Read tiv Ekesodu 2 Bible Online

Ekesodu 2 - tiv bible

Ekesodu 2

¹Tsô or u hen ya u Levi gema za er wan u Levi.

²Kwase la wa iyav mar wannomso; er a nenge lu wan u doon ashe yum yô, a yer un iwer itiar.

³Kera fetyô u yeren un ga yô, a tôô ikese i ikenaika, a shighe i tsur man mningem, a gbir wan la shimi, a za ver ken awoo hen kpeifi u Nil.

⁴Anngô na u kwase gema za tile ca teghelee sha u una fa er kwagh na á za yô.

⁵Tsô wan u Farao u kwase za shin kpeifi er una za ôô iyol; kasev mba shiren un gema lu zenden hen kpeifi; a nenge ikese ken awoo, a tindi kpan na u kwase, za tôô.

⁶Tsô a bugh a nenge a wan la, lu wannomso je, lu vaan. Mhôônom kôr un a na, a kaa er: Ngun ka wan u Mbaheberu je.

⁷Nahan anngô na u kwase la gema kaa a wan u Farao u kwase la er: M̱ za, yila u kwase u ken Mbaheberu sha u nana va naan we wan ne atumba?

⁸Wan u Farao u kwase gema kaa a na er: Za. Tsô wankwase la za, za yila ngô u wan la.

⁹Wan u Farao u kwase kaa a na er: Tôô wan ne, naan mo un atumba, mo kpaa me kimbi u injar you; kwase la maa tôô wan la gba za naan un atumba.

¹⁰Wan la vesen yô, a yem a na, a za na wan u Farao u kwase la, hingir wan na. A maa a ii un iti er Mose; a kaa er: Gadia ka shin mnger m dugh un ye.

¹¹Tsô sha ayange la, er Mose hingir orvesen kera yô, a za hen anmgbianev nav, a za nenge ican ve; tsô a nenge Origipiti gema lu gbidyen Orheberu u ken anmgbianev nav.

¹²Tsô a yenge keen, a yenge keen nengen a or ga yô, a wua Origipiti la, a yer un shin waarawa.

¹³Ayange nga kar ahar yô, shi a due, tsô a nenge Mbaheberu iorov uhar lu nôngon ayol a ve, a kaa a u iboogh la er: Ka nyi u gbidi anngôuwe?

¹⁴Ngula gema kaa a na er: Ka an nan ver u tor man orjir sha a vese? Ka u ka wuan mo er u woo Origipiti la nahana? Tsô mciem haa Mose iyol; a kaa er: Mimi je i fa kwagh ne ve!

¹⁵Er Farao ungwa kwagh ne yô, a gba nôngon u wuan Mose. Kpa Mose yevese Farao yem ken tar u Midian; a za tema hen kpejôr.

¹⁶Pristi u Midian lu a ônov mba kasev utaankaruhar; ve va kese mngerem, ve gba ivin utso sha u ilev mbi ter ve mbi̱ ma yô.

¹⁷Kpa mbakuranilev va, va zenda ve kera; tsô Mose mough saghera wase ve, shi na ilev vev mngerem kpaa.

¹⁸Zum u ve va hen ter ve Reuel yô, a pine er: I er nan ne hir nyian fese nahana?

¹⁹Ve kaa er: Ka Origipiti a yem se sha ikev i mbakuranilev, mngerem je kpaa, a kese sha ci wase, a ne ilev mbi̱ me ye.

²⁰A gema a pine ônov nav er: Nan ngu hana? Ka nyi ne undu or laa? Za kaa un a̱ va ya kwagh.

²¹Mose rumun u teman a or la; un gema na Mose wan na u kwase, Shipora.

²²A mar wannomso, a ii un iti er Gershon; gadia a kaa er: M tema shir ken tar u m fe u ga yô.

²³Tsô sha ayange shon a a kar kpishi la, tor u Igipiti kpe; Mbaiserael kpaa shir asema lu vaan sha ci u tom u kpan la, mliam vem ma sha tom u kpan la kôndo nyôr sha Aôndo.

²⁴Aôndo ungwa mtoghor ve man shi Aôndo umbur ikuryan Na a Aberaham man Isaka man Yakob.

²⁵Aôndo ver ishima sha Mbaiserael, Aôndo wa ve iko kpaa.