Read tiv Ekesodu 14 Bible Online

Ekesodu 14 - tiv bible

Ekesodu 14

¹Tsô TER ôr kwagh a Mose kaa er:

²Kaa Mbaiserael, ve̱ hire ijime, ve̱ za haa afo sha ishigh ki Pihahiroti hen harga u Mikidol a zegemnger; ka sha ishigh ki Baal-sefon jigh jigh né haa afo hen kpe u zegemnger ye.

³Nahan Farao una gba teren Mbaiserael kaan er: Ve tsume ken tar la ve, desereti yisa ve gbenda.

⁴Me cighir Farao ishima, una tôv ve angahar; nahan Me gema Me zua a zua a icivir sha kwagh u Farao kua ikumutya na cii; Mbaigipiti vea fa er Mo M lu TER yô. Tsô ve er nahan.

⁵Zum u i kaa tor u Igipiti er ior mbala ve yem a yem je yô, ishima i Farao kua i mbatomov nav gema kposo sha kwagh u ior mbala, ve pine er: Ka nyi se gbe den Iserael ve yem ve de u shiren se nahana?

⁶Tsô a zer ikyekye na sha anyinya, a mough a ior nav;

⁷a tôô akeke deri ataratar a hemban, kua akeke a Igipiti cii, a ior mba fan ityav sha mi cii.

⁸TER cighir Farao tor u Igipiti ishima, tsô a zenda Mbaiserael ijime; kpa Mbaiserael yô, ve due ve lu yemen sha uwegh ku ageegh je.

⁹Mbaigipiti gema gba zendan ve ijime a anyinya man akeke a Farao cii man mbahendan a, kua mbautyav nav kpaa, ve va kohol ve hen afo hen kpe u zegemnger hen Pihahiroti sha ishigh ki Baal-sefon.

¹⁰Farao mgbôghom yô, Mbaiserael ta ashe; yô, nenge, Mbaigipiti mbala di van ve ijime la, cier ve iyol kpishi; nahan Mbaiserael gba vaan yilan TER.

¹¹Ve pine Mose er: Ka iwar i ban ken Igipiti ve u kor se wer se̱ va kpe ken toho yee? Ka nyi u er a vese nahan, u due a vese ken Igipiti?

¹²Ka kwagh u iyange se kaan a we ken Igipiti ser: Gba den se, se̱ eren Mbaigipiti tom tsô ne gaa? Gadia hemba doon se u eren Mbaigipiti tom a u se lu kpen ken desereti ne.

¹³Kpa Mose kaa a ior er: De cie nen ga, tile nen her, nenge nen myem u TER Una yima ne nyian yô; er ne nengen Mbaigipiti nyian nahan, mayange né kera shi nenge a ve sha won ga,

¹⁴TER Una nôngo ityav sha ci wen, lu nen ving tsô.

¹⁵Tsô TER pine Mose er: Ka nyi u vaan a Moo? Kaa Mbaiserael ve̱ hembe ve̱ yem hemen.

¹⁶We gema gbough ough kende sha, naregh uwegh ough sha zegemnger pav un.

¹⁷Yô, Mo Me cighir Mbaigipiti asema ve̱ hungwa ve̱ cir ve ijime; Me gema Me zua a zua a icivir sha kwagh u Farao kua ikumutya na cii, man sha akeke na kua mbaanyinyav nav cii.

¹⁸Mbaigipiti kpaa vea fa er M lu TER yô, shighe u Me zua a icivir sha kwagh u Farao man sha akeke na kua mbaanyinyav nav la.

¹⁹Tsô ortyom u Aôndo u a hemen ikumior i Iserael la, mough kar hile ve ken ijime; ibeenegh ki lun er ityôgh la kpaa, mough sha hemen kar va tile ve ken ijime.

²⁰Ki lu hen atô u ikumior i Mbaigipiti a ikumior i Mbaiserael; yô, ibeenegh lu kua ime, nahan kpaa, ki gema ki wanger tugh; hen tugh mbula cii, igen mgbôghom a igen ga.

²¹Tsô Mose naregh uwegh nagh sha zegemnger; TER er zegemnger kuwa kera sha ahumbe a ken ityoughkitaregh, a taver, a tsa van tugh kaka; zegemnger uma, mngerem pav.

²²Mbaiserael hungwa hen atô u zegemnger sha tareghnyaagh; mngerem tile lu ve ken iyan kua ken imese er kpekpe nahan.

²³Mbaigipiti cir ve ijime gba hungwan zan shin atô u zegemnger ken ijime ve, anyinya a Farao cii man akeke na kua mbaanyinyav nav kpaa.

²⁴Tsô ka kom sha mkorutu u sha use la yô, TER lu ken usu u lun er ityôgh la, kua ken ibeenegh kila, lu kenger ikumutya i Mbaigipiti; tsô A haa ikumutya i Mbaigipiti anzughul.

²⁵A er inya kange sha akaver a akeke ve, ve gba yemen hemen sha ican je; tsô Mbaigipiti kaa er: Sé yevese nen Mbaiserael, gadia TER ta ikaa ken ve, ngu ihom a Mbaigipiti.

²⁶Tsô TER kaa a Mose er: Naregh uwegh ough sha zegemnger, mngerem ma hide ma zua her, ma cir Mbaigipiti a akeke a ve kua mbaanyinyav vev kpaa.

²⁷Tsô Mose naregh uwegh nagh sha zegemnger, zegemnger hide doon her sha use er ma lun keke nahan; Mbaigipiti gba yevese, ve va ta sha mi; TER haa ve shin zegemnger.

²⁸Mngerem hide her, uve akeke kua mbaanyinyav, ka ikumutya i Farao cii, i i cir ve ijime shin zegemnger je la; mô ve môm kera shi ga.

²⁹Kpa Mbaiserael yô, per sha tareghnyaagh hen atô u zegemnger; mngerem lu ve ken iyan kua ken imese er kpekpe nahan.

³⁰Kape TER yima Mbaiserael sha ikev i Mbaigipiti sha iyange la je la; Mbaiserael nenge akom a Mbaigipiti hen kpezegemnger.

³¹Mbaiserael nenge zegetom u TER A er sha Mbaigipiti yô, tsô ior cia TER, ve na TER jighjigh kua wanakiriki Na Mose kpaa.