Read tiv Ekesodu 17 Bible Online

Ekesodu 17 - tiv bible

Ekesodu 17

¹Mkohol u ior i Mbaiserael cii, lu zenden ken desereti u Sen, haan afo zan, sha imo i TER, tsô ve za haa hen Rafidim; kpa ve zua a mngerem ma ior vea ma ga.

²Nahan ior mough ayôôso a Mose, ve kaa er: Na se mngerem, se̱ ma. Mose kaa a ve er: Ka nyi ne mough ayôôso a mo, man ka nyi ne karen TERE?

³Yô, imura lu kôron ior, nahan ior gba zan Mose ivever iyol pinen er: Ka nyi u dugh a vese ken tar u Igipiti wer u va wua se a ônov asev kua uzendenya asev sha imura?

⁴Tsô Mose vaa a TER, a kaa er: Me er a ior mban nana? Shi kpuaa tsô vea tam awen.

⁵TER kaa a Mose er: Mough a mbatamen mba Iserael mbagenev, undu ior ken hemen; gbough ough ku iyange u gbidye ifi a mi la, kôr ku ken uwe, yem.

⁶Nenge, Me tile sha ishigh you keregh, sha vande u hen Horebi; gbidye vande la, tsô mngerem maa due ker, sha u ior vea ma yô. Mose er nahan sha ishigh ki mbatamen mba Iserael;

⁷Maa a ii ijiir la iti er: Masa kua Meriba, sha ci u ayôôso a Mbaiserael la, man shi sha ci u ve kar TER sha u pinen er: TER ngu a vese shin ngu ga?

⁸Tsô Amaleki va, va nôngo ityav a Iserael hen Rafidim.

⁹Nahan Mose kaa a Yosua er: Sange ior sha ci wase, due za nôngo ityav a Amaleki; kper mo me tile sha ityough ki igungu a gbough ku Aôndo ken uwe.

¹⁰Yosua er er Mose kaa un nahan, a nôngo ityav a Amaleki; kpa Mose man Aron kua Hur yô, ve unde sha ityough ki igungu la.

¹¹Tsô, Mose una kenden uwegh sha yô, Iserael a hemba, una shirin uwegh yô, Amaleki a gba, hemban.

¹²Ave nga kpen Mose yô, ve tôô iwen ve ver un er a̱ tema sha mi; Aron man Hur gema kôr ave na sha, u môm kôr ken, u môm kôr ken; nahan ave na lu dông zan zan iyange kar miren.

¹³Yosua hemba Amaleki a ior sha zwa u sanker.

¹⁴Tsô TER kaa a Mose er: Nger kwagh ne ken ruamabera a̱ lu kwagh u umbur, ôr Yosua un dedoo, a̱ fa: M-umbur u ma i umbur Amaleki tsô kpaa, Me ese un sha won kera.

¹⁵Tsô Mose ta atse a nan nagh sha mi, a ii a iti er Yehova-nishi (TER ka tuta wam);

¹⁶A kaa er: Uwegh ku sha kwav u TER je; TER Una nôngo ityav a Amaleki sha ikov ikov.