Read tiv Ekesodu 16 Bible Online

Ekesodu 16 - tiv bible

Ekesodu 16

¹Tsô ve mough hen Elim, mkohol u ior Mbaiserael cii nyôr ken desereti u Sen u a lu hen harga u Elim a Senai la, Sha uwer u sha uhar ayange a u pue kar ataan, er ve mough ken tar u Igipiti la.

²Mkohol u ior Mbaiserael cii za Mose vea Aron ivever iyol ken desereti;

³Mbaiserael kaa a ve er: Guda u ma se kpe sha uwegh ku TER ken tar u Igipiti zum u se teman a ityev mbi inyamev ikum se yaan bredi kuman se la; gadia ne va a vese ken desereti ne ner, né va wua nongoior ne cii sha ijen.

⁴Tsô TER kaa a Mose er: Nenge, Me er kwaghyan una due Sha una haa ne shin inya; ior ve̱ due hanma iyange, ve̱ kuran á kuman sha sev mbula, sha u Me kar ve, shin vea er sha atindi Am, shin vea er sha mi ga.

⁵Sha iyange i sha ataratar la yô, ve̱ er kwaghyan sha kwagh u ve ve a mi la, a̱ kuma er ve kor ayange ayange nahan, kwa har.

⁶Tsô Mose man Aron kaa a Mbaiserael cii er: Aikighe yô, né va fa er i lu TER je A dugh a ven ken tar u Igipiti yô.

⁷Pepe né nenge icivir i TER, gadia A ungwa ivever yen i ne er a TER yô; se, se mba di nyi man ne er se ivevere?

⁸Mose kaa er: Ka shighe u TER Una na ne inyam aikighe, né ya, kua kwaghyan pepe kpaa, á kuma ne la; gadia TER ungwa ivever i ne eren Un la; se mba nyi? Ka se, ne ze se ivever iyol ga, kpa ka TER.

⁹Mose kaa a Aron er: Kaa mkohol u ior i Mbaiserael cii wer: Va kporom nen sha ishigh ki TER, gadia A ungwa ivever yen.

¹⁰Tsô er Aron lu ôron kwagh a mkohol u ior i Mbaiserael cii ave la, ve gema ashe ken desereti; tsô, nenge, icivir i TER ande sha ibeen.

¹¹TER ôr kwagh a Mose, A kaa er:

¹²M ungwa ivever i Mbaiserael; yô ôr kwagh a ve, kaa ve wer: Aikighe né ya inyam, kper pepe yô, né ya kwaghyan una kuma ne man né fa er Mo M lu Aôndo wen ye.

¹³Tsô iyange i been yô, utakange va, va haa hen afo cii; kper nan pepe yô, avure gba, ningir afo tser.

¹⁴Avure a a gbe la nga om kera yô, i gba kaven kwagh hen inya cir sha desereti lu ipe vegh vegh ndahar er ishwa nahan.

¹⁵Zum u Mbaiserael nenge a mi yô, ve gba pinen ayol a ve er: Ka nyi ne? Gadia ve fa kwagh shon ga. Tsô Mose kaa a ve er: Ka kwaghyan u TER A ne ne, er né ya je ne.

¹⁶Kwagh u TER A kaa yô, ka un ne: Hanma or nana̱ kohol un, a̱ kuma sha mye u nan; hanma or omer môm, sha iyenge i ior enev, ka ape né kuran la, hanma or sha ci u mba ve lu ken tenti u nan.

¹⁷Kape Mbaiserael er je la, ugen nan kura kpishi, ugen nan kura yum ga.

¹⁸Kpa zum u vea karen sha ikaren i omer yô, un u a kor kpishi la kwagh neer un ga, man un u a kor kpuaa la kpaa, kwagh yina un ga; hanma or kura sha mye u nan vough.

¹⁹Mose kaa a ve er: Or môm nana̱ de deen, a̱ lu her zan zan sev mbu̱ av ga.

²⁰Nahan kpaa, ve wa imo i Mose iko ga; mbagenev yô, ve de a lu her zan zan sev mbu av, nahan a gba azôô, a huma; ishima vihi Mose a ve.

²¹Ve kuran hanma sev, hanma or sha mye u nan vough; zum u oo ua taan yô, a sough.

²²Kpa sha u ayange ataratar la, ve kuran kwaghyan kuma sha u ve vanden kuran la kwa har, omer uhar uhar sha ci u hanma or; nahan mbavesen mba mkohol u ior cii va, va kaa Mose.

²³A kaa a ve er: Ka kwagh u TER A kaa je la er: Kper ka iyange i memen, ka icighaniyange i memen i TER je; kaa nen kwagh u a sar ne u kaan yô, shi jiidi nen kwagh u a sar u jiidi kpaa; hanma kwagh u a shi yô, koso nen zan zan sev mbu av.

²⁴Ve koso zan zan sev av, sha imo i Mose la; yô, kera huma ga, azôô kpaa, gba ga.

²⁵Mose kaa er: Ya nen ngun nyian, gadia nyian ka iyange i memen i TER; nyian né kera zua a mi ken akôngo ga.

²⁶Ayange ataratar né kohol un; kpa sha iyange i ataankarahar la yô, ka iyange i memen je la, sha iyange la una lu ga.

²⁷Tsô sha iyange i ataankarahar la, ior mbagenev due sha u vea kura, kpa ve zua a mi ga.

²⁸Tsô TER kaa a Mose er: Ka hanma shighe je man né de u vendan u wan iko sha imo Yam kua atindi Ama?

²⁹Nenge, er TER A ne ne iyange i memen yô, nahan sha iyange i ataratar la, ka A na ne kwaghyan a kuma ayange ahar. Yô, hanma or nana lu hen ijiir i nan, or môm nana de kera duen hen ijiir i nan sha iyange i ataankarahar la ga.

³⁰Tsô ior mem sha iyange i ataankarahar la.

³¹Ya u Iserael yila iti na er: Mana; lu pupuu er asange a koliande nahan, lu ken zwa er mumuyough nahan.

³²Mose kaa er: Kwagh u TER A kaa yô, ka un ne: I̱ koso ikaren u omer môm poo sha ci u ikov yen i ken hemen, sha u ve̱ nenge kwaghyan u M koso ne a mi ken desereti zum u M due a ven ken tar u Igipiti yô.

³³Mose kaa a Aron er: Tôô ityegh, haa mana shimi, ikaren u omer môm poo, ver sha ishigh ki TER, i̱ kuran un her sha ci u ikov yen i ken hemen.

³⁴Er TER kaa Mose nahan, kape Aron ver un sha ishigh ki Shiada la, sha u kuran un her.

³⁵Mbaiserael lu yan mana la anyom akunduahar zan zan ve za nyôr ken tar u ior ve tem ker yô; ve ya mana la zan zan ve za ar hen ikighirtar i Kanaan.

³⁶Ikaren u omer yô, ka môm-ken-upue u efa je.