Read tiv Eseter 4 Bible Online

Eseter 4 - tiv bible

Eseter 4

¹Tsô zum u Mordekai fa akaa a i er la cii yô, Mordekai ande akondo a na, ta mzemba uya, haa mtwem iyol, a kar hen atô gar a gbehe kwelegh tsung;

²a za va hen hunda u ya u tor je; kpa ma or nyôron hen hunda u tor a mzemba uya ga.

³Ken hanma ipaven henpe ikaan i tor man tindi na ve ar yô, mzungu lu kpishi ken Mbayuda, kua kwaghyan u hôron man mliam man kwelegh kpaa; man mbagenev kpishi yav sha aba man sha mtwe.

⁴Ônkasev mba Eseter man mbaeren un tom ken iyou ve va, ve va ôr un, nahan ishima vihi pendatyo u tor kpishi, tsô a tindi ikondo er i̱ za haa Mordekai i̱ sagh un mzemba uya kera, kpa a venda u ngohol i.

⁵Nahan Eseter yila Hataki, u môm ken mbaerentom ken iyou i tor u i ver un er a̱ nengen sha a na la, a kaa a na er a̱ za hen Mordekai, a̱ za fa kwagh shon la man inja na kpaa.

⁶Tsô Hataki due za hen Mordekai hen zegetembe u gar u a lu sha ishigh ki hunda u ya u tor la.

⁷Tsô Mordekai ôr un kwagh u a tser un cii, man inyaregh ki Haman a tende zwa er una na ki i̱ seer ki sha inyaregh ki tor la, sha u timin Mbayuda cii.

⁸Shi a na un takerada u i kura tindi u i wa ken Shushan sha u timin ve la ker yô, er a̱ za tese Eseter man a̱ pase un inja na kpaa; man shi a̱ kaa un er, a̱ za nyôr hen tor a̱ zamber a na man a̱ sôn un sha ci u nongo na kpaa.

⁹Tsô Hataki va, va ôr Eseter kwaghôron u Mordekai la.

¹⁰Nahan Eseter ôr kwagh a Hataki, gema tindi un a loho hen Mordekai, er:

¹¹Mbatomov mba tor cii, man ior mba sha uipaven mba tor ve fa er hanma or, shin nomsoor shin kwase, u i yer nan ga yô, u nana gba nyôron hen tor hen tembe u ken atô la, ijir i nan ngi môm tsô, ka u wuan nan, saa or u tor una naregh nan tôgh ku zenaria la, ka nan tseegh nana war ye; kpa hegen ka ayange ikundugber je ne, mba a yilam er m̱ nyôr hen tor ga.

¹²Tsô ve za ôr Mordekai kwaghôron u Eseter la nahan.

¹³Nahan Mordekai kaa er, ve̱ hide, ve̱ za kaa Eseter nahan, er: De henen wer, we ú war hen ya u tor, man Mbayuda mbagenev cii yô, ve̱ saa ga.

¹⁴Gadia aluer u huan ving hen shighe ne yô, iwasen man myom una va hen Mbayuda hen ma ijiir igen, kpa we a ya u teru yô, né tim; ka an nan fe, alaghga ka sha kwagh ne je man u zough a icivir i tor hen shighe ne ye gaa?

¹⁵Tsô Eseter kaa ve, ve̱ za kaa Mordekai er:

¹⁶Za za kohol Mbayuda cii, mba ve tem ken Shushan yô, hôr nen kwaghyan sha ci wam, de ye nen kwagh ga, de me nen kwagh ga, tugh man atetan zan zan ayange atar; kape mo a ônkasev av kpaa sea hôr kwaghyan ne; ka nahan man me za nyôr hen tor, a lu sha tindi ga kpaa ye; aluer mea saa yô, m saa di je ve.

¹⁷Nahan Mordekai mough yem za er kwagh u Eseter kaa un la cii.