Read tiv Ekesodu 32 Bible Online

Ekesodu 32 - tiv bible

Ekesodu 32

¹Zum u ior nenge er Mose tsa sha uwo, kera hungwa ga yum yô, ior va kohol hen Aron, ve kaa a na er: Mough, er se mbaaôndo mba vea hemen se yô; gadia Mose or u a dugh a vese ken tar u Igipiti ne yô, se fa kwagh u a za er un ga.

²Tsô Aron kaa a ve er: Tsuwa nen ikunya i zenaria i ken ato a kasev enev man ônov enev mba nomso kua mba kasev la, va nam nen i.

³Tsô ior cii tsuwa ikunya i ve wa ken ato la, ve va na Aron.

⁴A ngohol i sha ikev ve, a sôr i sha kanji, a er wanbua a mi, a ker; tsô ve kaa er: Iserael, ka mbaaôndo ou mba ve dugh a we ken tar u Igipiti je ne!

⁵Zum u Aron nenge nahan yô, a ta atse a nanden nagh sha mi sha ishigh nagh; shi Aron yôô er: Kper yô, ka iniongo i TER.

⁶Kper nan yô, ve mough pepe, ve na iniav mbi nanden, shi ve va a iniav mbi bem kpaa; tsô ior tema inya gba yan akaa man akaa, shi ve mough ve gba vinen amar.

⁷Tsô TER ôr kwagh a Mose, kaa er: Mough, hungwa, gadia ior ou mba u dugh a ve ken tar u Igipiti la, ve hôngor ayol a ve ve,

⁸Ve undu gbenda u M kaa ve Mer ve̱ za sha mi la kera kpaa, ve er wanbua u keren a ker, ve va gure un inya, ve na un nagh, ve kaa er: Iserael ka mbaaôndo ou, mba ve dugh a we ken tar u Igipiti je ne.

⁹TER shi kaa a Mose er: M nenge ior mban, man nenge, ka ior i taver ityough kpe kpe.

¹⁰Yô, dem ase, iyugh Yam i̱ mough a ve ityô, M̱ tim ve; nahan Me gema u, ú hingir ikurior i vesen.

¹¹Kpa Mose zamber a TER, Aôndo na, er: Ku TERE, ka nyi man iyugh You i mough a ior Ou ityô, mba U dugh a ve ken tar u Igipiti sha agee a vesen man uwegh ku ageegh nahana?

¹²Ka nyi man Mbaigipiti vea gba va ôron kwagh kaan er: Ka sha u nzughul a ve tsô, A dugh a ve, sha u Una za wua ve sha iwo, Una tim ve sha won kera. Yô, de iyugh You i taver yum la, gema ishima, de kwaghbo u ma U er ior Ou la.

¹³Umbur mbayev Ou, Aberaham man Isaka man Iserael, mba U bum a ve sha iyol You je, U kaa a ve Wer: Me seer tsombor wen ua ngee er asan a Sha nahan; man tar u M ter kwagh u u ne cii Me na tsombor wen, ú ya dyako u u gbem sha won.

¹⁴Tsô TER gema ishima de kwaghbo u A kaa er Una er ior Nav la.

¹⁵Nahan Mose gema hungwa sha uwo a ikpande i shiada ihiar la sha uwe; ikpande i i nger i avegher cii yô, i nger i keen man keen kpaa.

¹⁶Ikpande la yô, lu tom u Aôndo je; ingeren la kpaa lu ingeren i Aôndo je, i gber a gber i sha ikpande.

¹⁷Zum u Yosua ungwa ayôôso a ior, er ve lu gbiren vaa yô, a kaa a Mose er: Igeren i utya ngi ken afo.

¹⁸Kpa a kaa er: Ka imo i mbaeren akenge sha mhembe ga, man shi ka imo i mbagbiren ivaa er kwagh tser ve kpaa ga; kpa ka imo i atsam a wan, m ongo ye.

¹⁹Tsô va mgbôghom her afo yô, a nenge wanbua la kua amar a vinen; nahan ishima vihi Mose tsung, a gema ikpande la a haa kera, a hembe i hen itinewoogh.

²⁰Nahan a tôô wanbua u ve er la, a nande sha usu, a wua hingir vuwe, a urugh sha mnger, a na Mbaiserael, ve ma.

²¹Mose kaa a Aron er: Ior mban ve er nyi, man u hee ve zegekwaghbo iyol nahana?

²²Tsô Aron kaa er: Ishima i̱ de vihin terem tsung nahan ga; we iyol you kpaa u fa ior mban er ve ver asema sha afer a eren yô.

²³Gadia ve kaa a mo er: Er se mbaaôndo mba vea hemen se yô, gadia Mose, or u a dugh a vese ken tar u Igipiti ne yô, se fa kwagh u a za er un ga.

²⁴Nahan m kaa a ve, mer: U nan lu a zenaria yô, nana̱ tsuwa un; tsô ve va nam; m gema m haa ken usu, maa wanbua ne due ker.

²⁵Zum u Mose nenge er ior ar ave yô; gadia Aron na, ve ar ave je, mbaihomov vev gba lamen sha ve dang dang;

²⁶nahan Mose za za tile hen hunda u afoogh kaa er: U nan te ikaa ken TER yô, nana̱ va kohol mo. Nahan ônov mba Levi cii za kohol un.

²⁷A kaa a ve er: TER, Aôndo u Iserael, kaa nahan er: Hanma or nana̱ kange sanker u nan iwenge, nana̱ za heen nana̱ hide heen, sha ihinda ihinda, ken afo cii, hanma or nana̱ wua anngô u nan, hanma or nana̱ wua ikar u nan, man shi hanma or kpaa, nana̱ wua u a we ndor a nan.

²⁸Tsô ônov mba Levi er sha imo i Mose; sha iyange la ior kpe ku u ishôm er dubu utar nahan.

²⁹Mose kaa er: Tsegha nen ayol a en nyian, sha u eren TER tom — gadia hanma or lu ihom a wan u nan kua anngô u nan kpaa — sha er Una na ne iveren nyian yô.

³⁰Tsô kper nan sev mbu aven yô, Mose kaa a ior er: Ne er isholibo je; yô, ahegen me kôndo sha TER, alaghga me za na iwom sha ci u isholibo yen.

³¹Tsô Mose hide hen TER za kaa er: Ahii! Ior ne er isholibo i vesen je, ve er mbaaôndo sha zenaria.

³²Hegen yô, ma U shi de ve isholibo ve, man aluer ka nahan ga yô, esem ken ruamabera Wou u U nger la kera tsô.

³³Tsô TER kaa a Mose er: Hanma or u nan erem isholibo yô, ka nan je Me ese nan ken ruamabera Wam kera ye.

³⁴Ahegen yô, za za hemen ior, za a ve hen ijiir i M kaa u la; nenge, ortyom Wam una hemen we; nahan kpaa, sha iyange i Me va u va tsahan yô, Me tsaha ve sha isholibo ve.

³⁵Kape TER tsaha ior mbala, sha ci u wanbua u Aron a er la.