Read tiv Ekesodu 3 Bible Online

Ekesodu 3 - tiv bible

Ekesodu 3

¹Tsô Mose lu kuran ilev mbi ter na kem Yetero, pristi u Midian la; a yem a ilev vegher u ken ijime i desereti a za ar hen uwo u Aôndo, ka Horebi je la.

²Ortyom u TER ande her a na ken nomborusu u u due ken atô u ageva yô; a nenge, yô, ageva la, lu yeghen usu, kpa ageva la hia ga.

³Tsô Mose kaa er: De, m̱ za, m̱ za nenge zegekwagh u kpilighyol er i er man ageva la a hie ga la.

⁴Zum u TER nenge er a kaha sha u za nengen yô, Aôndo yila un ken atô u ageva la, er: Mose, Mose! A rumun er: Een.

⁵Shi A kaa er: De kporom heen ga; tsuwa akôv shin angahar a ou kera, gadia ijiir i u til her ne, ka icighanjiir je.

⁶Shi A kaa er: Ka Mo, Aôndo u teru, Aôndo u Aberaham man Aôndo u Isaka man Aôndo u Yakob. Tsô Mose yer ishigh nagh kera; gadia lu cier un iyol u nengen a Aôndo.

⁷TER shi kaa a na er: M nenge ican i ior Av mba ve lu ken Igipiti la, shi M ungwa mliam vem ma ve lu vaan mbatorough a ve la, gadia M fa atsan a ve la.

⁸Nahan M sen sha u Me va yima ve sha ikev i Mbaigipiti, Me due a ve ken tar la, Me yem a ve ken tar u dedoo man u kehen kpaa, tar u atumbabua man iyough ve dumbur ker yô; ka ker ape Mbakanaan man Mbahiti man Mbaamor man Mbaperishi man Mbahivi kua Mbayebushi ve tem la.

⁹Nenge, mliam ma Mbaiserael va hen a Mo je; shi M nenge m-imbishi u Mbaigipiti ve imbishi ve yô.

¹⁰Nahan yô, va M̱ tindi u hen Farao, sha u ú za due a ior Av Mbaiserael ken tar u Igipiti yô.

¹¹Kpa Mose kaa a Aôndo er: Mo m ngu di nyi je u me za hen Farao, me za due a Mbaiserael ken tar u Igipiti?

¹²A kaa er: Mimi je, Me lu a we imôngo; kwagh ne una hingir we ikav, er i lu Mo M tindi u yô: zum u ú due a ior ken tar u Igipiti yô, ka hen uwo ne je né va civir Aôndo ye.

¹³Mose kaa a Aôndo er: Tsô aluer me za hen Mbaiserael, me za kaa a ve mer: Aôndo u uter enev tindim hen a ven, man vea pinem er: Iti Na er ana? Yô, m̱ kaa a ve mer nana?

¹⁴Aôndo kaa a Mose er: M NGU ER M LUUN YÔ; shi A kaa er: Kaa Mbaiserael nahan wer: Ka M NGU, A tindim her a ven ye.

¹⁵Shi Aôndo kaa a Mose er: Kaa Mbaiserael nahan wer: TER, Aôndo u uter enev, Aôndo u Aberaham man Aôndo u Isaka man Aôndo u Yakob, tindim hen a ven; ingin ka iti Yam gbem sha won je ne, ka sha i je á umbur Mo sha ikov ikov ye.

¹⁶Za, za kohol mbatamen mba Iserael, kaa a ve wer: TER, Aôndo u uter enev, Aôndo u Aberaham man u Isaka man u Yakob ande her a mo, A kaa er: M ver ishima sha a ven dedoo, M shi M nenge kwagh u i er a ven ken Igipiti la kpaa;

¹⁷man shi M kaa Mer: Me due a ven ken ican i ken Igipiti, Me yem a ven ken tar u Mbakanaan man Mbahiti man Mbaamor man Mbaperishi man Mbahivi man Mbayebushi, tar u atumbabua man iyough ve dumbur ker la.

¹⁸Vea ver ato sha kwaghôron wou; nahan yô, za hen tor u Igipiti, we kua mbatamen mba Iserael, za kaa nen un ner: TER, Aôndo u Mbaheberu, kohol se; hegen yô, ma u shi de ma se ze zende u tsan gbenda ayange atar ken desereti, ma se za ne TER, Aôndo wase nagh.

¹⁹Kpa M fa tor u Igipiti una rumun er ne̱ za ga, shin sha uwegh ku ageegh je kpaa, una rumun ga.

²⁰Mo kpaa Me naregh uwegh Agh, Me tsaha tar u Igipiti sha akaa Am a kpilighyol a Me er ken u yô; ken masetyô yô, una pase ne.

²¹Man shi Me er ior mban á doo, Mbaigipiti a ve; zum u né due yô, né yem aveve ga;

²²kpa hanma kwase nana̱ sôn kwase u wan ndor a nan kua kwase u nan lu va tsan a nan, ikav mbi i er sha azurfa man sha zenaria kua akondo kpaa; né wuha ônov enev mba nomso man mba kasev iyol mi; né sar Mbaigipiti gbulugh gbulugh.