Read tiv Ekesodu 27 Bible Online

Ekesodu 27 - tiv bible

Ekesodu 27

¹Man shi er atse a nanden nagh sha mi, sha kon u saa, iniembe i a i̱ lu aseva ataan, igbanger i a kpaa, i̱ lu aseva ataan, a̱ lu akuku; ityaven i̱ a i̱ lu aseva atar.

²Er akor sha azongo a a anyiin; akor a a la, a̱ lu kwagh môm a a, ijoron i̱ de lu ga; cir a togula iyol.

³Shi er ityev mbi a sha ci u kuran a mtwem, man indyuhar i a, man utasa mba a, man iyôv mbi a mbi dughun inyam a mi, man ugbande mba tôôn usu a mi; ikav mbi a cii, er mbi sha togula.

⁴Er a kperiyôô sha togula; gema er ahye a togula anyiin sha kper la, sha azongo a anyiin.

⁵Kase un shin tsembe u atse la, vegher u shin; kperiyôô la, a̱ va saa her atô u atsegh la.

⁶Man shi gba igbough sha ci u atse la, igbough mbi sha kon u saa, cir mbi togula iyol.

⁷I̱ wa igbough mbila ken ahye la, igbough mbi̱ lu sha ambusu ahar a atsegh la, shighe u á tôôn a la.

⁸Er a sha ikpande, a̱ lu a ho kimi; er i tese u sha uwo nahan, kape ve̱ er a la.

⁹Man shi kase kwa, wa tembe u tabernakel atô; vegher u ken imbusutariyan ken ian i imbusutariyan la, akondo a kasen tembe a mi la, a̱ lu ikondo i pupuu i kôngor i sha mou u̱ sendan; iniembe i vegher u môm i̱ lu aseva deri;

¹⁰mtôm nam ma̱ lu ikundu, agbur a togula a ma kpaa a̱ lu ikundu; uiwever mba mtôm mara kua ahye a ma la, ve̱ lu mba azurfa.

¹¹Vegher u imbusutarimese kpaa, iniembe i akondo a kasen la, a̱ lu aseva deri, mtôm nam ma lu ikundu, agbur a togula a ma kpaa a̱ lu ikundu; uiwever mba mtôm mara kua ahye a ma la, ve̱ lu mba azurfa.

¹²Igbanger i tembe vegher u shin ityôtar yô, akondo a kasen, a̱ lu aseva akunduahargber, mtôm nam ma̱ lu pue, agbur a ma kpaa a̱ lu pue.

¹³Igbanger i tembe vegher u sha ityoughkitaregh hen ian i ityoughkitaregh yô, i̱ lu aseva akunduahargber.

¹⁴Akondo a kasen vegher môm, a̱ lu aseva pue kar ataan, mtôm nam mtar, agbur a ma kpaa, a̱ lu atar.

¹⁵Vegher ugen la kpaa, akondo a kasen a̱ lu aseva pue kar ataan, mtôm nam mtar, agbur a ma kpaa a̱ lu atar.

¹⁶Sha hunda u tembe la, kwagh u yisan a̱ lu iniembe aseva ikundu, u i er un sha ikondo i kwel man i nyian dindee man i nyian bong man ikondo i pupuu i kôngor i sha mou u sendan, i̱ lu or u eren kwagh sha hwe nana̱ er ye; mtôm nam mnyiin, man agbur a ma kpaa anyiin.

¹⁷Mtôm ma ma kase tembe la cii, i̱ er ma ahye a azurfa; uiwever mba ma kpaa ve̱ lu mba azurfa, agbur a ma a̱ lu a togula.

¹⁸Iniembe i tembe la i̱ lu aseva deri, igbanger na hanma vegher i̱ lu aseva akunduahargber, ityaven i u i̱ lu aseva ataan, sha ikondo i pupuu i kôngor i sha mou u sendan; agbur a ma a̱ lu a togula.

¹⁹Ikav mbi tomov mbi tabernakel cii, mbi i lu eren tom na a mi cii man amande na cii kua amande a tembe cii, i̱ lu togula i̱ er mi ye.

²⁰Kaa Mbaiserael ve̱ va na u mkurem ma olev ma kumen ma wang, sha ci u tsaren, sha er á tsar imenger ia yeghen gbem yô.

²¹Ken tenti u kohol her la, ken won u ikondo i yisan i i lu sha ishigh ki Shiada la, Aron vea ônov nav ve̱ sôron i sha ishigh ki TER, i̱ yeghen aikighe zan zan sev mbu̱ aven a mi; i̱ hingir Mbaiserael tindi gbem sha ikov ikov.