Read tiv Ekesodu 19 Bible Online

Ekesodu 19 - tiv bible

Ekesodu 19

¹Sha uwer u sha utar u mdugh u Mbaiserael ken tar u Igipiti sha iyange la je, ve nyôr ken desereti u Senai.

²Ve hembe hen Rafidim ve va nyôr ken desereti u Senai, ve haa afo ken desereti; Iserael haa afo her, sha ishigh ki uwoogh kila.

³Tsô Mose unde za hen Aôndo; TER yila un sha uwo la, kaa er: Kaa ya u Yakob man ôr Mbaiserael wer:

⁴Ne nenge kwagh u M er Mbaigipiti man er M tee ne sha akper a aguvegh M ve a ven hen a Mo yô.

⁵Hegen yô, aluer né veren ato sha kwaghôron Wam mimi je, shi né waan ikuryan Yam iko kpaa yô, nahan akuraior a sha won cii, ka ne né hingir kwagh Wam iyol Yam je ye; gadia tar cii, ka u Wam je.

⁶Ka ne né lum tartor u upristi kua icighanikurior ye. Ka akaa a ú za ôr Mbaiserael je ne.

⁷Tsô Mose va va yila mbatamen mba ior la, tume ve akaaôron a TER ôr un la cii inya.

⁸Ior cii kaa zwa môm er: Akaa a TER A kaa cii, sé er. Tsô Mose hide za ôr TER akaaôron a ior la.

⁹Nahan TER kaa a Mose er: Nenge, M ngu van hen a we ken ibeenegh ki iligh sha shighe u Me ôron kwagh a we yô, ior ve̱ ungwa, ve̱ gema, ve̱ naan we jighjigh gbem. Mose ôr TER akaaôron a ior la.

¹⁰Tsô TER kaa a Mose er: Za hen ior, za tsegha ve nyian kua kper, ve̱ ôô akondo a ve kpaa,

¹¹man shi ve̱ kohol iyol er ayange atar a lu a kuma ga la, gadia sha iyange i sha utar la, TER Una sen sha uwo u Senai sha ashe a ior cii.

¹²Man shi ver ior ikighir, i̱ ningir i̱ tser, kaa wer: Ver nen ishima, de undu nen sha uwo la ga, shin mbende tsô kpaa, de benden nen a itine i u ga; hanma or u nana bende a uwo la yô, á wua nan kpee je;

¹³uwegh tsô kpaa, or a̱ de benden sha u ga, mimi je á ta nan awen, shin á ta nan ivaan; shin a lu ilegh shin a lu or kpaa, vea kera lu uma ga; zum u korough kua gba imo tueen yô, ve̱ unde sha uwo.

¹⁴Tsô Mose hungwa sha uwo la va hen ior, va wanger ior; man shi ve ôô akondo a ve kpaa.

¹⁵Tsô a kaa a ior er: Kohol nen ayol er ayange atar la, a lu a kuma ga yô; de kera sôsom nen a kwase ga.

¹⁶Tsô sha iyange i atar la, sev mbu av yô, idyuran man inyiar kua ibeenegh ki iligh kpaa lu sha uwo la, man imo i ikpamkor lu kaan taver taver; ior mba hen afo cii gbidye akarkase iyol.

¹⁷Tsô Mose due a ior hen afo, sha u vea za kohol Aôndo yô; ve za tile hen itinewoogh la.

¹⁸Uwo u Senai cii gba duen mnyim sha ci u TER A sen sha u ken usu yô; mnyim mara gba kôndon er ka mnyim ma duen ken atse yô, uwo la cii tenger kpishi.

¹⁹Zum u ikpamkor lu seer a seer taver imo la yô, Mose lu ôron kwagh, Aôndo kpaa lu rumun un sha imo i taver je.

²⁰TER sen sha uwo u Senai, sha ityough ki uwoogh la; tsô TER yila Mose er, a̱ unde sha ityough ki uwoogh kila; nahan Mose unde.

²¹Tsô TER kaa a Mose er: Hungwa, za kaa ior, ve̱ de aver ve̱ zaan hen TER er vea va kenger man ior kpishi vea gema vea tim ga.

²²Upristi, mba ve mgbôghom a TER, ve̱ tsegha ayol a ve, sha er TER A̱ de te num sha a ve ga yô.

²³Mose kaa a TER er: Ior vea fatyô u unden sha uwo u Senai ga, gadia U vande wan se kwagh je Wer: Ver ikighir hen itinewoogh, tsegha u.

²⁴Tsô TER kaa a na er: Mough, hungwa shin inya; yô, shi hide unde vea Aron imôngo; kpa upristi kua ior ve̱ de aver ve̱ unden ve̱ vaan hen TER ga, sha er A̱ de te num sha a ve ga yô.

²⁵Tsô Mose hungwa va hen ior va kaa ve.