Read tiv Eseter 7 Bible Online

Eseter 7 - tiv bible

Eseter 7

¹Tsô tor kua Haman ve va hen iniongo i pendatyo Eseter.

²Sha iyange i sha uhar i iniongo i wain la, tor shi kimbir pinen Eseter er: Ka nyi i sar uwe, pendatyo Esetere? Á na u je; man ka nyi u sene? Á lu vegher u tartor je kpaa á na u.

³Tsô pendatyo Eseter gema kaa er: Aluer a doo u a mo yô, tor, man aluer a doo tor nahan kpaa yô, i̱ nam uma wam sha zamber wam, kua uma u nongo wam kpaa sha msen wam.

⁴Gadia i tee se, mo a nongo wam er, i̱ sar se, i̱ wua se, i̱ tim se kera. Kpa aluer á tee se sha u sé gba lun ikpan i nomso man u i ukase tsô yô, ma m huan, gadia ican yase la ma i kom u á za tor iyol sha i ga.

⁵Tsô tor Ahasueru ôr kwagh, kaa a pendatyo na Eseter er: Or shon ka ana, man nan ngu hana, u nan we ishima u eren kwagh nee?

⁶Tsô Eseter kaa er: Orhendan man orihom ka Haman iferor ne. Tsô cier Haman iyol a tor kua pendatyo.

⁷Nahan tor mough a iyugh hen iniongo i wain, yem hen sule u hen ya u tor; tsô Haman kighir mough tile sha, gba zamber a pendatyo Eseter sha ci u uma na; gadia a nenge tor ver ishima u eren un kwagh u bo je.

⁸Er tor za hide hen sule u ya u tor la, va nyôr hen ijiir i iniongo i wain yô, nenge, Haman yav sha gambe u Eseter tema la. Tsô tor kaa er: Una er pendatyo kwaghvihin sha ishigh yagh je, ken iyou nee? Er kwaghôron ne due tor ken zwa nahan yô, ve cir ishigh ki Haman kera kpaa.

⁹Tsô Harbona, u môm ken mbaerentom ken iyou i tor, mba ve lu sha ishigh ki tor la, kaa er: Yô, nenge, kon u taven aseva akunduahargber, u Haman a tim sha ci u Mordekai u a ôr kwagh u dedoo sha ci u tor la, ngu hen ya u Haman. Tsô tor kaa er: Za sende un sha u.

¹⁰Nahan ve za sende Haman sha kon u a tim sha ci u Mordekai la. Tsô ishima yôhôl tor.