Read tiv Nehemia 4 Bible Online

Nehemia 4 - tiv bible

Nehemia 4

¹Kpa zum u Sanbalati ungwa er se lu maan gilgar yô, ishima vihi un, ishima nyoon un tsung, nahan a gba nahan Mbayuda tar;

²a ôr kwagh sha ishigh ki anmgbianev nav kua ikumutya i Samaria, a kaa er: Ka nyi Mbayuda aseeraior ne a erene? Á gba den ve, ve̱ za hemen tsôô? Vea na nagha? Vea kure tom iyange i mômô? Vea nder awen ken atihialôgh a i nande a kera la?

³Yô, Tobia Oramon la, lu a na ikua, a gema a kaa er: Kwagh u ve maa la yô, icôngo tsô kpaa ia unde sha gil ve u awen la, una yôhôl kera.

⁴Ungwa, Aôndo wase, mba lahan se; yô, hide a ilyahan ve la sha ityough vegh, na ve ve̱ hingir ishar i yan ken tar u á za a ve uikangen ker la,

⁵de cirin ifer ve ga, man shi de esen asorabo a ve sha ishigh You kera kpaa ga; gadia ve bam U sha ishigh ki mbamaan je.

⁶Nahan se maa gil la; gilgar cii zua zan zan za ar her atô u ityaven na; gadia ior kange ishima sha tom.

⁷Kpa zum u Sanbalati man Tobia man Mbaarabia man Mbaamon kua Mbaashedodi ve ungwa er mser u gilgar u Yerusalem la lu zan hemen, man i hii u kondon a-an a i pev un la yô, asema vihi ve tsung;

⁸nahan ve cii ve zua zwa ishima i môm er vea va nôngo ityav a Yerusalem, vea na anzughul.

⁹Kpa se yô, se sôn Aôndo wase, shi se ver mbakuran atetan man tugh sha ci u kwagh ve la, sha u yangen ve.

¹⁰Tsô Yuda kaa er: Agee a mbatôônikav yina man alôgh ngee kpishi, nahan se kera fatyô, u maan gilgar ga.

¹¹Mbaihomov asev kpaa kaa er: Ve̱ de fe ga, mnenge kpaa ve̱ de nengen ga, nahan sé za nyôr her atô ve, sé wua ve, sé bunde tom la.

¹²Tsô zum u Mbayuda mba ve tem ikua a ve la za va yô, ve kaa a vese kuma kwa pue je er: Mba duen hanma ian sha u va tan num a vese.

¹³Nahan m ver ior shin ajiir a hemban gban apev a a lu gbar gbar ken ijime i gilgar la, m ver ve sha icombor ve, a usanker vev man awange a ve man avaan a ve.

¹⁴M nenge, nahan m mough, m kaa a mbatamen man mbatarev man ior mbagenev, mer: De cie nen ve ga; umbur nen TER u A hembe A cier iyol la, nôngo nen ityav sha ci u anmgbianev enev man ônov enev mba nomso man mba kasev man kasev enev kua uya enev.

¹⁵Tsô zum u mbaihomov asev ungwa er se fe kwagh shon, man shi Aôndo kpaa A gem mhen ve a hingir gbilinkwagh yô, nahan se cii se hide hen gilgar, hanma or sha tom u nan.

¹⁶Tsô hii hen shighe la je zan zan ken hemen, mbatomov av, vegher môm lu eren tom, vegher ugen kôr awange ave man iperutya man avaan kua uriga mba iyôôv; mbatarev kpaa lu taver ya u Yuda cii ishima,

¹⁷sha tom u maan gil la. Mbatôônikav, ve wa ikav mbi utyav iyol; hanma or nan lu eren tom uwegh môm, uwegh kugenegh di nan kôr ikav mbi tswamev mbi nan;

¹⁸mbamaan kpaa, hanmô ve nan kange sanker u nan iwenge man nan lu maan ye. Ortôngonkorough lu a mo.

¹⁹Tsô m kaa mbatamen man mbatarev kua ior mbagenev mer: Tom ne gba ikôr ngu geghekeke kpaa, man se mba sha gil wue wue, orgen ka nan lu ca a orgen;

²⁰yô, sha hanma ijiir i ne ongo korough imo yô, va kohol nen se heregh. Aôndo wase Una nôngo ityav sha ci wase.

²¹Kape se lu eren tom shon ne; vegher ve ugen kôr awange ave, hii sha shighe u iyange ka i due la je, zan zan asan kar duen.

²²Ka hen shighe la je, m kaa a ior mer: Hanma or a wanye u nan, ve̱ tsa ken Yerusalem, ve̱ hingir se mbakuran tugh; atetan yô, ve̱ eren tom.

²³Nahan mo iyol yam man anmgbianev av man mbayev av kua ior mba kuran mba ve zenden a mo ityô yô, mô wase môm nan er ikav mbi iyolough kera ga; hanma or lu a ikav mbi utyav mbi nan kua mngerem.