Read tiv Eseter 3 Bible Online

Eseter 3 - tiv bible

Eseter 3

¹Ken masejime u akaa ne yô, tor Ahasueru na Haman wan u Hamedata, Oragagu la, hemen, a kende un sha, a ver un ikagh ki teman hemba atiator a a lu a na imôngo cii.

²Mbatomov mba tor cii, mba ve lu hen hundaya u tor la, ve ngurum, ve civir Haman; gadia kape tor wa tindi sha kwagh na la. Kpa Mordekai yô, ngurum ga, kuma ishigh inya kpaa ga.

³Nahan mbatomov mba tor mba ve lu hen hundaya u tor la, ve kaa a Mordekai er: Ka nyi u peren tindi u toro?

⁴Tsô er ve zer ôron a na ayange ayange, kpa a wa ve iko ga yô, nahan ve kaa Haman, sha u vea nenge er Mordekai shi una hemba yô, gadia a vande kaan ve er un lu Oryuda yô.

⁵Er Haman nenge Mordekai ngurum ga, man kuma ishigh inya kpaa ga yô, ishima nyoon Haman kpishi.

⁶Kpa u benden Mordekai ave tseegh yô, lu un kwagh u iheenegh; gadia ve pase un nongo u Mordekai. Nahan Haman gba nôngon u timin Mbayuda kera cii, mba ve lu ken tar u Ahasueru la cii, ka nongo u Mordekai je la.

⁷Sha uwer u hiihii, ka uwer u Nisan je la, sha inyom i sha pue kar uhar i tor Ahasueru la, ve haa Pur, ka ishor i eren je la, sha ishigh ki Haman, ayange ayange, sha uwer uwer zan zan ar sha uwer u sha pue kar uhar, ka uwer u Adar je la.

⁸Tsô Haman kaa a tor Ahasueru er: Ikurior igen ngi; ngi saratete, paleghaa, ken akuraior a a lu ken uipaven mba tar wou cii, atindi a ve nga kposo a hanma ikurior, mba we atindi a tor iko kpaa ga, nahan doo u tor á gba den ve nahan ga.

⁹Aluer tor a rumun yô, i̱ nger kwagh i̱ tim ve kera; yô, me na azurfa kuma utalenti dubu pue sha ikev i mbaerentom u tor la, sha u ve̱ seer un sha inyaregh ki tor yô.

¹⁰Tsô tor tsuwa kunya ken uwegh nagh, na Haman wan u Hamedata, Oragagu, orihom u Mbayuda la.

¹¹Tsô tor kaa a Haman er: Azurfa la yô, m na u, kua ior mbala kpaa, er a ve sha ishima you.

¹²Nahan i yila mbangeren mba tor sha uwer u hiihii ayange a u pue kar utar la, nahan i nger akaa a Haman kaa la cii, i tindi hen mbatarev mba tor, man hen ungomna mba ve lu sha hanma ipaven kua hen atiator a hanma ikurior kpaa, hen hanma ipaven sha mnger na, man hen hanma ikurior kpaa sha zwa u i; ka ken iti i tor Ahasueru i nger a ye, shi i ver ikav sha mi, sha kunya u tor kpaa.

¹³I tindi uwashika mbala sha ikev i mbatyomov sha uipaven mba tor cii, er, i̱ wua, i̱ tim Mbayuda kera cii, mbayevikaior man mbabeenyol, mbayev mba kiriki man kasev, sha iyange i môm, ka sha uwer u sha pue kar uhar ayange a u pue kar atar la, ka uwer u Adar je la; shi ve̱ kura akaa a ve, ve̱ ya ishar.

¹⁴I kaa ken kwaghngeren la er, i̱ wa tindi sha hanma ipaven, i̱ yôô ken akuraior cii, sha u ve̱ wa ago iyol sha ci u iyange la yô.

¹⁵Tsô mbatyomov mbala za fefa sha imo i tor, i yôô tindi la hen garutya u Shushan kpaa; tsô tor vea Haman tema u man kwagh; kpa gar u Shushan yô, nzughul.