Read tiv Nehemia 13 Bible Online

Nehemia 13 - tiv bible

Nehemia 13

¹Tsô sha iyange la, ve ôr ken ruamabera u Mose sha ato a ior; i nger kimi er, or u Amon man or u Moabi nana̱ de nyer ken mkohol u ior mba Aôndo mayange je ga;

²gadia ve kegh Mbaiserael gbenda a kwaghyan man mngerem ga, ve gema ve ôr tôndo a Balaam er a̱ wa ve ifan; kpa Aôndo wase gema ifan la hingir iveren.

³Tsô zum u ve ungwa atindi yô, ve sange ior mba ve lu nungwa nungwa mbala cii ken Iserael kera.

⁴Tsuaa la, pristi Eliashibi u i ver un sha u nengen sha ukpar mba ken iyou i Aôndo wase, er a lu anmgbian u Tobia yô,

⁵a sôr un zegekpar henpe ngise ve koson iniav mbi sha samuyia man kwaghhumandoon man ikav man môm-ken-upue u alakema man wain man mkurem, akaa a i na Mbalevi man mbawanatsam man mbakuranhunda sha tindi, kua iniav mbi kenden sha sha ci u upristi la.

⁶Kpa sha shighe la cii, m lu ken Yerusalem ga; gadia sha inyom i sha ikundugber kar uhar i Artashaseta tor u Babilon la, m za hen tor; man ayange nga kar yô, m sôn tor ian,

⁷tsô m va hen Yerusalem. Nahan m va kav kwaghbo u Eliashibi er la, er a sôr iyou hen kungur u iyou i Aôndo sha ci u Tobia yô.

⁸Ishima vihim kpishi, nahan m kura ikav mbi ken iyou i Tobia cii, m haa mbi ken won;

⁹shi m kaa mer, ve̱ wanger ayou la; shi m hide a ikav mbi iyou i Aôndo her, man iniav mbi sha samuyia kua kwaghhumandoon.

¹⁰Shi m nenge er i lu nan Mbalevi kwar ve ga yô, nahan Mbalevi man mbawanatsam, ve mba ve lu eren tom la, ve yevese, hanma or yem hen sule u nan.

¹¹Nahan m zôhô a mbatarev, m kaa mer: Ka nyi i gbihi iyou i Aôndo nahana? Tsô m kohol ve imôngo m hide a ve sha tom ve.

¹²Nahan Yuda cii, va a môm-ken-upue u alakema man u wain man u mkurem, va ver ken ayou a koson akaa ker la.

¹³Man m ver mba nengen sha akaa a a lu ken ayou a koson akaa ker la, lu pristi Shelemia man orngeren Sadoki; man ken Mbalevi yô, lu Pedaia. Or u wasen ve yô, lu Hanan wan u Sakur wan u Matania, gadia i nenge ve ve lu mba jighjigh; tom ve yô, lu u karen anmgbianev vev kwar.

¹⁴Umbur mo Aôndo wam sha kwagh ne, de esen aeren a am a dedoo a m er sha ci u iyou i Aôndo wam kua sha ci u ityom i i la kpaa kera ga.

¹⁵Sha ayange la je, m nenge ior mbagenev ken Yuda mba ve lu shoghol atam a wain ken ahungwa sha iyange i memen, shi ve lu nyôron a aile a alakema ve penda a sha ujaki, kua wain man atam a wain man a tur man hanma injauika kpaa, ve va a mi ken Yerusalem sha iyange i memen; nahan m pase ve ibo ve sha iyange i ve lu teen kwaghyan la.

¹⁶Ior mba Tiru mbagenev kpaa mba ve tema ker, ve va a ishu kua hanma injauika i kasua, ve lu va teen sha iyange i memen hen Mbayuda ken Yerusalem je.

¹⁷Nahan m zôhô a mbatamen mba Yuda, m kaa a ve mer, ka nyi kwaghbo ne eren ne, ne hôngor iyange i memen nahana?

¹⁸Kape uter enev lu er je ne man Aôndo wase kpaa va a ican ne cii sha a vese man sha gar ne kpaa gaa? Nahan kpaa ne seer iyugh sha Iserael er ne hôngor iyange i memen ne.

¹⁹Tsô zum u ime hii u wan hen ihindagar i Yerusalem, er iyange i memen lu a kuma ga yô, m kaa mer, i̱ wuhe ihindagar, man shi m kaa mer, i̱ de kera bughun i ga, saa iyange i memen ia bee kera ve; shi m ver mbatomov av mbagenev sha u nengen sha ihinda sha u i̱ de kera nyer a ikav her sha iyange i memen ga yô.

²⁰Nahan mbakasuav man mbateen kasua u hanma injauika la, ve va tsa ken akôngo a Yerusalem kwa môm shin kwar har.

²¹Tsô m yange ve, m kaa a ve mer, ka nyi ne tse hen kpe u gilgara? Aluer né shi né er nahan yô, me de ne ga. Hii hen shighe la je zan zan ve kera seer van sha iyange i memen ga.

²²Shi m kaa a Mbalevi mer, ve̱ wanger ayol a ve, ve̱ va, ve̱ va kura ihindagar, sha u tseghan iyange i memen. Umbur mo Aôndo wam sha kwagh ne kpaa, man shi tsegham sha erdoo Wou u U lu a mi yum la.

²³Sha ayange la kpaa, shi m nenge Mbayuda mba ve er kasev ken Ashedodi man ken Amon kua ken Moabi;

²⁴ônov vev mbagenev lu lamen zwa u Ashedodi, ve fatyô u ôron zwa u Mbayuda ga, saa di zwa u ma ikur igen la tsô.

²⁵Nahan m zôhô a ve, m wa ve ifan, m gbidye mbagenev, m gbera ve ice, m er ve ve bum Aôndo, m kaa mer: De kera ne nen ônov enev mba kasev ner, ônov vev mba nomso ve̱ er ga, man shi de kera eren nen ônov vev mba kasev sha ci u ônov enev mba nomso ga, shin sha ci wen ayol a en kpaa ga.

²⁶Kera lu sha akaa ne man Solomon tor u Iserael er kwaghbo gaa? Ken akuraior kpishi ma tor ugen kuma sha a na ga, man un doo Aôndo ishima kpaa, Aôndo kpaa ver un tor sha Iserael cii, nahan kpaa kasev mba akuraior agen na un a er kwaghbo.

²⁷Nahan er se ungwa ser ne er zegekwaghbo ne cii, ne per tindi u Aôndo wase, ne er kasev mba akur agen, doo je kpa?

²⁸Wan ugen u Yoyada, wan u zegepristi Eliashibi, lu wankem u Sanbalati, Orhoron; nahan m zenda u her a mo kera.

²⁹Umbur ve Aôndo wam, gadia ve hôngor tom u upristi kua ikuryan i upristi man i Mbalevi.

³⁰Kape m wanger ve, m pav ve a atôatyev cii la, shi m ver iniongo i tom i upristi man Mbalevi, hanma or sha tom u nan,

³¹man shi u van a ikon sha ashighe ashighe, kua iyiav mbi tsutswav kpaa. Umbur mo Aôndo wam, verem, doo doo.