Read tiv Ekesodu 33 Bible Online

Ekesodu 33 - tiv bible

Ekesodu 33

¹Tsô TER kaa a Mose er: Mough heen, we kua ior mba u due a ve ken tar u Igipiti ne, yem nen ken tar u M bum a Aberaham man Isaka man Yakob M kaa Mer: Ka tsombor wou je Me na u u ye;

²Me tindi ortyom a̱ hemen we — Me zenda Mbakanaan man Mbaamor man Mbahiti man Mbaperishi man Mbahivi man Mbayebushi kera—

³u zan hen tar u atumbabua man iyough ve dumbur ker la, gadia Mo Me zaan hen atô wou a we imôngo ga, gadia we u ngu ikurior i taver ityough, sha er Me tim u sha gbenda ga yô.

⁴Zum u ior ungwa mkaanem ma bom man, nahan ve gba zungwen; mô kera haa ikav mbi nan mbi hweev ga.

⁵TER shi kaa a Mose er: Kaa Mbaiserael wer: Ne mba ior i taver ityough yum; aluer Me zaan hen atô wou a ven imôngo anshighe kpeghee tsô kpaa, Me tim ne kera; ahegen yô, er ikav youv mbi hweev kera, man Me fa er Me er a we ye.

⁶Mbaiserael maa hii u den ikav mbi hweev hen uwo u Horebi la je.

⁷Mose yô, a tôô tenti a tim ken akôngoafogh, lu ca a afo, a yila un er: Tenti u kohol ker. Nahan yô, hanma or u nan keren TER, nan due nan za hen tenti u kohol ker, u ken akôngoafogh la.

⁸Nahan yô, shighe u Mose una due una zaan hen tenti la, ior cii ve mough, hanma or nan za tile hen hunda u tenti u nan, ve haa ashe sha Mose zan zan a kar za nyôron ken tenti.

⁹Mose una nyôron ken tenti yô, ityôgh ki ibeenegh kila ki sen, ki va tile hen hunda u tenti; tsô TER A gba ôron kwagh a Mose.

¹⁰Zum u ior cii vea nengen er ityôgh ki ibeenegh ki til sha hunda u tenti yô, ior cii ve mough ve tile sha, ve gure inya hanma or hen hunda u tenti u nan.

¹¹Nahan TER A ôr kwagh a Mose ishigh a ishigh er or ka nan ôr kwagh a huror u nan nahan, tsô a hire ken afo; kpa wanakiriki na Yosua, wan u Nun, wanyekwaor la yô, duen ken tenti ga.

¹²Tsô Mose kaa a TER er: Nenge, ka U kaa a mo Wer: Za a ior mban; kpa U kera tesem or u U tindi Wer nana̱ za a mo imôngo ga. Nahan kpaa, U kaa Wer: M fa u sha iti you je, man doom a we kpaa.

¹³Ahegen yô, aluer a doo U a mo yô, ma U shi tesem igbenda You sha er me fa U yô; sha er i̱ doo U a mo yô; shi fa er ikurior ne i lu ior Ou yô.

¹⁴A kaa er: M̱ za iyol Yam M̱ za nyôr a We hen ijiir i memen zee?

¹⁵A kaa a Na er: Aluer We iyol You Wea zaan ga yô, de moughon a vese heen ga.

¹⁶Gadia ka sha nyi je man á fa er i doo U a mo kua ior Ou mbana? Kera ka sha mze u Ú za a vese imôngo la gaa? Ka nahan man mo kua ior Ou se lu kposo a ior mba ve lu sha won cii ye.

¹⁷TER shi kaa a Mose er: Kwagh u u kaa la, Me er un kpaa, gadia doom a we, shi M fa u sha iti you kpaa.

¹⁸A kaa er: Ma U tesem iengem You.

¹⁹A kaa er: Me er mdoom Am cii maa kar sha ishigh you, shi Me yôô iti i TER sha ishigh you kpaa; Me rumun or sha mhôôn, u i lum pe rumun nan yô; Me zungwe or mhôônom u i lum pe zungwen nan yô.

²⁰Shi A kaa er: Ú fatyô u nengen a ishigh Yagh ga; gadia or á fatyô u nengen a Mo, shi lun uma ga.

²¹Tsô TER kaa er: Nenge, ijiir ngi hen Mo ape u fatyô u za tilen sha vande yô;

²²tsô zum u iengem Yam ia va karen yô, Me wa u ken kwe u vande, Me cir uwegh Agh sha a we zan zan Me kar karen;

²³tsô Me tôô uwegh Agh kera, ú nenge ijime Yam; kpa ishigh Yagh yô, á nenge a mi ga.