Read tiv Ekesodu 30 Bible Online

Ekesodu 30 - tiv bible

Ekesodu 30

¹Er atse a nanden kwaghhumandoon sha mi; ka sha kon u saa ú er a ye;

²Iniembe i a, i̱ lu ishiva i môm, igbanger i a kpaa ishiva i môm; a̱ lu ambusu anyiin akuku; ityaven i a, i̱ lu aseva ahar; akor a a, a̱ lu kwagh môm a a cii.

³Cir a zenaria u wang iyol, tembe u a man ambusu a a ningir tser cii, kua akor a a kpaa; kase a tsar u zenaria ningir tser.

⁴Er a ahye a zenaria ahar, shin kur u tsar la; er a sha azongo a a, sha ambusu a a ahar la; a̱ lu ajiir a igbough mbi tôôn a a mi.

⁵Gba igbough sha kon u saa, cir mbi zenaria iyol.

⁶Ver a sha ishigh ki ikondo i yisan i i lu sha ishigh ki areki u shiada sha ishigh ki ijiir i nan iwom i i lu sha Shiada, hen ijiir i Me kohol we la.

⁷Aron a̱ nanden kwaghhumandoon sha ilyôghonov mbi dedoo sha a; hanma sev zum u una sôron amenger la, a̱ nanden un.

⁸Zum u Aron una tsaren amenger aikighe yô, a̱ nande un, ka kwaghhumandoon u gbem sha ishigh ki TER sha ikov ikov je la.

⁹De nanden nen ma kwaghhumandoon ugen kposo sha a ga, shin nagh ku nanden, shin nagh ku sha samuyia kpaa ga; man de urun nagh ku man sha a kpaa ga.

¹⁰Aron a̱ na iwom sha akor a a, hanma inyom kwa môm, sha awambe a iwom i nagh ku isholibo la; a̱ na iwom sha ci u a, hanma inyom kwa môm sha ikov ikov cii; ka TER icighankwagh u hemban cii.

¹¹Shi TER ôr kwagh a Mose, kaa er:

¹²Zum u ú ôron iyenge i Mbaiserael yô, ve mba i er ve la, hanma nomsoor nana̱ na TER ipaan sha ci u uma u nan, shighe u ú ôr iyenge ve la; sha er i̱ de hee ve bouange zum u ú or iyenge ve la ga.

¹³Ka kwagh u vea na ne: hanma or u nan kar nan za kohol mba i er ve la, nana̱ na veghershekel, i̱ lu shekel u icighanjiir la je (shekel yô, ka ugera ikundu); veghershekel la ka nagh ku nan TER.

¹⁴Hanma or u nan kar nana za kohol mba i er ve la yô, hii sha u nan lu anyom ikundu man u nan hembe nahan, nana̱ na nagh ku TER kura.

¹⁵Ornyar nana̱ de ne i hembe ga, icanor kpaa nana̱ de ne i̱ yen veghershekel la ga, zum u vea naan nagh ku TER sha u nan iwom sha ci uuma enev la.

¹⁶Ngohol inyaregh ki iwom hen Mbaiserael, ver ki sha ci u tom u tenti u kohol ker la, sha er ki̱ hingir kwagh u umbur Mbaiserael a mi sha ishigh ki TER yô, sha u nan iwom sha ci u uuma enev.

¹⁷TER ôr kwagh a Mose, kaa er:

¹⁸Er tasa sha togula, ityô na kpaa i̱ lu sha togula, sha ci u ôôn iyol mi, ver un hen harga u tenti u kohol ker la a atse a nanden nagh sha mi la, haa mngerem shimi.

¹⁹Aron kua ônov nav ve̱ ôôn ave kua angahar a mi;

²⁰shighe u vea nyôron ken tenti u kohol her la yô, ve̱ ôô iyol sha mnger sha er vea kpe ga yô, shin shighe u vea kporom hen atse a nanden nagh sha mi sha u eren tom nanden TER nagh ku usugh yô.

²¹Kape ve̱ ôôn ave kua angahar kpaa la, sha er vea kpe ga yô; i̱ hingir ve tindi u gbem je, un a tsombor na sha ikov ikov.

²²TER shi ôr kwagh a Mose, kaa er:

²³Tôô ilyôghonov mbi hemban doon: mire u nondon, a̱ kuma ushekel deri utaan; man shinamon u human doon, a̱ kuma vegher na, ka ushekel deri uhar man akunduahargber je la; man kalamu u human doon, a̱ kuma ushekel deri uhar man akunduahargber;

²⁴man kashi, a̱ kuma ushekel deri utaan, i̱ lu shekel u icighanjiir la; man mkurem ma olev ma ma kom hin môm yô;

²⁵er icighanmkure u shighen a mi, kwagh u human doon, i̱ lu or u nan fe u nungwan kwaghhumandoon nana̱ nungwa ma ye; i̱ lu icighanmkure u shighen.

²⁶Shighe tenti u kohol ker la mi, man areki u shiada,

²⁷man tebul a ikav nav cii, man daarimenger a ikav nav,

²⁸man atse a nanden kwaghhumandoon sha mi, man atse a nagh ku nanden a ikav mbi a cii, kua zegetasa a ityô na.

²⁹Tsegha ve, ve̱ hingir uicighanmbaakaav mba hemban cii yô; hanma kwagh u una bende a ve yô, una hingir icighankwagh.

³⁰Shi shighe Aron ma, a ônov nav kpaa, tsegha ve, ve̱ eren Mo tom u pristi.

³¹Man shi ôr kwagh a Mbaiserael, kaa ve wer: Mkurem man, ma̱ lum icighanmkure u shighen sha ikov ikov.

³²I̱ de hee or ma iyol ga, man shi de nongo magenem ma lun er ma nahan ga, i̱ tsegha ma, ma̱ lu ne icighankwagh.

³³Hanma or u nana nungwa magenem er ma nahan, shin hanma or u nan haa or u ken inya ma iyol yô, i̱ dugh nan ken nongo u nan kera.

³⁴TER shi kaa a Mose er: Tôô akaahumandoon: setaketi man onika man galbanum, akaahumandoon man libano u human doon u wang; myohom vem cii, ma̱ lu vough vough.

³⁵Er kwaghhumandoon a mi u nanden, i̱ lu or u nan fe u nungwan kwaghhumandoon nana̱ nungwa ye, i̱ wa bar sha mi, a̱ lu u wang man u i tsegh un kpaa.

³⁶Pande un, kume a̱ via, ver sha ishigh ki Shiada ken tenti u kohol ker la, hen ijiir i Me kohol a we la, a̱ hingir we icighankwagh u hemban cii.

³⁷Kwaghhumandoon u nanden u ú er yô, de nongo nen ugen u lun er un nahan sha ci wen ga; a̱ hingir ne icighankwagh u TER.

³⁸Hanma or u nana er ugen er ngun nahan, nana ungwan ihuma na yô, i̱ dugh nan ken nongo u nan kera.