse a nanden nagh sha mi a ken iyou i Aôndo wen i ken Yerusalem la.

¹⁸Hanma kwagh u we kua anmgbianev ou ne nenge a doo u eren sha azurfa man zenaria mba ve shi la yô, er nen je sha ishima i Aôndo wen.

¹⁹Kpa ikav mbi i lu nan we sha ci u tom u iyou i Aôndo wou ne, na mbi sha ishigh ki Aôndo u Yerusalem.

²⁰Man shi hanma kwagh, u kwagh a gbe sha mi sha ci u iyou i Aôndo wou man a lu u u̱ na yô, tôô ken iyounyar i tor, gema na.

²¹Man mo, tor Artashaseta kpaa, m ngu nan mbakosoninyaregh mba ve lu yande Ifi cii zwa mer, hanma kwagh u pristi Esera, orngeren, u fan atindi a Aôndo u Sha, a pin ne yô, i̱ na un sha gbashima je,

²²zan zan kuma azurfa utalenti deri, man alakema uikaren deri, man wain ubav deri, man mkurem ubav deri, man bar yô, á kar a kar ga.

²³Hanma kwagh u Aôndo u Sha á kaa yô, i̱ er un nahan vough sha ci u iyou i Aôndo u Sha la, gadia inja na nan man á va a iyugh sha tar u tor kua ônov nava?

²⁴Man shi se mba pasen ne sha kwagh u upristi man Mbalevi man mbawanatsam man mbakuranihinda kua mbasôrontempel shin mbatomov mba ken iyou i Aôndo ne cii, or môm ngu a tahav mbu wan ve kpandegh ga, shin inyaregh ki saven shin ki peren kpaa ga.

²⁵We Esera kpaa, sha kwaghfan u Aôndo wou u A lu a we la, ver mbahemenev man mbaajiriv, mba vea ôron ajir a ior mba yande Ifi cii, ka mba ve fe atindi a Aôndo wou la cii; man or u nan fe ga yô, tese nan.

²⁶Hanma or u nana venda u eren sha tindi u Aôndo wou, man tindi u tor yô, i̱ ôr nan ijir fese je, shin a lu i kuugh, shin i zendan nan, shin i yan nan zwajirigh, shin i wan nan gaadi kpaa.

²⁷I̱ wuese TER, Aôndo u uter asev, u A we imbakwagh ne ken ishima i tor sha u eren iyou i TER i i lu ken Yerusalem la hwe nahan yô;

²⁸man A zungum mhôônom sha ishigh ki tor man atiator a na kua sha ishigh ki uityombaiorov mba tor cii. M zua a ishima i taver, gadia uwegh ku TER, Aôndo wam, lu a mo, nahan m kohol mbatamen ken Iserael, sha u ve̱ kôndo a mo imôngo.