Read tiv Eseter 9 Bible Online

Eseter 9 - tiv bible

Eseter 9

¹Tsô sha uwer u sha pue kar uhar, ka uwer u Adar, ayange a u pue kar atar la, zum u imo i tor kaa la kua tindi na mgbôghom sha u á er sha mi, sha iyange i mbaihomov mba Mbayuda ver asema u hemban ve la yô (kpa kwagh shon gema hingir u Mbayuda vea zua a agee sha mbakôron ve ihom la),

²Mbayuda kohol ken agar a ve han han kpaa, ken uipaven mba tor Ahasueru cii, sha u vea za ave sha mba ve lu nôngon u eren ve kwagh u bo la; ma or fatyô u tilen ve sha ishi ga, gadia akuraior cii lu cian ve.

³Atiator a sha uipaven cii, kua mbatarev man ugomna man mba ve eren tom u tor, ve wase Mbayuda; gadia kwagh u Mordekai ta ve mciem iyol.

⁴Gadia Mordekai lu shagbaor ken ya u tor, gwa u iti na samber sha uipaven mbala cii; gadia Mordekai shon la za hemen hemen a icivir.

⁵Tsô Mbayuda gber mbaihomov vev cii sha sanker, ve wua ve, ve tim ve kpaa, ve er kwagh u a sar ve u eren a mbaihomov vev yô.

⁶Ken garutya u Shushan yô, Mbayuda wua ior deri utaan, tim ve kera.

⁷Shi ve wua Parshandata man Dalfon man Asepata

⁸man Porata man Adalia man Aridata

⁹man Parmasheta man Arisai man Aridai kua Vaisata,

¹⁰ka ônov mba nomso pue mba Haman wan u Hamedata, orihom u Mbayuda la; kpa akaa ve yô, ve bende ave sha mi ga.

¹¹Sha iyange la je, i va tor a iyenge i ior mba i wua hen gar u Shushan yô.

¹²Tsô tor kaa a pendatyo Eseter er: Mbayuda wua, tim ior deri utaan ken garutya u Shushan, kua ônov mba Haman mba puev la kpaa; man hire ken uipaven mba tor mbagenevee? Yô, ka nyi i sar uwe? Á na u je; man ka nyi shi u sene? Á er u un je.

¹³Tsô Eseter kaa er: Aluer a doo tor yô, i̱ rumun Mbayuda mba ve lu ken Shushan, kper kpaa ve̱ er sha tindi u nyian ne nahan, man i̱ hambe ônov mba Haman mba puev mbala sha kon.

¹⁴Tsô tor kaa er, i̱ er nahan; nahan i wa tindi ken Shushan, ve hambe ônov mba Haman mba puev mbala sha kon.

¹⁵Mbayuda mba ve lu ken Shushan la, ve kohol sha uwer u Adar ayange a u pue kar anyiin la kpaa, ve wua ior ken Shushan deri utar, kpa akaa a ve yô, ve bende ave sha mi ga.

¹⁶Mbayuda mbagenev mba ve lu ken uipaven mba tor la, ve kohol ve nôngo sha ci u uma ve, pever ve iyol a mbaihomov, ve wua mba ve ker ve ihom mbala ior dubu akunduatargber kar utaan; kpa akaa a ve yô, ve bende ave sha mi ga.

¹⁷I er kwagh ne sha uwer u Adar ayange a u pue kar atar la; ayange a u pue kar anyiin la yô, ve mem, ve ver i, hingir iyange i iniongo man i iember.

¹⁸Kpa Mbayuda mba ve lu ken Shushan la yô, ve kohol sha ayange a u pue kar atar kua sha ayange a u pue kar anyiin la kpaa; sha ayange a u pue kar ataan la ve mem, ve ver i, hingir iyange i iniongo man i iember.

¹⁹Mbayuda mba ken angarev mba ve tema ken agar a lun a ugir ga la, ve gema ve ver uwer u Adar ayange a u pue kar anyiin la, hingir iyange i iember man i iniongo, man iyange i lun saan saan, man i tindin a iwua hen ayol a ve.

²⁰Mordekai nger akaa ne, tindi uwashika hen Mbayuda cii, mba ve lu ken uipaven mba tor Ahasueru cii, mba ikua ikua man mba icaa kpaa,

²¹sha u kaan ve u wan uwer u Adar ayange a u pue kar anyiin la iko, kua ayange a u pue kar ataan la kpaa, sha anyom anyom,

²²er ka ayange a Mbayuda zua a mmem sha mbaihomov vev la, man uwer u i gema ishimavihin ve, hingir iember la, man ijungwen hingir iyange i msaanyol; sha er ve̱ gema a, a̱ hingir ayange a iniongo kua a iember, man a tindin iwua hen ayol a ve, kua hen mbaatsanev kpaa.

²³Kwagh ne hingir ieren i Mbayuda er ve vande hiin u eren la, man shi er Mordekai nger ve nahan;

²⁴gadia Haman wan u Hamedata, Oragagu, orihom u Mbayuda cii, hen kwaghbo sha Mbayuda sha u timin ve, man a haa Pur, ka ishor i kpehen je la, sha u una sar ve, shi una tim ve kera kpaa;

²⁵kpa er kwagh la za va hen tor yô, a kaa ken uwashika er, mhen u bo, u a hen sha Mbayuda la, a̱ hide sha ityough nagh; un a ônov nav kpaa i sende ve sha kon.

²⁶Ka sha ci u nahan man ve yila ayange la er Purim sha iti i Pur la ye. Nahan sha ci u kwaghôron u ken washika la cii, man sha kwagh u ve nenge sha kwagh shon la, man kwagh u a tser ve,

²⁷Mbayuda wa tindi man ve ver asema, ve man tsombor ve man mba ve nyôr nongo a ve mbala cii, sha er kwagh la a̱ de bundu ga, sha u vea waan ayange ahar ne iko sha kwaghngeren la, man sha shighe u i ver a sha hanma inyom la;

²⁸man sha er i̱ umbur ayange ne, i̱ waan a iko sha ikov ikov, man hanma tsombor man hanma ipaven man hanma gar; sha er i̱ de kera bundu ayange a Purim ne ken Mbayuda ga, man m-umbur u a kpaa a̱ de hungul ken tsombor ve ga.

²⁹Tsô pendatyo Eseter u Abihail, kua Mordekai, Oryuda, ve nger sha utaha sha u taver washika u sha uhar u Purim ne.

³⁰Tsô a tindi uwashika hen Mbayuda cii, sha uipaven deri man ikundu kar utaankaruhar mba ken tartor u Ahasueru, a kwaghôron u bem man mimi,

³¹sha u taver ayange a Purim la sha ashighe a i ver a yô, er Mordekai Oryuda man Eseter pendatyo ve wa tindi sha a nahan, man er ve ver kwagh u kwaghyan u hôron man mliam ma vaan sha ci u ayol a ve kua tsombor ve kpaa la.

³²Imo i Eseter taver kwagh u Purim ne; i nger un ken ruamabera.