Read tiv Ekesodu 25 Bible Online

Ekesodu 25 - tiv bible

Ekesodu 25

¹Tsô TER ôr kwagh a Mose, A kaa er:

²Kaa Mbaiserael ve̱ vam a nagh; ngohol nagh Agh hen hanma or u i doo nan u nan yô.

³Nagh ku né ngohol hen a ve yô, ka ku ne: zenaria man azurfa man togula

⁴man ikondo i kwel man i nyian dindee man i nyian bong man ikondo i pupuu i kôngor man aive a ivo

⁵man akôv a anomaiyôngo a i nyian a yô, man akôv a ayu man kon u saa

⁶man mkurem sha ci u tsaren man ilyôghonov sha ci u mkurem ma shighen man kwaghhumandoon u nanden nagh a mi

⁷man awen a oniki man shi awen a varen sha efodi man sha ikpa i sha vanger.

⁸Shi ve̱ erem icighanjiir sha er Me tema ve her atô yô.

⁹Er M tese u akaa ne nahan, ikav i tabernakel, man ikav i akaa a keregh cii, kape za er nen un je la.

¹⁰Ve̱ er areki sha kon u saa; iniembe na i̱ lu aseva ahar cir tiôn, igbanger na ishiva i môm cir tiôn, ityaven na kpaa ishiva i môm cir tiôn.

¹¹Cir un zenaria u wang; kimi kua ken won kpaa ú cir, shi kase un tsar u zenaria tser.

¹²Haa ahye a zenaria anyiin sha ci na, var a shin angahar a na a anyiin la; vegher keen ahye ahar shi vegher keen kpaa ahye ahar.

¹³Gba igbough sha kon u saa, cir mbi zenaria iyol.

¹⁴Shindi igbough mbila ken ahye a ken ambusu a areki la, sha u tôôn areki a min.

¹⁵Igbough la kpaa mbi̱ lu ken ahye a areki la, i̱ de tsough mbi kera ga.

¹⁶Areki la yô, ú wa Shiada u Me na u la ker.

¹⁷Er ijiir i nan iwom her sha zenaria u wang; iniembe i i, i̱ lu aseva ahar cir tiôn, igbanger na ishiva i môm cir tiôn.

¹⁸Shi er ucerubi uhar sha zenaria; var ve a var sha akur ahar a ijiir i nan iwom her la.

¹⁹Er cerubi u môm sha kur ne, u môm sha kur ne, ucerubi ve̱ lu kwagh môm a ijiir i nan iwom her, sha akur a na ahar la, ijoron i̱ de lu ga.

²⁰Ucerubi mbala ve̱ naregh akper a ve, ve̱ cir ijiir i nan iwom her la sha akper a ve, ve̱ zua ishigh ayol a ve; ishiv mbi ucerubi mbi kenger ijiir i nan iwom her la.

²¹Ver ijiir i nan iwom her la sha areki; areki la yô, ú wa Shiada u Me na u la ker.

²²Me kohol we ker, Me ôr kwagh a we hen ijiir i nan iwom her la, hen atô u ucerubi uhar, mba ve lu sha areki u shiada la, Me kaa u akaa cii a Me kaa Mer Mbaiserael ve̱ er a la.

²³Shi er tebul sha kon u saa, iniembe na i̱ lu aseva ahar, igbanger na ishiva i môm, ityaven na ishiva i môm cir tiôn.

²⁴Cir un zenaria u wang iyol, kase un tsar u zenaria tser.

²⁵Man shi kase un kpande u ken imbusu na, u̱ gbangese er ikevwe nahan, ningir tser, man kurkpandegh la kpaa, kase u tsar u zenaria, tser.

²⁶Er un ahye a zenaria anyiin, wa ahye la sha azongo anyiin a angahar a na anyiin la.

²⁷Ka ikua ikua a kpande u ken ambusu na la man ahye la a lu, sha ci u ajiir a igbough mbi tôôn tebul a mi la ye.

²⁸Gba igbough sha kon u saa, cir mbi zenaria iyol, sha u tôôn tebul a mi.

²⁹Er utasa nav man agbande a na, man ugber nav man ayongo a na a haan kwagh a mi; ka zenaria u wang ú er ve a mi ye.

³⁰Sha tebul la yô, ú veren ubredi mba sha ishi la, sha ishigh Yagh gbem.

³¹Shi er daarimenger sha zenaria uwang; i̱ var a var daarimenger la, ityô na man gôngor na; angbandev nav man adôôr a na kua uimondon nav cii, ve̱ lu kwagh môm a na, ijoron i̱ de lu ga;

³²a̱ lu a agbaa ataratar ken ambusu a na; agbaa a daarimenger atar ken imbusu ingin, man agbaa a daarimenger atar ken imbusu ingila;

³³angbandev utar mba i er er uikparen mba amondi nahan sha gbaa môm, idyôôrough kua imondon; man shi angbandev utar mba i er er uikparen mba amondi nahan sha gbaa ugen, idyôôrough kua imondon; ka ape i̱ er agbaa ataratar a a dugh sha daarimenger la je la.

³⁴Sha daarimenger la iyol na angbandev unyiin mba i er er uikparen mba amondi nahan, adôôr a na kua uimondon nav;

³⁵idyôôrough môm shin agbaa a ahar a a zer ken na la; shi idyôôrough môm shin agbaa a ahar a a zer ken na la; shi idyôôrough môm shin agbaa a ahar a a zer ken na la, sha ci u agbaa a ataratar a a dugh sha daarimenger la.

³⁶Adôôr a ve man agbaa a ve, ve̱ lu kwagh môm a na, ijoron i̱ de lu ga; un jimin cii i̱ var un a var sha zenaria u wang.

³⁷Er un amenger ataankarahar; á veren amenger a na, sha er a̱ wanger ken hemen na yô.

³⁸Akambe a na kua utasa nav mba kuran il mi, i̱ er ve sha zenaria u wang.

³⁹Ka sha zenaria u wang u a kom talenti môm, á er un kua ikav mbin cii kpaa ye.

⁴⁰Yô, ver ishima, er ve sha akav a ve, a i tese u sha uwo ne.