Read tiv Ekesodu 8 Bible Online

Ekesodu 8 - tiv bible

Ekesodu 8

¹TER shi kaa a Mose er: Za hen Farao, za kaa un wer: TER kaa nahan er: De ior Av ve̱ yem, ve̱ za civir Mo.

²Man aluer ú venda a ve u yemen yô, Me haa asôhô ken tar wou cii.

³Ifi una iv a asôhô, aa unde aa nyôr ken ya wou man iyou you i tsan man sha gambe wou man ken ya u mbatomov ou man sha ior ou man ken atse a ou kua shin mbaakpela ou mba hôron mwem min kpaa.

⁴Asôhô aa unde u iyol man ior ou kpaa kua mbatomov ou cii.

⁵TER kaa a Mose er: Kaa Aron wer: Naregh uwegh ough a gbough ough sha uifi man sha mbaakpambamngerev man atungu, sha er asôhô aa va ken tar u Igipiti yô.

⁶Tsô Aron naregh uwegh nagh sha mngerem ma Igipiti; nahan asôhô va, va iv ken tar u Igipiti.

⁷Mbaahiriv kpaa er nahan sha ahir a ve, ve va, a asôhô ken tar u Igipiti.

⁸Tsô Farao tindi i za yila Mose kua Aron, a kaa er: Sôn nen TER, A̱ kuram asôhô ne kera, kua hen ior av kpaa, tsô me de ior mban ve̱ yem, ve̱ za na TER nagh.

⁹Mose kaa a Farao er: Ka we ú kaa shighe u m̱ sôn sha ci wou man mbatomov ou kua ior ou, er á tim u asôhô hen uya ou, a̱ mase shin, shin ifi tseegh ye.

¹⁰A kaa er: Ka kper. Tsô Mose kaa er: Ka sha imo you á er ye, sha er u fa er ma or nan kom sha TER, Aôndo wase ga yô.

¹¹Asôhô aa kar her a we kera man hen uya ou man hen mbatomov ou kua hen ior ou, aa mase shin, shin ifi tseegh.

¹²Tsô Mose vea Aron due hen Farao ve yem; nahan Mose sôn TER sha kwagh u asôhô a A haa Farao la.

¹³TER er sha imo i Mose; asôhô kpe ken ayou man ken ikungur kua ken akôngo kpaa.

¹⁴I kohol a atihi atihi; tar huma.

¹⁵Kpa zum u Farao nenge er i hire a mi ijime yô, a cighir ishima na, a kera ungwa imo ve ga; er TER kaa yô.

¹⁶Tsô TER kaa a Mose er: Kaa Aron wer: Naregh gbough ough, gbidye vuulevu hen inya, u̱ hingir inyarev mbi nyuman ken tar u Igipiti cii.

¹⁷Ve er nahan; Aron naregh uwegh nagh a gbough nagh, gbidye vuulevu hen inya, tsô nenge, inyarev mbi nyuman haa sha ior kua ilev; ihundu i hen inya cii hingir inyarev mbi nyuman ken tar u Igipiti ca ca.

¹⁸Mbaahiriv mbala kpaa er nahan sha ahir a ve, sha u vea er inyarev mbi nyuman mbi̱ va, kpa ve fatyô ga. Inyarev mbi nyuman haa sha ior kua ilev.

¹⁹Tsô mbaahiriv mbala kaa a Farao er: Kwagh ne ka ihôwe u Aôndo je; kpa ishima i Farao cighir, a wa ve iko ga; er TER kaa yô.

²⁰TER kaa a Mose er: Mough pepe za tile sha ishigh ki Farao shighe u una zaan shin kpemnger la, kaa a na wer: TER kaa nahan er: De ior Av ve̱ yem, ve̱ za civir Mo.

²¹Man aluer wea rumun u den ior Av ve̱ yem ga yô, nenge, Me haa u akughô, we kua mbatomov ou man ior ou, man ken uya ou kpaa; uya mba Mbaigipiti vea mgbough a akughô kua inya i ve lu sha mi kpaa.

²²Sha iyange la, Me ver tar u Goshen kposo, pe ior Av ve tem la, akughô aa lu ker ga; sha u u̱ fa er Mo M lu TER sha won yô.

²³Me yima ior Av, Me pav ve kposo a ior ou; kper je, ivande ne ia er.

²⁴Ka ape TER er je la; ikpila-akughô i nyuman nyôr ken ya u Farao man ken uya mba mbatomov nav kua ken tar u Igipiti cii; tar vihi sha ci u ikpila-akughô la.

²⁵Tso Farao yila Mose vea Aron, kaa er: Za, za na nen Aôndo wen nagh ken tar ne.

²⁶Kpa Mose kaa er: Doo u eren nahan ga; gadia sé va sôngo Aôndo TER kwagh u ndôhôr Mbaigipiti ishima; tsô aluer sé sôngo kwagh u undôhôr ishima sha ashe a Mbaigipiti nahan vea ta se awen ga ha?

²⁷Sé za zende u tsan gbenda ayange atar ken desereti, sé za na TER, Aôndo wase, nagh er A kaa se yô.

²⁸Nahan Farao kaa er: M rumun, za nen, za na nen TER, Aôndo wen, nagh ken desereti; kpa ka ca tsô, de ze nen ga ye; sôn nen sha ci wam.

²⁹Mose kaa er: Nenge, m ngun karen sha ishigh you ne, me za sôn TER sha er kper ikpila-akughô ne, i̱ yem hen Farao kera yô, man hen mbatomov nav kua hen ior nav kpaa; Farao a̱ de kera shi tsughun a tsugh, a̱ vendan ior u yemen za nan TER nagh ga.

³⁰Tsô Mose mough hen Farao za sôn TER.

³¹TER er sha imo i Mose la; A kura ikpila-akughô la hen Farao kera, man hen mbatomov nav kua hen ior nav kpaa; A shi i môm ga.

³²Kpa Farao shi cighir ishima na hen shighe ne kpaa, a de ior er ve̱ yem ga.