Read tiv Esera 8 Bible Online

Esera 8 - tiv bible

Esera 8

¹Mbavesen mba sha uya mba uter vev, man iyenge i ken takerada i icombor i mba ve mough a mo imôngo ken Babilon, ken tartor u Artashaseta la yô, ka:

²Ken ônov mba Pinehashi yô, lu Gershon. Ken ônov mba Itamar yô, lu Daniel. Ken ônov mba Davidi yô, lu Hatushi,

³ken ônov mba Shekania. Ken ônov mba Paroshi yô, lu Sekaria; man iyenge i nomso mba ve lu a na imôngo mba i nger ve ken takerada u icombor yô, ve lu deri man akunduahargber.

⁴Ken ônov mba Pahati-moabi yô, lu Eliehoenai wan u Serahia man nomsombaiorov deri uhar a na imôngo.

⁵Ken ônov mba Satu yô, lu Shekania wan u Yahashiel man nomsombaiorov deri utar a na imôngo.

⁶Ken ônov mba Adin yô, lu Ebedi wan u Yonatan man nomsombaiorov akunduahargber a na imôngo.

⁷Ken ônov mba Elam yô, lu Yeshaia wan u Atalia man nomsombaiorov akunduatargber a na imôngo.

⁸Ken ônov mba Shefatia yô, lu Sebadia wan u Mikael man nomsombaiorov akunduanyiin a na imôngo.

⁹Ken ônov mba Yoabi yô, lu Obadia wan u Yehiel man nomsombaiorov deri uhar man pue kar anigheni a na imôngo.

¹⁰Ken ônov mba Bani yô, lu Shelomiti wan u Yoshifia man nomsombaiorov deri man akunduatar a na imôngo.

¹¹Man ken ônov mba Bebai yô, lu Sekaria wan u Bebai man nomsombaiorov ikundu kar anigheni a na imôngo.

¹²Man ken ônov mba Asegadi yô, lu Yohanan wan u Hakatan man nomsombaiorov deri môm man pue, a na imôngo.

¹³Ken ônov mba Adonikam, ka mba ve mase van la, ati a ve er: Elifeleti man Yeuel man Shemaia man nomsombaiorov akunduatar a ve imôngo.

¹⁴Ken ônov mba Bigevai yô, lu Utai man Sabudi man nomsombaiorov akunduatargber a ve imôngo.

¹⁵M kohol ve imôngo hen ifi u senen shin Ahava la; se za haa her, se tsa ayange atar; m nenge ior kua upristi, kpa ônov mba Levi yô, m nenge a mô ve ga.

¹⁶Tsô m tindi Elieser man Ariel man Shemaia man Elnatan man Yaribi man Elnatan man Natan man Sekaria man Meshulam, ka mbavesen je la, kua Yoyaribi man Elnatan, mba ve lu mbatesen la;

¹⁷m tindi ve mer, ve̱ za hen Ido, orhemen u hen ijiir i Kashifia la, man shi m kaa ve kwagh u ve̱ za kaa Ido kua anmgbianev nav, mbasôrontempel mba hen ijiir i Kashifia la, sha u ve̱ va se a mbatomov sha ci u iyou i Aôndo wase.

¹⁸Tsô sha uwegh ku doon ku Aôndo wase ku ku lu a vese yô, ve va se a orfankwagh u ken ônov mba Mahali wan u Levi, wan u Iserael, ka Sherebia a ônov nav kua anmgbianev nav, ior pue kar anigheni je la;

¹⁹man Hashabia man Yeshaia ken ônov mba Merari, man anmgbianev nav kua ônov vev a na imôngo, ve lu ior ikundu;

²⁰man mbasôrontempel mbagenev, mba Davidi kua atiator a na, na ve sha ci u tom u Mbalevi la yô; mbasôrontempel la lu deri uhar man ikundu; ve cii i ter va sha ati.

²¹Nahan m yôô kwaghyan u hôron her, hen ifi u Ahava, sha u se̱ hide a ayol a ase ijime sha ishigh ki Aôndo wase, man se̱ sôn iveren Na sha zende wase man mbayev asev kua akaa a se lu a mi cii.

²²Gadia kunya kôrom u sônon tor er a̱ nam ikum i mbautyav kua mbaanyinyav sha u wasen se sha mbaihomov asev sha gbenda; gadia se vande ôron kwagh a tor ser: Uwegh ku Aôndo wase ku a mbakeren Un cii sha u Una er a ve dedoo yô, kpa agee Na gema nga num a mba ve undu Un cii, iyugh Na kpaa nahan.

²³Tsô se hôr kwaghyan se sôn Aôndo wase sha ci u kwagh ne; A rumun msen wase kpaa.

²⁴Tsô m tsegha ior pue kar uhar ken upristi mba tamen, lu Sherebia man Hashabia, man anmgbianev vev ior pue a ve imôngo;

²⁵m kar ve azurfa man zenaria kua ikav, ka iwua sha ci u iyou i Aôndo wase, i tor kua atiator a na man uityombaiorov nav man Iserael mba ve lu heregh la cii, ve na yô;

²⁶m kar azurfa utalenti deri ataratar man akunduahargber m na sha ikev ve, man ikav mbi azurfa kuma utalenti deri, zenaria kpaa utalenti deri;

²⁷man ayongo a zenaria ikundu, kuma udariki dubu; man atasa ahar a togula a dedoo a engem, a lu a inja kpishi er zenaria nahan.

²⁸Tsô m kaa a ve mer, i tsegha ne sha ci u TER, ikav kpaa i tsegha mbi; man azurfa man zenaria ka nagh ku sha ishima i dedoo ku i ne TER, Aôndo u uter enev.

²⁹Yô, ver nen ishima, kura nen mbi, zan zan shighe u né kar myohom ma mbi sha ishigh ki upristi mba tamen kua Mbalevi man mbavesen mba sha uya mba uter mba Iserael ken Yerusalem ken ukpar man ken iyou i TER.

³⁰Tsô upristi kua Mbalevi ngohol myohom ma azurfa man zenaria man ikav, sha u zan a mi ken iyou i Aôndo wase ken Yerusalem.

³¹Tsô se mough hen ifi u Ahava sha uwer u hiihii ayange a u pue kar ahar sha u zan ken Yerusalem; uwegh ku Aôndo wase kpaa lu a vese, A yima se sha ikev i orihom kua i ornumungbenda.

³²Nahan se va ken Yerusalem, se va tsa her ayange atar.

³³Sha iyange i sha unyiin la, i kar myohom ma azurfa man zenaria man ikav ken iyou i Aôndo wase, i gema i na sha ikev i Meremoti wan u pristi Uria; Eleasar wan u Pinehashi lu a na; man Mbalevi, Yosabadi wan u Yeshua, kua Noadia wan u Binui lu a ve imôngo;

³⁴i ôr iyenge i mbi, man i kar myohom ma mbi; i nger myohom ma mbi cii hen shighe la.

³⁵Ônov mba mbakwarev mba ve due ken uikangen la, ve na Aôndo u Iserael iniav mbi nanden: anomabua pue kar ahar sha ci u Iserael cii, anomaiyôngo akunduanyiingber kar ataratar, agumaiyôngo akunduatargber kar ataankarahar, ukpev pue kar uhar sha ci u nagh ku isholibo; angan cii lu nagh ku nanden sha ci u TER.

³⁶Man shi ve gema imo i tor i i nger i a nger la, ve na mbatarev mba tor man ugomna mba yande Ifi la; nahan ve wase ior kua iyou i Aôndo kpaa.