Read tiv Nehemia 2 Bible Online

Nehemia 2 - tiv bible

Nehemia 2

¹Tsô sha uwer u Nisan, sha inyom i sha ikundu i tor Artashaseta la, er wain lu un sha ishi yô, m tôô wain, m kende m na tor. Kpa kera keke yô, m vanden vihin ishigh sha, sha ashe na ga.

²Tsô tor kaa a mo er: Ka nyi u vihi ishigh sha, er angev kpaa mbu ker u ga nee? Ka kwagh ugen ga, ka ishima i vihin. Nahan cier mo iyol kpishi.

³M kaa a tor mer: Tor a̱ tsa sha won gbem; á er nan man ishigh yagh kia vihi sha ga, er gar u iwar i uter av i lu ker la, a gem a hingir ice, ihinda na kpaa i hie kera nahana?

⁴Tsô tor kaa a mo er: Ka nyi i sar uwe? Nahan m sôn Aôndo u Sha.

⁵M gema m kaa a tor mer: Aluer tor una rumun, man aluer wanakiriki wou ne, a doo u a na yô, nam gbenda m̱ za hen Yuda, hen gar u iwar i uter av i lu ker la, m̱ za maa un.

⁶Tsô er pendatyo u tor tema un hen ikooso la, tor pinem er: Ú tsa zende ayange a me, man ka hanma iyange ú hidee? Nahan doo tor u nan mo gbenda; tsô m ver un ayange,

⁷m kaa a tor mer: Aluer tor una rumun yô, ma a nem uwashika mba za nan ugomna mba yande Ifi la, sha u ve̱ de m̱ kar zan zan m̱ nyôr ken Yuda yô;

⁸man shi washika u za nan Asav orkuran ikô i tor la, sha u a̱ nam ikon sha ci u ihinda i iyouitya i i lu hen tempel la, man shi sha ci u gilgar, man sha ci u iyou i me za nyôr her yô. Tor rumun a mo, gadia uwegh ku Aôndo wam ku doon ku lu a mo.

⁹Tsô m va ar hen ugomna mba yande Ifi la, m na ve uwashika mba tor mbala. Tor tindi ukurmbautyav man mbaanyinyav a mo imôngo kpaa.

¹⁰Zum u Sanbalati Orhoron man Tobia ortom, Oramon la, ve ungwa ahula er orgen nan ve u va keren mkpeyol sha ci u Mbaiserael yô, gema vihi ve kpishi.

¹¹Tsô m va nyôr ken Yerusalem, m tsa ayange atar;

¹²nahan m mough tugh, mo a ior kpuaa; kpa m ôr ma or kwagh u Aôndo A tesem ken ishima u me er sha ci u Yerusalem la ga; ma zendenya kpaa lu a mo imôngo ga, saa di zendenya u m henda la tsô.

¹³Tsô m due tugh, m kar hen Hundagar u Pev, m za hen Ijôr i Iyô man hen Hundagar u Ihôgh la, m gba kenger ukpekpe mba Yerusalem mba ve tsehe la, man ihinda na i usu u hie i la kpaa.

¹⁴Tsô m kar m za hen Hundagar u Imbor man hen Ityungu u Tor; kpa ian lu i zendenya u m henda la, una kar ga.

¹⁵Tsô m kôndo shin pev tugh, m gba kenger kpekpe; nahan m gema m nyôr hen Hundagar u Pev la, m hide.

¹⁶Kpa mbatarev yô, ve fa her ape m ze, shin kwagh u m er kpaa ga; Mbayuda kpaa, m lu a kaa ve ga, shin upristi shin mbatamen shin mbatarev shin mba ve lu eren tom la kpaa.

¹⁷Tsô m kaa a ve mer: Ne nenge imbacan i se lu ken i ne, er Yerusalem a hingir ice man ihinda na kpaa usu hia i kera; yô, va, sé maa nen gilgar u Yerusalem sha er sé kera lu kwagh u lahan ga yô.

¹⁸Shi m ôr ve kwagh u uwegh ku dedoo ku Aôndo wam ku ku lu a mo la, kua akaaôron a tor ôrom yô. Tsô ve kaa er: Sé mough, sé cinge nen mi u maan je. Nahan ve taver ishima sha ci u tom u dedoo ne.

¹⁹Kpa zum u Sanbalati Orhoron man Tobia ortom, Oramon la, kua Geshem Orarabia, ve ungwa ahura yô, ve se se ibumegh, ve laha se, ve kaa er: Ka nyi kwagh ne eren nee? Ka ne pe hendan a tor zee?

²⁰Tsô m gema m kaa a ve mer: Ka Aôndo u Sha Una na se ikôr-laghen ye, nahan se mbayev Nav sé mough, sé maa; kpa ne yô, ne mba a ma ci shin ian shin kwagh u umbur ken Yerusalem kpaa ga.