Read tiv Nehemia 12 Bible Online

Nehemia 12 - tiv bible

Nehemia 12

¹Upristi kua Mbalevi mba ve kôndo a Serubabel wan u Shealtiel, man Yeshua imôngo yô, ka: Seraia, Yeremia, Esera,

²Amaria, Maluki, Hatushi,

³Shekania, Rehum, Meremoti,

⁴Ido, Ginetoi, Abiya,

⁵Miyamin, Maadai, Bilga,

⁶Shemaia, Yoyaribi, Yedaia,

⁷Salu, Amoki, Hilkia, Yedaia; mban lu mbahemenev mba upristi man mba anmgbianev vev sha ayange a Yeshua la.

⁸Man shi Mbalevi yô, lu: Yeshua, Binui, Kademiel, Sherebia, Yuda, man Matania u a lu orhemen sha atsam a wuese la, un a anmgbianev nav,

⁹Bakebukia man Uno, anmgbianev vev mbala lu sha ishigh vegh sha iniongo ve i sha tom ve.

¹⁰Yeshua mar Yoyakim, Yoyakim gema mar Eliashibi, Eliashibi gema mar Yoyada,

¹¹Yoyada gema mar Yonatan, Yonatan gema mar Yadua.

¹²Sha ayange a Yoyakim la, upristi mba ve lu mbavesen mba sha uya mba uter yô, u hen Seraia lu Meraia; u Yeremia lu Hanania;

¹³u Esera lu Meshulam; u Amaria lu Yehohanan;

¹⁴u Maluki lu Yonatan; u Shebania lu Yosev;

¹⁵u Harim lu Adena; u Merayoti lu Helkai;

¹⁶u Ido lu Sekaria; u Gineton lu Meshulam;

¹⁷u Abiya lu Shikeri; u Miniamin u Moadia la, lu Piltai;

¹⁸u Bilga lu Shamua; u Shemaia lu Yehonatan;

¹⁹u Yoyaribi lu Matenai; u Yedaia lu Ushi;

²⁰u Salai lu Kalai; u Amoki lu Eber;

²¹u Hilkia lu Hashabia; u Yedaia lu Netanel.

²²Sha kwagh u Mbalevi yô, sha ayange a Eliashibi man Yoyada man Yohanan man Yadua, i nger mba vesen sha uya mba uter kua upristi kpaa zan zan ar sha ayange a tor Dariu, Orpershia, la.

²³I nger ônov mba Levi, mbavesen mba sha uya mba uter ken ruamabera u abaver zan zan ar sha ayange a Yohanan wan u Eliashibi.

²⁴Mbahemenev mba Mbalevi yô, lu: Hashabia, Sherebia man Yeshua wan u Kademiel; anmgbianev vev lu sha ishigh vegh, sha u wuese man u sughun sha ikaan i Davidi or u Aôndo sha iniongo iniongo.

²⁵Matania man Bakebukia, Obadia, Meshulam, Talmon man Akubi, ve lu mbakuranihinda, ve lu kuran ayou a koson ikav ker, a hen ihinda la.

²⁶Mban lu sha ayange a Yoyakim wan u Yeshua, wan u Yosadaki, man sha ayange a gomna Nehemia, man pristi Esera, orngeren la.

²⁷Tsô sha shighe u mtsegh u gilgar u Yerusalem la yô, ve ker Mbalevi sha ajiir a ve cii, sha u van a ve ken Yerusalem sha u va ember mtsegh la, a iember man sha ishughun kua atsam a wan man sha ukwen man mbaadiguve kua umolo.

²⁸Tsô ônov mba mbawanatsam kohol imôngo, ve due hen tar u u kase Yerusalem la, man hen angarev mba Mbanetofati kpaa,

²⁹man hen Betegilgal man hen akôngo a Geba man Asemaveti; gadia mbawanatsam maa agar a ve, kase Yerusalem yisa.

³⁰Upristi kua Mbalevi wanger ayol a ve; shi ve wanger ior man ihindagar kua gilgar kpaa.

³¹Nahan m unde a atiator a Yuda sha gilgar, m ver ior iniongo ihiar i vesen i wan atsam a wuese, ve zan sha nongo nongo; nongo u môm lu zan sha gilgar vegher u sha uwegh ku yanegh hen Hundagar u Ihôgh;

³²ken ijime ve yô, Hoshaia man vegher u atiator a Yuda dondo,

³³man Asaria, Esera man Meshulam,

³⁴Yuda, Benyamin, Shemaia man Yeremia,

³⁵man ônov mba upristi mbagenev a ikor: Sekaria wan u Yonatan, wan u Shemaia, wan u Matania, wan u Mikaia, wan u Sakur, wan u Asav;

³⁶kua anmgbianev nav, Shemaia, Asarel, Milalai, Gilalai, Maai, Netanel, Yuda man Hanani, ve lu a ityogholov mbi Davidi or u Aôndo; Esera orngeren lu ve sha hemen.

³⁷Hen Hundagar u Imbor ve kôndo sha ishigh vegh jighilii sha agbur a unden zan sha gar u Davidi, hen ijiir i unden sha gilgar hen ya u Davidi, zan zan ar hen Hundagar u Mnger vegher u sha ityoughkitaregh.

³⁸Nongo ugen u wan atsam a wuese la, lu zan sha u za keghen ve gbenda, mo kpaa m dondo ve a vegher u ior sha gilgar sha gôgôyou u taven u atsegh zan zan ar sha gilgar u gbanger la je;

³⁹man sha Hundagar u Eferaim man Hundagar u Tse man Hundagar u Ishu man gôgôyou u taven u Hananel man gôgôyou u taven u Hamea kpaa, zan zan ar hen Hundagar u Iyôngo; hen Hundagar u Orkuran yô, ve tile her.

⁴⁰Nahan iniongo ihiar i wan atsam a wuese tile ken iyou i Aôndo, mo kpaa kua vegher u mbatarev a mo imôngo;

⁴¹man shi upristi: Eliakim, Maaseia, Miniamin, Mikaia, Elioenai, Sekaria man Hanania, ve lu a ikor;

⁴²man Maaseia man Shemaia man Eleasar man Ushi man Yehohanan man Malkiya man Elam man Eser. Mbawanatsam genger imo, a Yeserahia orhemen ve.

⁴³Ve na iniav kpishi sha iyange la, ve ember; gadia Aôndo na ve ve ember zegeiember; kasev kua mbayev kpaa ve lu ember; nahan i ungwa iember i Yerusalem ca je.

⁴⁴Sha iyange la i ver ior sha u nengen sha ayou a koson akaa ker, ka iniav mbi kenden sha, man iyiav mbi tsutswav, man môm-ken-upue mba akaav, man sha u ve̱ kohol akaa ker a i tsough a ken ishule i agar sha ci u upristi kua Mbalevi sha tindi la, gadia Yuda ember sha ci u upristi kua Mbalevi mba ve til sha tom la.

⁴⁵Ve wa tindi u Aôndo ve iko, man tindi u wanger akaa, kape mbawanatsam kua mbakuranhunda kpaa ve er sha imo i Davidi man i wan na Solomon la.

⁴⁶Gadia hii sha ayange a Davidi man Asav, tsuaa la je, orhemen u mbawanatsam lu, kua atsam a wuese man a sughun Aôndo kpaa.

⁴⁷Sha ayange a Serubabel man sha ayange a Nehemia la, Iserael lu nan mbawanatsam man mbakuranhunda kwar sha gbayol ve u hanma iyange je; ve tsegha akaa sha ci u Mbalevi, Mbalevi di kpaa gema tsegha sha ci u ônov mba Aron.