Read tiv Ekesodu 18 Bible Online

Ekesodu 18 - tiv bible

Ekesodu 18

¹Tsô Yetero, pristi u Midian, terkem u Mose, ungwa akaa a TER A er Mose cii, kua ior nav Iserael kpaa, er TER A dugh a Iserael ken Igipiti yô.

²Nahan Yetero terkem u Mose mough a Shipora kwase u Mose — u yan na un a hire la—

³Kua ônov nav uhar, iti i u môm la er Gershom; gadia a kaa er: M tema shir ken tar u m fe u ga yô;

⁴Ugen la iti na er Elieser; gadia, a kaa er: Aôndo u terem, ka Un A lu iwasen yam ye, man A yimam m war sanker u Farao kpaa.

⁵Tsô Yetero, terkem u Mose va hen Mose a ônov nav man kwase na ken desereti henpe a haa afo hen uwo u Aôndo la;

⁶A tindi er i̱ za kaa Mose er: Mo, teru kem, Yetero, m ngu van her a we, a kwase wou kua ônov nav mba uhar mbala.

⁷Tsô Mose due za kegh ter na kem gbenda, a gure a suse un zwa, ve gba pinen mlu ve ayol a ve; tsô ve nyôr ken tenti.

⁸Mose ôr ter na kem akaa cii, a TER A er a Farao man Mbaigipiti sha ci u Iserael yô, man shi atsan a a tser ve sha gbenda cii, kua myem u TER yima ve kpaa.

⁹Nahan Yetero ember akaaôron la cii, a TER A er a Iserael, er A dugh a ve sha ikev i Mbaigipiti yô.

¹⁰Yetero kaa er: I̱ wuese TER u A yem ne sha ikev i Mbaigipiti man sha ikev i Farao kpaa.

¹¹Hegen yô, m fa, TER hemba mbaaôndo cii, gadia A yima ior sha ikev i Mbaigipiti, zum u ve manger sha ve la.

¹²Man shi Yetero terkem u Mose za a nagh ku nanden kua iniav mbi sôngon za na Aôndo; Aron va a mbavesen mba Iserael cii, sha u va yan kwagh a terkem u Mose imôngo sha ishigh ki Aôndo

¹³Tsô kper gen yô, Mose tema lu kuren ior ajir; ior tile hen Mose pepe je zan zan iyange kar been.

¹⁴Kpa zum u terkem u Mose nenge kwagh u a eren a ior cii yô, a pine er: Ka nyi kwagh u eren a ior ne nahana? Ka nyi u tem we tswen, ior cii ve til her a we pepe je zan zan iyange i kar beene?

¹⁵Tsô Mose kaa a ter na kem er: Ka sha ci u ior ve va her a mo er vea va pine Aôndo kwagh;

¹⁶Zum u ka vea lu a ma kwagh yô, ve va her a mo; m kure kwagh u or u kwagh a zough nan a orgen yô, m tese ve akaawan a TER kua atindi a Na kpaa.

¹⁷Tsô terkem u Mose kaa a na er; Yô, kwagh u u eren la doo ga.

¹⁸U ngu wuan a wua iyol you je kua ior mba ve lu a we mban kpaa; gadia kwagh ne gande u; u fatyô u eren un, we tswen ga.

¹⁹Yô, ver ase ato sha kwaghôron wam ne, me wase u henen, Aôndo kpaa Una lu a we; we ú lu sha ishigh ki Aôndo sha ci u ior mban, ka we ú zaan a akaa hen Aôndo ye;

²⁰Man ú tesen ve akaawan man atindi, shi ú pasen ve gbenda u vea zaan sha mi, kua tom u vea eren kpaa.

²¹Shi ú sange ior mba fan kwagh ken ior cii, mba ve cie Aôndo, mba mimi, mba ve vende inyaregh ki yamen ishô; ver ve sha ior, ve̱ lu mbavesen sha ior dubu dubu man sha ior deri man sha ior akunduahargber akunduahargber man sha ior pue pue,

²²ve̱ ôron ior ajir ayange ayange; akaavesen yô, ve̱ gema ve̱ va a mi her a we, kpa akaakiriki yô, ve ayol a ve, ve̱ gba kuren a tsô; nahan á heghem we iyol, ve kpaa ve̱ tôôn ikav a we imôngo.

²³Aluer ú er nahan, man Aôndo kpaa Una tese u nahan yô, kwagh á kera hemba u ga, man ior mban cii kpaa vea yem hen ajiir a ve saan saan.

²⁴Nahan Mose rumun imo i ter na kem la, a er sha mi vough cii.

²⁵Mose sange ior mba fan kwagh ken Iserael cii, ver ve, ve̱ lu uityombaiorov sha ior, ve̱ lu mbavesen sha ior dubu dubu, man sha ior deri deri man sha ior akunduahargber akunduahargber man sha ior pue pue kpaa.

²⁶Ve gba ôron ior ajir ayange ayange, a lu akaa a cimin yô, ve za a mi hen Mose, kpa akaakiriki yô, ve ayol a ve, ve gba kuren a tsô.

²⁷Tsô Mose ver ter na kem gbenda, yem ken tar na.