Read tiv Ekesodu 23 Bible Online

Ekesodu 23 - tiv bible

Ekesodu 23

¹De samber a gwa u aiegh ga; de te ken iferor, hingir orshiada u aperagh ga.

²De dondo ikpelaior sha ifer i eren ga; shi de eren shiada sha kwagh nyôron nongo a ikpelaior sha u vihin ijir ga;

³man shi de ôron icanor ijir wer, ka icanor ga.

⁴Aluer wea kohol bua u orihom wou shin jaki u nan una saan toho yô, hide a mi va na nan kpee je.

⁵Aluer wea nenge a jaki i or u nan ker u ihom, ikav mbia kighir i hen inya yô, de undu nan a mi tswen ga, wase nan u saghen kpee je.

⁶De hundun ijir i icanor wou zum u á va yer ijir na la ga.

⁷Lu ca a kwagh u aiegh; de woo orishôôgh man orperapera ga; gadia Me na oriboogh ishô ga.

⁸Man shi de ngohol inyaregh ki yamen ishô a mi la ga; gadia inyaregh ki yamen ishô a mi la, ki pirin mba ve nenge la ashe, shi ki nzughul mbaperapera ijir kpaa.

⁹De eren shiror ican ga; gadia ne fa inja i shiror, gadia ne kpaa ne lu shir ken tar u Igipiti.

¹⁰Kaha sule wou anyom ataratar, kohol iyiav mbi ken u, ombo;

¹¹kpa sha inyom i sha utaankaruhar la yô, de u, u̱ gba lun tsô, sha er atsanaior a ior ou vea ya yô; kwagh u una shi yô, inyamtoho i̱ mase yan. Ka ape ú eren a sule wou u wain kua u olev kpaa la.

¹²Er tom wou ayange ataratar, sha iyange i ataankarahar la mem, sha er bua wou kua jaki you kpaa ve̱ mem, wan u kpankwase wou kua shiror kpaa, i̱ yôhôl ve iyol.

¹³Akaa a M kaa ne ne cii, waan nen a iko, de teren nen ati a mbaaôndo mbagenev ga, i̱ de ongo a sha zwa wou ga.

¹⁴Eren nen Mo iniongo hanma inyom, kwa tar.

¹⁵Eren nen iniongo i bredi u i we kwa sha mi ga yô; ayange ataankarahar cii, ú ya bredi u i we kwa sha mi ga la, er M kaa u nahan, sha shighe u i ver la, sha uwer u Abiba; gadia ka sha u man u dugh ken tar u Igipiti ye; or a̱ de ve sha ishigh Yagh aveve ga;

¹⁶man iniongo i sunda, ka iyiav mbi tsutswav mbi sha tom wou, mbi u lee ken sule je la, kua iniongo i kurun a iyiav sha mbee u inyom, zum u u kurun a akaa a ken sule a sha tom wou la.

¹⁷Hanma inyom nomsombaiorov ou cii, ve̱ va sha ishigh ki TER Aôndo kwa tar.

¹⁸De senge awambe a nagh Agh a kwagh u i we kwa sha mi imôngo ga; ahôm a iniongo Yam kpaa a̱ de luun her zan zan sev mbu aven ga.

¹⁹Iyiav mbi tsutswav mbi hemban doon mbi ken sule wou, ú za a mi ken iyou i TER, Aôndo wou. De jiir wanivo sha atumba a ngô na ga.

²⁰Nenge, M ngu tindin Ortyom Mer, A̱ hemen we gbenda, A̱ za nyôr a we hen ijiir i M ser i yô.

²¹Ver nen ishima sha a Na, ver nen ato sha imo Na kpaa; shi de hendan nen a Na ga; gadia Una de ne asorabo a en ga; gadia iti Yam ngi ken a Na.

²²Aluer ú ver ato sha imo Na mimi je, ú er akaa a M kaa cii yô, Me hingir orihom u mbaihomov ou, man shi orhendan a mbaahendanev ou.

²³Gadia Ortyom Wam Una hemen we gbenda Una za nyôr a we hen Mbaamor man Mbahiti man Mbaperishi man Mbakanaan man Mbahivi man Mbayebushi. Me tim ve kera kpaa.

²⁴De gur mbaaôndo vev inya ga, shi de civir ve kpaa ga, shi de eren sha aeren ve la kpaa ga; kpa yôhôl ve kera ci ca, hembe mtôm vem ma awenem avur avur.

²⁵Civir TER, Aôndo wen, Un kpaa Una na iveren sha kwaghyan wou kua mngerem ou; shi Me kar a angev hen we kera kpaa.

²⁶Ma iyav mbu dughun mbua lu ken tar wou ga, shin ikôm kpaa ga, Me iv iyenge i ayange ou.

²⁷Me na mcieryol Wam una vande hemen a we, Me er mbaihomov ou cii vea yevese we.

²⁸Me na, ihambe ia vande hemen a we ia za zenda Mbahivi man Mbakanaan man Mbahiti sha ishigh you kera,

²⁹Me zenda ve sha ishigh you kera inyom i môm tseegh ga, sha er tar u̱ de hingir toho, inyamtoho i̱ seer ngeen i̱ ganden we inya ga.

³⁰Me zendan ve sha ishigh you tegh tegh, zan zan ú mar ior á ngee, ú ya dyako u tar la.

³¹Me ver akighir a tar wou á hii hen Zegemnger u Nyian je zan zan á za ar hen zegemnger u Mbafiliti, shi á hii ken desereti zan zan á za ar hen ifi u Uferati, gadia Me gema mba ve tem ken tar la, Me na ve sha ikev you; ú zenda ve sha ishigh you kera.

³²De ye ikur a ve ga, shin a mbaaôndo vev kpaa ga.

³³Ve̱ de kera tem ken tar wou ga, sha u ve̱ de geman we, ú eren kwaghbo ga yô; gadia aluer ú civir mbaaôndo vev yô, á va hingir ihônon i á hôn u a mi je la.