Read tiv Yobu 1 Bible Online

Yobu 1 - tiv bible

Yobu 1

¹Ngise orgen lu ken tar u Ushi, iti i nan er Yobu; or la lu or u mimi, u perapera, u cian Aôndo, paregh kwaghbo.

²A mar ônov mba nomso utaankaruhar man mba kasev utar.

³Inyaregh nagh yô: iyôngo lu dubu utaankaruhar, urakumi dubu utar, abua a kpelan ikyekye ahar ahar kuma deri utaan, anmgbian a ujaki deri utaan man mbatomov kpishi; nahan or la hemba ior mba ken ityoughkitaregh cii.

⁴Yô, ônov nav mba nomso zaan iniongo hen ya u anmgbianev vev sha adondo adondo, hanmô sha iyange i nan; shi ve tindin i lôhôn anmgbianev vev mba kasev mba utar mbala kpaa er ve̱ va yaan man ve̱ maan a ve imôngo.

⁵Tsô zum u iniongo ve ia ningir ia tser yô, Yobu a tindi loho er ve̱ va, i̱ wanger ve; nahan a mough pepe, a na iniav mbi nanden sha iyenge ve cii; gadia Yobu a hen er: Alaghga ônov av er kwaghbo, ve venda Aôndo ken asema a ve. Kape Yobu eren gbem la.

⁶Nahan iyange igen ônov mba Aôndo va, va tile sha ishigh ki TER, Satan di kpaa va a ve imôngo.

⁷Tsô TER pine Satan er: U due hana? Satan gema kaa a TER er: Ka ken ijende wue wue shin tar, u kôndon man u senen shin u.

⁸Nahan TER pine Satan er: U fa kwagh u wanakiriki Wam Yobu dedoo kpa? Gadia ma or kuma sha a na shin tar ga, ka or u mimi, u perapera, u cian Aôndo, palegh kwaghbo.

⁹Tsô Satan gema kaa a TER er: Ka gbilin Yobu a cie Aôndo yee?

¹⁰U wa un igyar, U kase un a ya na kua akaa a a lu a mi cii gaa? U ver tom u ave na dedoo, uzendenya nav kpaa seer kpishi shin tar.

¹¹Kpa naregh ase uwegh Ough, bende akaa a a lu a mi la cii, tsô una venda U sha ishigh You je!

¹²Tsô TER gema kaa a Satan er: Yô, nenge, akaa a a lu a mi cii nga sha ikev you; kpa sha iyol na jim yô, de ze uwegh ga. Nahan Satan kar sha ishigh ki TER kera.

¹³Tsô iyange igen er ônov nav mba nomso man mba kasev ve lu yan kwagh man man wain hen ya u anngô ve u tamen yô,

¹⁴Ortyom za va hen Yobu, va kaa er: Abua lu kpelan ikyekye i kahan sule, ujaki kpaa lu yan toho ikua a a;

¹⁵yô, Mbasabea va ta num sha mi, kôr yem a mi; ve wua mbatomov sha sanker; ka mo tseegh m wer m va kaan we ye.

¹⁶Ngur ôron nahan yô, ugen shi za va, gba va kaan er: Usu u Aôndo sen Sha, va hia iyôngo kua mbatomov, wua kera; ka mo tseegh m wer m va kaan we ye.

¹⁷Ngur ôron nahan yô, ugen shi za va, gba va kaan er: Mbakaldi za va akum atar, va ta num sha urakumi kôr yem a mi, ve wua mbatomov sha zwa u sanker; ka mo tseegh m wer m va kaan we ye.

¹⁸Ngur ôron nahan yô, ugen shi za va, gba va kaan er: Ônov ou mba nomso man mba kasev, ve lu yan kwagh man man wain hen ya u anngô ve u tamen;

¹⁹yô, zegehiar due ken desereti va ta sha azongo a iyoughough a anyiin yôhôl kighir mbayev, ve kpe cii; ka mo tseegh m wer m va kaan we ye.

²⁰Tsô Yobu mough ande riga na, tolough ityough nagh, a gba inya, a gure a civir;

²¹a kaa er: Lu m duen ken iyav mbu ngôm idyelegh, shi ka idyelegh kpaa me hide ye; ka TER A ne ye, shi ka TER A ngohol kpaa ye; i̱ wuese iti i TER.

²²Ken akaa ne cii Yobu er kwaghbo ga, a na Aôndo ibo er A er kwagh u kpeegh kpaa ga.