Read tiv Ekesodu 6 Bible Online

Ekesodu 6 - tiv bible

Ekesodu 6

¹TER kaa a Mose er: Hegen ú nenge kwagh u Me er a Farao yô, gadia á lu sha uwegh ku ageegh man una de ve, vea yem ye, man á lu sha uwegh ku ageegh je una zenda ve ken tar na kera ye.

²Man shi Aôndo ôr kwagh a Mose, kaa a na er: Ka Mo TER;

³M ande hen Aberaham man Isaka man Yakob, Mo Aôndo Uhembanagee, kpa iti Yam i TER (ka Yehova je la) ne yô, ve fa ga.

⁴Shi M ya ikur a ve Mer, Me na ve tar u Kanaan, tar u shir ve, u ve lu shir ker la.

⁵Man shi Mo M ungwa mtoghor u Mbaiserael mba ior i Igipiti ve ker ve ikpan la, nahan M umbur ikuryan Yam.

⁶Nahan yô, kaa Mbaiserael wer: Ka Mo TER, Me due a ven ken tom u ican u Mbaigipiti ne kera, man shi Me yima ne sha ican i ikpan i sha ikev ve la kpaa ye; Me paa ne sha uwegh ku naregh, man sha ajiraôron a vesen.

⁷Me ngohol ne, né hingir Mo ikurior, Me lu Aôndo wen; man shi né fa er Mo TER M lu Aôndo wen u M dugh a ven ken tom u ican u Mbaigipiti yô.

⁸Man shi Me va a ven ken tar u M bum Mer, Me na Aberaham man Isaka man Yakob la; Me na ne u, ua lu dyako wen; ka Mo TER.

⁹Kape Mose ôr kwagh a Mbaiserael la; kpa ve ungwa imo i Mose ga, sha ci u asema lu vihin ve man ican i ikpan kpaa nyer ve iyol yô.

¹⁰TER shi ôr kwagh a Mose kaa er:

¹¹Za, za ôr kwagh a Farao tor u Igipiti, a̱ de Mbaiserael ve̱ mough ken tar na kera.

¹²Kpa Mose ôr kwagh sha ishigh ki TER, a kaa er: Nenge, Mbaiserael je kpaa, mba ongo imo yam ga, man á er nan ve Farao una ungwam, mo u m lu orfan kwaghôron ga nee?

¹³TER shi ôr kwagh a Mose man Aron tindi ve er ve̱ za kaa Mbaiserael kua Farao tor u Igipiti er ve̱ due a Mbaiserael ken tar u Igipiti kera.

¹⁴Mban yô, ka mbavesen mba sha uya mba uter: Ônov mba Ruben, waniunda u Iserael yô, ka: Hanoki man Palu man Heseron man Karmi; mban ka uipaven mba Ruben je ne.

¹⁵Man ônov mba Shimeon yô, ka: Yemuel man Yamin man Ohadi man Yakin man Sohar man Shaul wan u Wankanaan la; mban ka uipaven mba Shimeon je ne.

¹⁶Mban yô, ka ati a ônov mba Levi sha mmar ve, ka: Gershon man Kohati man Merari. Anyom a Levi tsa sha won yô, lu anyom deri man ikundugber kar ataankarahar.

¹⁷Ônov mba Gershon yô, ka: Libeni man Shimei, sha uipaven vev.

¹⁸Ônov mba Kohati yô, ka: Amram man Isehar man Heberon man Ushiel. Anyom a Kohati tsa sha won yô, lu anyom deri man ikundugber kar atar.

¹⁹Ônov mba Merari yô, ka: Maheli man Mushi; mban ka uipaven mba Levi sha mmar ve je ne.

²⁰Amram yô, er Yokebedi anngô u ter na, mar Aron man Mose a na. Anyom a Amram tsa sha won yô, lu deri man ikundugber kar ataankarahar.

²¹Ônov mba Isehar yô, ka: Kora man Nefegi man Shigeri.

²²Ônov mba Ushiel yô, ka: Mishael man Elsafan man Shiteri.

²³Aron yô, er Elisheba wan u Aminadabi, anngô u Nashon, mar Nadabi man Abihu man Eleasar man Itamar a na.

²⁴Ônov mba Kora yô, ka Ashir man Elkana man Abiasav; mban ka uipaven mba Kora je ne.

²⁵Eleasar wan u Aron er kwase ken ônov mba Putiel, a mar Pinehashi a na. Mban ka ityouv mbi uter mba Mbalevi sha uipaven vev je ne.

²⁶Ka Aron man Mose je ne, mba TER kaa a ve er: Due nen a Mbaiserael ken tar u Igipiti, sha akum a ve la.

²⁷Ka ve je, ve ôr kwagh a Farao tor u Igipiti er, i̱ due a Mbaiserael ken Igipiti ye; ka ve mban ne, Mose vea Aron.

²⁸Tsô sha iyange i TER ôr kwagh a Mose ken tar u Igipiti la,

²⁹TER ôr kwagh a Mose, kaa er: Ka Mo TER; ôr Farao, tor u Igipiti, akaa a M lu ôron we ne cii.

³⁰Mose gema kaa sha ishigh ki Aôndo er: Mo, m ngu orfan kwaghôron ga, á er nan man Farao una ungwama?